ვახტანგ ხმალაძე: ჯაჭვლიანის დანიშვნის ფაქტი კორუფციული საფრთხის შემცველი არ არის

2016-08-24 18:01:11, 664 ნახვა

პოლიტიკა

„რესპუბლიკური პარტიის“ წევრი ვახტან ხმალაძე „ექსპრესნიუსთან“ საუბრისას პარლამენტარ სოსო ჯაჭვლიანის მთის კურორტების განვითარების კომპანიის სახელმწიფო შპს-ს ხელმძღვანელად დანიშვნას ეხმაურება და აცხადებს, რომ თუ კორუფციის ფაქტი არ გამოვლინდა, მხოლოდ ვინმეს სადმე დანიშვნა, არ არის კორუფციის რისკის შემცველი ქმედება.

„თუ კორუფციის ფაქტი არ გამოვლინდა, იქამდე ვინმეს სადმე დანიშვნა არაა კორუფცია. კორუფცია არის სარგებლის მიღების მიზნით, ისეთი ქმედების განხორციელება და ამით კონკრეტული პიროვნება სარგებლობს ანუ ქრთამს იღებს. ჯაჭვლიანის დანიშვნის ფაქტს კორუფციული საფრთხის შემცვლელს ვერ ვუწოდებ. შეიძლება, მსგავსი რამის თქმა ისეთ პირზე, რომელიც ადრე მსგავს ქმედებაში იყო შემჩნეული. მეორე ფაქტია, რომ ხელისუფლება საწარმოების შექმნისგან თავს უნდა იკავებდეს. ეს უნდა ხდებოდეს მხოლოდ ისეთ დროს, როდესაც საწარმოს შექმნა გარკვეული მიზეზით აუცილებელია და ამ საქმის განმხორციელებელი კერძო სტრუქტურა არ ჩანს. კომერციული ინტერესებითვის სახელმწიფო ფულს არ უნდა ხარჯავდეს“, - აცხადებს ხმალაძე.

შეგახსენებთ, მთის კურორტების განვითარების კომპანიაში სახელმწიფო შპს შეიქმნება, რომელსაც სოსო ჯაჭვლიანი უხელმძღვანელებს. აღნიშნულის შესახებ დღეს მთავრობის სხდომაზე პრემიერმა გიორგი კვირიკაშვილმა განაცხადა.

დღესვე არასამთავრობო ორგანიზაცია „საერთაშორისო გამჭირვალობა-საქართველომ განცხადება გაავრცელა, სადაც ნათქვამია, რომ სახელმწიფო კომპანიის ხელმძღვანელად დეპუტატ ჯაჭვლიანის წარდგენა, კორუფციის ნიშნებს შეიცავს.