ევროკომისიამ რუსული გაზის ევროკავშირში დაბრუნება უკრაინაში მშვიდობის დამყარების შემდეგაც კი გამორიცხა

2026-10-28 20:24:07, 225 ნახვა

ევროპის ამბები

ევროკომისიამ გამორიცხა ევროკავშირის ქვეყნების მიერ რუსული გაზის შესყიდვების განახლების შესაძლებლობა უკრაინაში სამშვიდობო შეთანხმების მიღწევის შემდეგაც კი.

ევროკომისიის მოქმედი კანონმდებლობა რუსული გაზის თანდათანობით გაუქმებას ითვალისწინებს და ეს გადაწყვეტილება არ არის დამოკიდებული ომის მიმდინარეობაზე ან შესაძლო პოლიტიკურ შეთანხმებებზე, განაცხადა ევროკომისიის პრესსპიკერმა პაულა პინიომ 28 ოქტომბერს ბრიუსელში გამართულ ბრიფინგზე.

„ჩვენ გვაქვს კანონმდებლობა, რომელიც არ იძლევა რუსეთიდან წიაღისეული საწვავის, კერძოდ, გაზის იმპორტის განახლების საშუალებას“, - ხაზგასმით აღნიშნა პინიომ, Nord Stream გაზსადენის შესაძლო განახლების შესახებ დასმულ კითხვაზე პასუხის გაცემისას.

ევროკომისიის ენერგეტიკის კომისარმა ანა-კაისა იტკონენმა გაიხსენა, რომ ევროკავშირმა უკვე მიიღო კანონმდებლობა რუსული მილსადენებით და თხევადი ბუნებრივი აირის იმპორტის თანდათანობითი გაუქმების შესახებ. დამტკიცებული გრაფიკის თანახმად, თხევადი ბუნებრივი აირის მიწოდების სრული აკრძალვა 2027 წლის დასაწყისში ამოქმედდება, ხოლო მილსადენებით გაზის - 2027 წლის შემოდგომაზე.

განცხადება გავრცელდა იმ ინფორმაციის ფონზე, რომ ტრამპის ადმინისტრაციამ შესთავაზა ევროპას რუსული გაზის შესყიდვების განახლება უკრაინაში ომის შესაძლო მოგვარების ფარგლებში. The New York Times-მა ადრე გამოაქვეყნა ინფორმაცია ამ ინიციატივის შესახებ. ევროკომისიამ უარყო რუსეთის ენერგორესურსებზე ასეთი დაბრუნების შესაძლებლობა.

Patreon P მხარი დაუჭირე "ექსპრესნიუსს" →

ავტორი: ელენე გვიმრაძე, ექსპრესნიუსის რეპორტიორი 2018 წლიდან