პარლამენტის თავმჯდომარემ, სახელმწიფო საკონსტიტუციო კომისიის ხელმძღვანელმა ირაკლი კობახიძემ,  საყოველთაო-სახალხო განხილვის საორგანიზაციო კომისიის მუშაობის წესზე  განმარტებები გააკეთა.

კობახიძის თქმით, კომისიის შემადგენლობაში მყოფ თითოეულ სუბიექტს,  თავისი წევრის ჩანაცვლების საშუალება ექნება.

„თითოეულ სუბიექტს ექნება შესაძლებლობა, ჩაანაცვლოს თავისი წევრები. ეს კომისია იქნება დამგეგმავი კომისია. ყველა ერთად დავგეგმავთ გრაფიკს, რის შესაბამისადაც დაიწყება საყოველთაო-სახალხო განხილვა. თითოეულ სუბიექტს ექნება თავისი წევრის ჩანაცვლების საშუალება.  კომისიის ეს შემადგენლობა  არ ნიშნავს იმას, რომ  მხოლოდ ისინი ივლიან საყოველთაო-სახალხო განხილვაზე. მაგალითად, საპარლამენტო უმცირესობას ექნება საშუალება, ბატონი ზურაბისა და ბატონი სერგის ნაცვლად, წარაგზავნოს სხვა წევრები საყოველთაო სახალხო განხილვაზე. იგივე ეხება „საქართველოს პატრიოტებს“, იგივე ეხება უმრავლესობას, იგივე ეხება ექსპერტთა წრეს. არასამთავრობო ორგანიზაციების შემთხვევაშიც იქნება როტაციის შესაძლებლობა“,-განმარტა ირაკლი კობახიძემ.

რაც შეეხება უშუალოდ  საყოველთაო-სახალხო განხილვას,  კობახიძის განცხადებით, საზოგადოებისთვის ცვლილებების წარდგენისას, პარიტეტი დაცული იქნება:

 „იქნება პარიტეტი დაცული პარტიული კუთხით, სამი სამზე, ასევე რაც შეეხება ექსპერტებს და არასამთავრობო ორგანიზაციებს, იქნება თქვენი 2 წარმომადგენელი, პატრიოტების წარმომადგენელი და უმრავლესობიდან ჩემი ჩათვლით  3 წარმომადგენელი. ექსპერტებისა და არასამთავრობო ორგანიზაციების შემთხვევაშიც შეგვიძლია დავიცვათ პარიტეტი, ანუ იყოს ერთი წარმომადგენელი, რომელმაც დაუჭირა მხარი კონსტიტუციურ ცვლილებებს და ერთი, რომელმაც არ დაუჭირა“,-აღნიშნა ირაკლი კობახიძემ.

პარლამენტი დღევანდელ პლენარულ სხდომაზე განიხილავს პარლამენტის დადგენილების პროექტს „საქართველოს კონსტიტუციაში ცვლილებების შეტანის შესახებ“ საქართველოს კონსტიტუციური კანონის პროექტისა და „აჭარის ავტონომიური რესპუბლიკის შესახებ“ საქართველოს კონსტიტუციური კანონის პროექტის გამოქვეყნებისა და მათი საყოველთაო-სახალხო განხილვის საორგანიზაციო კომისიის შექმნის თაობაზე“.

მომხსენებელი სახელმწიფო საკონსტიტუციო კომისიის თავმჯდომარე, პარლამენტის სპიკერი ირაკლი კობახიძეა.

დადგენილების პროექტის თანახმად, კონსტიტუციური ცვლილებების პროექტის საყოველთაო-სახალხო განხილვის  საორგანიზაციო კომისია 9 წევრისგან შედგება. კომისიას პარლამენტის თავმჯდომარე ირაკლი კობახიძე უხელმძღვანელებს. კომისიის შემადგენლობაში იქნებიან: პარლამენტის თავმჯდომარის პირველი მოადგილე თამარ ჩუგოშვილი, პარლამენტის თავმჯდომარის მოადგილე ირმა ინაშვილი, პარლამენტის თავმჯდომარის მოადგილე სერგი კაპანაძე, პარლამენტის წევრი ზურაბ ჭიაბერაშვილი, ექსპერტი ვასილ გონაშვილი, ექსპერტი თენგიზ შარმანაშვილი, „საერთაშორისო გამჭვირვალობა-საქართველოს“ აღმასრულებელი დირექტორი ეკა გიგიაური და პარლამენტის თავმჯდომარი კაბინეტის მთავარი სპეციალისტი თორნიკე ჭეიშვილი.

„ნაციონალურმა მოძრაობამ“ კომისიის მუშაობაში მონაწილეობაზე უარი განაცხადა, რის გამოც არ არის შესაბამისი წევრი წარმოდგენილი დადგენილების პროექტში.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რომელ ქუჩებზე დაწესდება შეზღუდვები თბილისში 12-13 აპრილს - თბილისის მერია

CBS News: აშშ გაყინული ირანული აქტივების განბლოკვას არ დათანხმებულა

ოცნების განათლების სამინისტრო: გივი მიქანაძე სამუშაო ვიზიტით აშშ-ში გაემგზავრა

უკრაინამ რუსეთის ტყვეობიდან 182 ადამიანი დაიბრუნა