რომან კაკულია - დეპუტატებს მოვუწოდებ, ვიდრე „თიბისის“ საქმე ბოლომდე არ გაირკვევა, ნეიტრალიტეტი შეინარჩუნონ

2019-03-04 18:40:27, 1439 ნახვა

კომენტარი

დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დეპუტატებს მოუწოდებს, ვიდრე „თიბისის“ საქმე ბოლომდე არ გაირკვევა, ნეიტრალიტეტი შეინარჩუნონ.

მისივე თქმით, ერთი მხარის მოსმენა ყოველთვის მნიშვნელოვანია, მაგრამ საბოლოო დასკვნისთვის ეს საკმარისი არ არის.

„ამ პროცესში ნეიტრალურები უნდა ვიყოთ და ჩვენ სწორი პროცესი უზრუნველვყოთ. სწორ პროცესში, რა თქმა უნდა, შეკითხვები უნდა დასმულიყო. ახლა ჩვენ ამასთან დაკავშირებით ეროვნული ბანკის პოზიციის გამოხატვას ველოდებით. ფორმატზეც შეიძლება შევთანხმდეთ. მნიშვნელოვანია, რომ პირველ რიგში, დეპუტატებმა გაიგონ, როგორია ეროვნული ბანკის პასუხები. აქ სხვა მნიშვნელოვანი თემებიც გაჟღერდა. უკვე ამას პოლიტიკური დატვირთვა შეძენილი აქვს, ეს ვინმეს მოსწონს, თუ არა. აქედან გამოსვლა უმტკივნეულოდ და სწორად მხოლოდ იმ შემთხვევაში შეიძლება, როდესაც ყველა დასმულ შეკითხვაზე პასუხი არსებობს.

როგორც წესი, ერთი მხარის მოსმენა ყოველთვის მნიშვნელოვანია, მაგრამ საბოლოო დასკვნისთვის ეს საკმარისი არ არის. მნიშვნელოვანია, რომ მათ მიეცათ საშუალება ყველა თავიანთი მოსაზრება გამოეთქვათ. ახლა ეროვნული ბანკის რეაქციას დაველოდოთ. ასევე გამოხმაურებას პროკურატურის მხრიდან. ჩვენ დასკვნების გამოტანა არ უნდა ვიჩქაროთ. მათ საშუალება მივცეთ, აღნიშნულ შეკითხვებთან დაკავშირებით განცხადებები ისეთ ფორმატში გააკეთონ, რომელიც სიტუაციას არ დააზარალებს. ძალიან მნიშვნელოვანია, რომ პარლამენტში ვინმე მხარედ არ გამოჩნდეს. კოლეგებს მოვუწოდებ, ვიდრე ეს საქმე ბოლომდე მიყვანილი არ იქნება, ნეიტრალურობა შეინარჩუნონ“,- განაცხადა კაკულიამ.

შეგახსენებთ, პარლამენტში გამართლ სხდომაზე თიბისის დამფუძნებელმა მამუკა ხაზარაძემ განაცხადა, რომ შინაგან საქმეთა მინისტრ გიორგი გახარიასგან მუქარის შემცველი წერილი მიიღო. ხაზარაძის განცხადებას მოგვიანებით შს მინისტრი გამოეხმაურა და მას „პრივილეგირებული ბიზნესმენის მიერ ჭორაობით იმუნიტეტის მოპოვების მცდელობა“ უწოდა.