თბილისში, მეტროსადგურ "ვარკეთილში" ჭერის ჩამონგრევის საქმეზე 3 პირს ბრალი წარედგინა, - ამის შესახებ პროკურატურის მიერ გავრცელებულ განცხადებაშია ნათქვამი. 

უწყების ცნობით, ბრალი შპს „გეომეფის" აღმასრულებელ დირექტორს,  შპს „ყვარელრემმშენის" მენეჯერს და შპს „ყვარელრემმშენის" მთავარ ინჟინერს წარუდგინეს. 

"საქართველოს პროკურატურამ, მეტროსადგურ „ვარკეთილში" განხორციელებული უხარისხო სარემონტო სამუშაოების შესრულების საქმეზე, შს სამინისტროში მიმდინარე გამოძიების ფარგლებში  გულგრილობის, უსაფრთხოების მოთხოვნებთან შეუსაბამო, უხარისხო სამუშაოს შესრულების და ყალბი ოფიციალური დოკუმენტის დამზადება -  გამოყენების ფაქტზე  შპს „გეომეფის" აღმასრულებელ დირექტორს,  შპს „ყვარელრემმშენის" მენეჯერს და შპს „ყვარელრემმშენის" მთავარ ინჟინერს  ბრალდება წარუდგინა. გამოძიებით დადგინდა, რომ 2015 წლის 13 ოქტომბერს, მეტროსადგურ „ვარკეთილის" სარემონტო-სარეაბილიტაციო სამუშაოების პროექტის მომზადების მიზნით, შპს „თბილისის სატრანსპორტო კომპანიის" მიერ, გამოცხადებულ ელექტრონულ ტენდერში გამარჯვებული კომპანიის შპს „გეომეფის" აღმასრულებელმა დირექტორმა  გ.კ.-მ ტენდერში მისი კომპანიის მონაწილეობის მიღების  და მატერიალური სარგებლის მიღების მიზნით, შპს „თბილისის სატრანსპორტო კომპანიაში" წარადგინა მის მიერვე გაყალბებული და სარემონტო სამუშაოების უხარისხო  პროექტი.  აღნიშნული პროექტით გათვალისწინებული სარემონტო-სარეაბილიტაციო სამუშაოების შესრულებისთვის, შპს „თბილისის სატრანსპორტო კომპანიის" მიერ 2016 წლის 28 სექტემბერს, გამოცხადებულ ელექტრონულ ტენდერში  შპს ,,ყვარელრემმშენმა" გაიმარჯვა და მეტროსადგურ „ვარკეთილის" სარემონტო-სარეაბილიტაციო სამუშაოების შესრულება განახორციელა.  სარეაბილიტაციო სამუშაოების წარმოების პროცესში, შპს „გეომეფს" წარმოეშვა ვალდებულება, შეემოწმებინა მეტროსადგურ „ვარკეთილის" ქვედა ვესტიბიულში ჭერზე არსებული ანკერების მზიდუნარიანობა და გაეცა შესაბამისი საექსპერტო დასკვნა. აღნიშნულის გამო, სარეაბილიტაციო სამუშაოები დროებით შეჩერდა. 2017 წლის 19 აპრილს, გ.კ.-მ ყალბი კონსტრუქციული დასკვნა შეადგინა, რომელსაც პროექტის კონსტრუქტორის ნაცვლად,  თვითონ მოაწერა ხელი, შემდეგ კი აღნიშნული დასკვნა  „თბილისის სარტრანსპორტო კომპანიის" სამშენებლო სამსახურში წარადგინა. აღნიშნულის საფუძველზე, შპს „ყვარელრემმშენმა'' განაახლა სამუშაოების შესრულება.  შპს „გეომეფის" ხელმძღვანელმა გ.კ.-მ, ხელშეკრულებით დაკისრებული ვალდებულებების მიუხედავად,  არაჯეროვნად შეასრულა თავისი სამსახურებრივი მოვალეობა და არ გაუწია პროექტს სათანადო საავტორო ზედამხედველობა. მის მიერვე შედგა მომხმარებლის სიცოცხლის და ჯანმრთელობის უსაფრთხოების მოთხოვნებთან შეუსაბამო სარემონტო-სარეაბილიტაციო დაგეგმარების პროექტი და ასევე კონსტრუქციული დასკვნა, სადაც არ იქნა გათვალისწინებული ჭერზე უარყოფითი ფაქტორებით გამოწვეული დამატებითი დატვირთვები - მატარებლის მოძრაობით, სავენტილაციო ჰაერის მიმოქცევით გამოწვეული ქარის წნევა და სხვა. გამოძიებით ასევე დადგინდა, რომ  შპს „ყვარელრემმშენის" მენეჯერმა გ.რ.-მ არაჯეროვნად შეასრულა სამსახურებრივი მოვალეობა და არ აწარმოა შესრულებული სამუშაოების ხარისხის კონტროლი. ამავდროულად გ.რ.-ს და შპს „ყვარელრემმშენის" მთავარი ინჟინრის ზ.ყ-ს მონაწილეობით და პასუხისმგებლობით, მეტროსადგურ „ვარკეთილში", შეკიდული ჭერის მოწყობითი სამუშაოები შპს ,,ყვარელრემმშენის" მიერ განხორციელდა პროექტის გარეშე და ამავედროს უხარისხოდ, რის გამოც, 2018 წლის 30 იანვარს, დილით, ქ.თბილისში, მეტროსადგურ „ვარკეთილის" ქვედა ვესტიბიულში ჭერი ჩამოინგრა და  მეტროს ვესტიბიულში მყოფ 18 მოქალაქეს დაეცა, რომელთაგანაც ჯანმრთელობის დაზიანება 11 პირს მიადგა, ხოლო სახელმწიფომ მიიღო მატერიალური ზიანი. გ.კ.-ს ბრალდება საქართველოს სისხლის სამართლის კოდექსის 362-ე მუხლის მე-2 ნაწილის „ბ" ქვეპუნქტით, (ორი ეპიზოდი) 2201-ე მუხლის მე-2 ნაწილითა და 251-ე მუხლის მე-2  ნაწილით, გ.რ.-ს 2201-ე  მუხლის მე-2 ნაწილით და 251-ე მუხლის მე-2 ნაწილით  ხოლო ზ. ყ.-ს  251-ე მუხლის მე-2 ნაწილით, (2201 -  გულგრილობა, ესე იგი ორგანიზაციაში ხელმძღვანელობითი უფლებამოსილების მქონე პირის მიერ თავის სამსახურებრივი მოვალეობის არაჯეროვნად შესრულება მისდამი დაუდევარი დამოკიდებულების გამო, რამაც გამოიწვია მძიმე შედეგი. 251 - უსაფრთხოების მოთხოვნებთან შეუსაბამო, უხარისხო სამუშაოს შესრულება, რაც არ შეესაბამება მომხმარებლის სიცოცხლის და ჯანმრთელობის უსაფრთხოების მოთხოვნებს, რამაც ადამიანების ჯანმრთელობის დაზიანება გამოიწვია. 362 - ყალბი ოფიციალური დოკუმენტის დამზადება და გამოყენება, რამაც მნიშვნელოვანი ზიანი გამოიწვია) წარედგინა", - ნათქვამია პროკურატურის ინფორმაციაში. 

უწყებამ ბრალდებულებისთვის აღკვეთი ღონისძიების სახით, თითოეულისთვის 50 000 ლარის ოდენობით გირაოს შეფარდების შუამდგომლობით სასამართლოს უკვე მიმართა.

სისხლის სამართლის საქმეზე გამოძიება გრძელდება. ბრალდებულებისთვის წარდგენილი ბრალდება სასჯელის სახედ და ზომად ორიდან ხუთ წლამდე თავისუფლების აღკვეთას ითვალისწინებს.

ამასთანავე, მოცემული სისხლის სამართლის საქმიდან ცალკე წარმოებად გამოყოფილია სისხლის სამართლის საქმე, შპს „თბილისის სატრანსპორტო კომპანიის" თანამშრომელთა მხრიდან სამსახურეობრივი გულგრილობის ფაქტზე,  საქართველოს სისხლის სამართლის კოდექსის 342-ე მუხლის პირველი ნაწილით.

შეგახსენებთ, 30 იანვარს მეტროსადგურ „ვარკეთილში“ ჭერის კონსტრუქციის ჩამონგრევის შედეგად 14  ადამიანი დაშავდა, მათ შორის ერთი პოლიციელი. მომხდართან დაკავშირებით, გამოძიება სსკ-ის 240-ე მუხლით მიმდინარეობს (უსაფრთხოების წესის დარღვევა სამთო, სამშენებლო ან სხვა სამუშაოს წარმოებისას, რამაც გამოიწვია ჯანმრთელობის ნაკლებად მძიმე ან მძიმე დაზიანება).

ცნობისთვის, მეტროსადგურ „ვარკეთილში“სარეაბილიტაციო სამუშაოები 2017 წლის სექტემბერში დასრულდა. თბილისის მერიის ვებგვერდზე განთავსებული ინფორმაციით თანახმად, „ვარკეთილის“ სადგურის სარემონტო სამუშაოები, მეტროსადგურების რეაბილიტაციის პროექტის მიხედვით, 2016 წლის ბოლოს დაიწყო. სამუშაოების ფარგლებში მეტრო „ვარკეთილში“ სადგურის ქვედა და ზედა ვესტიბიულების ინტერიერი განახლდა, გარემონტდა დახრილი გვირაბი, გაიწმინდა იატაკის გრანიტი და მარმარილო. სადგურებში დამონტაჟდა ახალი საოპერატორო ჯიხურები და ტურნიკეტები, მოეწყო მეტროს ნავიგაციის თანამედროვე სისტემა. სამშენებლო სამუშაოები ტენდერში გამარჯვებულმა შპს „ყვარელრემმშენმა“ ჩაატარა. ამასთან, სატენდერო პირობების თანახმად, შესყიდვის სავარაუდო ღირებულება 396 600 ლარი, კომპანიის მიერ შეთავაზებული თანხა კი 347 852 ლარი იყო.

ავტორი: ,

სოციალური ქსელები

ათობით ადამიანი დაშავდა, საცხოვრებელი შენობა განადგურდა დნეპრზე მომხდარი დარტყმის შემდეგ

შანხაი-თბილისის მიმართულებით პირდაპირი ფრენები იწყება

ნატო უარყოფს ესპანეთის წევრობის შეჩერებას აშშ-ის მუქარის შემდეგ

რუსმა მდიდარმა პირებმა ახალ ზელანდიაში ბუნკერების ყიდვა დაიწყეს