თავდაცვის სამინისტროში ოთხ წამყვან თანამდებობაზე ვაკანტური ადგილები გამოცხადდა

2015-09-04 16:43:57, 369 ნახვა

პოლიტიკა

საქართველოს თავდაცვის სამინისტროში ოთხ წამყვან თანამდებობაზე ვაკანტური ადგილები გამოცხადდა.
როგორც უწყებაში დღეს გამართულ ბრიფინგზე გახდა ცნობილი, ვაკანსია შემდეგ პოზიციებზეა გამოცხადებული: გიორგი აბრამიშვილის სახელობის გორის ჰოსპიტალის დირექტორის თანამდებობაზე, ამავე ჰოსპიტალის დირექტორის მოადგილე ეკონომიკურ დარგში, საერთაშორისო ურთიერთობათა და ევროინტეგრაციის დეპარტამენტის ხელმძღვანელი და ასევე პროტოკოლის სამსახურის უფროსი.
როგორც დღევანდელ ბრიფინგზე თავდაცვის მინისტრის მოადგილემ ანა დოლიძემ აღნიშნა, სამინისტროს მოტივაციაა ხარისხის, გამჭვირვალობის და სამართლიანობის ამაღლება.
„გვინდა ახალი შტატების მიღებით ხარისხი, გამჭვირვალობა და სამართლიანობა ავამაღლოთ თავდაცვის სამინისტროში. სამინისტროს მოტივაციაა გავზარდოთ ხელმისაწვდომობა ვაკანსიებზე, რომელიც დღეს არის გამოცხადებული. გვინდა გარანტია მივცეთ საქართველოს მოსახლეობას, ახალგაზრდა პროფესიონალებს, რომ კონკურსში მონაწილეობის მიღების პროცესი იქნება სამართლიანი. გამომდინარე იქიდან, რომ სამინისტრო თავად არის დაინტერესებული მოიზიდოს უკეთესი ადამიანური რესურსი. შესაბამისად, გვინდა ხელი გავუწოდოთ მათ და მივცეთ გარანტია, რომ ჩვენი კარი ღიაა კონკურსებში მონაწილეობის მისაღებად“,-განაცხადა ანა დოლიძემ.
ამასთან, ანა დოლიძის განცხადებით, თავდაცვის სამინისტროში კიდევ გამოცხადდება ბევრი ვაკანსია და მათ შორის სამხედრო პოლიციაში.
საქართველოს თავდაცვის სამინისტროში გამოცახდებული ვაკანსიების შესახებ დეტალური ინფორმაცია განთავსებულია ვებგვერდ hr.gov.ge-ზე.