ადმინისტრაციულ სამართალდარღვევაზე მზია ამაღლობელის განაჩენი 18 მარტს გამოცხადდება
ადმინისტრაციულ სამართალდარღვევაზე მზია ამაღლობელის საქმის გადაწყვეტილებას მოსამართლე 18 მარტს, 17:50 საათზე გამოაცხადებს.
ბათუმის საქალაქო სასამართლოში, ბათუმელებისა და ნეტგაზეთის დაკავებული დამფუძნებლის, მზია ამაღლობელის ადმინისტრაციული საქმის განხილვა გაიმართა- პროცესს ნორვეგიისა და დანიის საელჩოების წარმომადგენლები ესწრებოდნენ, სხდომას დისტანციურად ჩაერთო დაკავებული ჟურნალისტი.
მზია ამაღლობელმა სასამართლოზე სიტყვით გამოსვლისას თქვა, რომ მისი საქმე გაყალბებულია.
"საქმე, რომელსაც განიხილავთ, გაყალბებულია, საქმეში არის ცრუ ჩვენებები და ოქმიც არის გაყალბებული. ამ საქმეში რეალობა არის მხოლოდ ის, რომ სტიკერი ნამდვილად გავაკარი, სრულიად გააზრებულად, რაც იყო იმ უკანონო დაკავებების მიმართ პროტესტის გამოხატვა, რომელიც 11 იანვარს, ჩემს მისვლამდე განხორციელდა ბათუმის სამმართველოს შენობის წინ. [...]
კანონსაწინააღმდეგო მოქმედებები არ ჩამიდენია, არც მოწოდებებს ადგილი არ ჰქონია. ასევე იყო საუბარი იმაზე, რომ პოლიციის თანამშრომლებს აყენებდა სიტყვიერ შეურაცხყოფასო. ესეც სიცრუეა. ძალიან ბევრი კამერა მუშაობდა და უბრალოდ ვერ ნახავენ კადრს ან ადამიანს, თუ არ ჩავთვლით ამ ცრუ ჩვენებებს, რაც საქმეში წავიკითხეთ, რომ ამ სიტყვებს გამოვიყენებდი მე. ზოგადად, არც დახურულ სივრცეში და არც საჯაროდ სიტყვიერი შეურაცხყოფა არავისთვის მიმიყენებია" - თქვა მზია ამაღლობელმა სასამართლო პროცესზე ჩართვისას.
დღევანდელ სხდომაზე გამოიკითხა ბათუმის პოლიციის უფროსის, ირაკლი დგებუაძის მოადგილე გოჩა ვანაძე, რომლის განცხადებითაც, მზია ამაღლობელი მან დააკავა - "მზია ამაღლობელის ფაქტობრივი დამკავებელი ვარ მე, მისი დაკავების გადაწყევტილება ერთპიროვნულად მე მივიღე".
მისი განცხადებით, მზია ამაღლობელი ხელს უშლიდა სხვა პირების დაკავებაში და სიტყვიერ შეურაცხყოფას აყენებდა პოლიციელებს. მოსამართლის ჩაკითხვაზე, რაში გამოიხატებოდა სიტყვიერი შეურაცხყოფა. ვანაძემ უპასუხა: "ამ აქციებიდან გამომდინარე ძირითადად ლოზუნგად ქცეული შეურაცხმყოფელი სიტყვა: რუსეთი მონები, რუსის მონა, ძაღლები და სხვადასხვა შეურაცხმყოფელი სიტყვებით მოგვიხსენიებდნენ".
ვანაძის თქმით, მზია ამაღლობელი დააკავეს "პოლიციის წინააღმდეგობის ფაქტზე და ეს დაკავება ემსახურებოდა პრევენციას".
ასევე გამოიკითხა 2 პოლიციელი და დაცვის მხარის სხვა მოწმეები. მოსამართლემ არ დააკმაყოფილა ბათუმის პოლიციის უფროსის ირაკლი დგებუაძისა და აჭარის პოლიციის უფროსის გრიგოლ ბესელიას გამოკითხვის მოთხოვნა.
მზია ამაღლობელს, რომელიც სისხლის სამართლის წესითაა დაკავებული, ადმინისტრაციულ სამართალდარღვევასაც ედავებიან. კერძოდ, პროკურატურის მტკიცებით, მზია ამაღლობელმა პოლიციელს სიტყვიერი შეურაცხყოფა მიაყენა. დაცვის მხარის განცხადებით, მზია ამაღლობელის დაკავების ოქმი გაყალბებულია, რადგან ის 11 იანვარს, ბათუმის პოლიციის შენობაზე სტიკერის გაკვრის გამო დააკავეს.
epn.ge (@expressnews.ge)
