საქართველოს პრეზიდენტი გიორგი მარგველაშვილი  დღეს ვაზიანში სტუდენტებს შეხვდა და კამპანია „შენი ხმა ჩვენი მომავალია" შეაჯამა.

პრეზიდენტის ადმინისტრაციის პრესსამსახურის ინფორმაციით,  მარგველაშვილმა სხვადასხვა სასწავლებლის 300-მდე სტუდენტისათვის საჯარო ლექცია წაიკითხა.

მათივე ცნობით, მარგველაშვილმა  არჩევნების მნიშვნელობაზე, საქართველოს გაერთიანებისა და გაძლიერების ხედვების ერთიანობის აუცილებლობაზე და ამომრჩეველთა აქტივობის მნიშვნელობაზე ისაუბრა.

„დღეს არის დასკვნითი შეხვედრა იმ მნიშვნელოვანი კამპანიისა, რომელმაც მოიცვა მთელი ქვეყანა, რომელშიც ჩაერთო ასობით ახალგაზრდა და რომლის ფარგლებშიც ათიათასობით ჩვენს მოქალაქეს მივაწვდინეთ ხმა. კამპანიის არსი და შინაარსი მდგომარეობდა შემდეგში, რომ ჩვენ ყველამ უმნიშვნელოვანეს ღონისძიებაში - არჩევნებში მივიღოთ მონაწილეობა. ჩემთვის განსაკუთრებით ამაღელვებელია, რომ ჩვენ ყველა მტკიცედ ვიტყვით, რომ 8 ოქტომბერი იქნება მომავალი წინგადადგმული ნაბიჯი ჩვენი ქვეყნის სტაბილურობისა და სუვერენიტეტის თვალსაზრისით", - განაცხადა პრეზიდენტმა.

გიორგი მარგველაშვილმა საქართველოს დამოუკიდებლობის 25 წლიან პერიოდში, საზოგადოების წინაშე მდგარ ამოცანებზე და ქვეყნის განვითარების მიმართულებებზე ისაუბრა.

„25 წლის წინ ჩვენ მოვიპოვეთ დამოუკიდებლობა და იმ მომენტიდან დაიწყო მუშაობა ქართული სახელმწიფოს მშენებლობისათვის და  თავისუფლების მისაღწევად. ამ  25 წლის მანძილზე ჩვენ ბევრი გამარჯვება გვქონდა, მაგრამ ამავე დროს გვქონდა ძალიან სერიოზული დარტყმები. დარტყმები, რომლებიც ჩვენ, როგორც საზოგადოებამ გადავიტანეთ და დღესაც მიუხედავად იმისა, რომ ჩვენ ვართ ოკუპირებული, ქართული საზოგადოება აჩვენებს, რომ ეს არის ერთერთი ყველაზე ძლიერი და პროგრესულად განვითარებადი ქვეყანა და ერთგულნი ვართ იმ ღირებულებებისადმი, რომელიც 25 წლის წინ დავისახეთ - რასაც ჰქვია ევროულ და ევროატლანტიკურ სივრცეში ძლიერი, დამოუკიდებელი სახელმწიფოს შექმნა. ყველაზე მძიმე, რაც ჩვენ განვიცადეთ ეს არის ის ომები, რომელმაც დაგვაზარალა ძალიან ბევრი მიმართულებით. ეს არის ჩვენი ოკუპირებული ტერიტორიები, ის გახლეჩილი ქვეყანა, რომლის ტერიტორიაზეც დგას მეზობელი, ძალიან ძლიერი ბირთვული სახელმწიფოს ჯარები. ეს არ იყო ომები მარტო აფხაზეთის ტერიტორიაზე,  ცხინვალის რეგიონში სამხრეთ ოსეთში, არამედ ეს იყო ომი, რომელიც მიმდინარეობდა მთელ ტერიტორიაზე, ომი რომელიც მიმდინარეობდა თბილისში, ომი რომელიც გამოიხატებოდა ერთმანეთის გაწირვაში. ეს სირთულეები ჩვენ გადავლახეთ, დღეს ჩამოყალიბდა და ყალიბდება ძალიან სწორი ხედვა  იმ უმნიშვნელოვანეს საკითხთან დაკავშირებით, რასაც ჰქვია ქვეყნის თავდაცვისუნარიანობა და მე მიხარია, რომ არა ერთი ახალგაზრდა თავისი პატრიოტული მოტივაციით თავის თავს სწორედ ამ მიმართულებით, ქვეყნის თავდაცვისუნარიანობის გაძლიერების მიმართულებით ხედავს. იმისთვის, რომ ჩვენ დავიბრუნოთ ჩვენი ოკუპირებული ტერიტორიები, საზოგადოება უნდა გაერთიანდეს  ამ ღირებულების ირგვლივ. ჩვენ უნდა გვქონდეს ყველას ერთიანი ხედვა იმისა, როგორ, რა საშუალებით, რა გზით ვაძლიერებთ ჩვენი ქვეყნის თავდაცვისუნარიანობას და როგორ ვიბრუნებთ იმას, რისი წართმევაც არის ისტორიული უსამართლობა, საერთაშორისო კანონმდებლობის სრული დარღვევა და სამხედრო თვალსაზრისითაც კი აბსურდი, იმიტომ რომ ჩვენი ქვეყნის ოკუპაციაში ვერავინ გახდა მოგებული, არიან მხოლოდ წაგებული მხარეები",  - განაცხადა პრეზიდენტმა. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ევროკომისიამ უარყო მერცის წინადადება ირანის წინააღმდეგ სანქციების შემსუბუქების შესახებ

მერცი ვარაუდობს, რომ უკრაინის ევროკავშირში გაწევრიანება შესაძლოა ტერიტორიულ დათმობებზე იყოს დამოკიდებული

პუტინმა მოუწოდა დეპუტატებს, „არ მიეჯაჭვონ აკრძალვებს“ მას შემდეგ, რაც მისი რეიტინგი ყველაზე მეტად შემცირდა

გია ვოლსკი: ევროკავშირის ელჩი კარგი ადამიანია, რომელიც ინსტრუქციების შესაბამისად მოქმედებს