ბერლინში, თბილისში სტიქიით დაზარალებულთა დასახმარებლად საქველმოქმედო კონცერტი გაიმართა

2015-07-12 19:21:34, 572 ნახვა

საზოგადოება

ბერლინში, საქართველოს საელჩოს ინიციატივითა და გერმანულ მხარესთან თანამშრომლობით, საოპეროხელოვნების ქართველი ვარსკვლავების მონაწილეობით, ბერლინის ცნობილ ეკლესიაში Passionskirche, კლასიკური მუსიკის საქველმოქმედო კონცერტი გაიმართა.

საგარეო საქმეთა სამინისტროს ინფორმაციით, კონცერტიდან შემოსული თანხა 13 ივნისის თბილისის სტიქიის დახმარების ფონდში გადაირიცხება.

საქველმოქმედო კონცერტში მონაწილეობენ ქართველი შემსრულებლები: გიორგი გაგნიძე, ნინო სურგულაძე, ნიკოლოზ რაჭველი, დუდანა მაზმანიშვილი.

კონცერტზე შესრულდა არიები კლასიკური საოპერო ნაწარმოებებიდან. დამსწრე საზოგადოებას მისასალმებელი სიტყვით მიმართა საქართველოს ელჩმა გერმანიაში ლადო ჭანტურიამ.

მან კონცერტის მონაწილეებს მადლობა გადაუხადა თბილისის სტიქიის შედეგად დაზარალებულთა სოლიდარობისთვის. კონცერტის დასასრულს სცენაზე ცნობილი ქართველი საოპერო მომღერალი პაატა ბურჭულაძე ავიდა, რომელიც ასევე მიესალმა ღონისძიების მონაწილეებს.

საქველმოქმედო კონცერტს ესწრებოდნენ ბერლინში მოქმედი დიპლომატიური კორპუსის წარმომადგენლები, ბერლინის საგარეო საქმეთა სამინისტროს, კულტურის სამინისტროსა და კანცლერის ოფისის წარმომადგენლები, ასევე საქართველოს გერმანელი მეგობრები და ქართული დიასპორის წევრები.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან