დღეს ხელვაჩაურის მუნიციპალიტეტში მთავრობის მორიგი გასვლითი სხდომა გაიმართა. სხდომა გამორჩეული იყო თავისი ფორმატით და მას მუნიციპალიტეტის წარმატებული ახალგაზრდები ესწრებოდნენ.

მთავრობის თავმჯდომარემ ისაუბრა საჯარო და კერძო ინტერესების დაცვაზე, ეკონომიკურ აქტივობებზე და ანტიკორუფციული პოლიტიკის გაძლიერებაზე რეგიონში. „ჩვენთვის მნიშვნელოვანია, რომ მაქსიმალურად სამართლიანი თამაშის წესებით ბიზნესთან ვიყოთ ძალიან გამჭვირვალე. ამავე დროს საჯარო ინტერესების მაქსიმალური გათვალისწინებით იქნას მიღებული გადაწყვეტილებები. კიდევ უფრო მეტად უნდა გავაძლიეროთ ანტიკორუფციული პოლიტიკა, შიდა კონტროლი, აუდიტის და მონიტორინგის სამსახურების მუშაობა. ასევე ვაპირებ, რომ უახლოეს დღეებში საკადრო გადაწყვეტილებებით ავსახო მთავრობის შეურიგებელი ბრძოლა კორუფციასთან", - განაცხადა თორნიკე რიჟვაძემ.

სხდომაზე აღინიშნა, რომ ხელვაჩაურში მიმდინარეობს სამრეწველო ზონის დაგეგმარების პროცესი, რაც ხელს შეუწყობს ეკონომიკურ ზრდას მუნიციპალიტეტში. მთავრობის თავმჯდომარის განცხადებით - ,,ინიციატივა დაეხმარება მუნიციპალიტეტს იყოს წარმატებული, შეიქმნას მეტი დოვლათი. წლის ბოლოსთვის გვექნება კონკრეტული გაზომვადი შედეგები, რომელშიც აქტიურად უნდა იყოს ჩართული ხელვაჩაურის მუნიციპალიტეტი და ერთობლივად უნდა შევქმნათ ძალიან წარმატებული ინდუსტრიული ზონა, ყოველივე ეს დაეხმარება მოსახლეობას კიდევ უფრო მეტი სარგებელი მიიღოს".

გაჟღერდა სასიამოვნო სიახლე განათლებისა და მეცნიერების მიმართულებით. უახლოეს დღეებში დასრულდება ბათუმში განათლების ქალაქის მშენებლობისთვის მიწის ნაკვეთის შერჩევის პროცესი. იგეგმება თანამედროვე საგანმანათლებლო ინფრასტრუქტურის შექმნა რაც ხელს შეუწყობს საგანმანათლებლო პროცესის ტექნოლოგიურად გამართულ გარემოში წარმართვას.

ასევე, ბათუმში კავკასიის უნივერსიტეტი განახორციელებს ინვესტიციას. შესაბამისი სამართლებრივი პროცედურების დასრულების შემდეგ ინვესტორი აქტიურად დაიწყებს უნივერსიტეტის, სტუდენტური საცხოვრებლის სამშენებლო სამუშაოებს.

აღინიშნა, რომ უახლოეს მომავალში განხორციელდება მაღალმთიანი აჭარის განვითარებისთვის აუცილებელი დიდი ინფრასტრუქტურული პროექტები. ესენია ხულო-ზარზმის გზა და  გაზიფიცირების მეორე ეტაპი. ძალიან მალე შესაბამისი ზედამხედველი კომპანიები უზრუნველყოფენ გაზიფიცირების პროცესის სწორ, ეფექტურ და დროულ დასრულებას და შედეგად მომავალი წლიდან შიდა დაქსელვითი სამუშაოების საფუძველზე ყველა ოჯახს მაღალმთიან აჭარაში მიეწოდება ბუნებრივი აირი.

მთავრობის სხდომაზე ისაუბრეს სისხლში ტყვიის შემცველობის შემცირებასთან დაკავშირებით. ამ მიმართულებით იგეგმება გარკვეული ღონისძიებების გატარება აჭარის მთავრობის მხრიდან. კერძოდ, შემუშავებულია გეგმა, რომლის თანახმადაც ბავშვებს რომელთაც ტყვიის შემცველობა სისხლში 5 მკგ/დლ-ზე მაღალი დოზით აქვთ, ყველა კვლევის ხარჯს  სახელმწიფო დაფარავს და იმოქმედებს სპეციალური ვაუჩერები.

დღესვე სხდომაზე განიხილეს აჭარის ავტონომიური რესპუბლიკის 2019 წლის რესპუბლიკური ბიუჯეტის პირველი კვარტლის შესრულება.    

(NS)

ავტორი: ექსპრესნიუსი,

სოციალური ქსელები

აშშ-მ ამერიკული ხელოვნური ინტელექტის კოპირებისთვის ჩინეთისა და რუსეთის წინააღმდეგ სანქციების დაწესების განხილვა დაიწყო

აშშ-მ ირანისა და ირანის მხარდამჭერი გემების დევნა დაიწყო

ოცნება მცირე მეღვინეობებისთვის წესებს შეცვლის და ხარისხის კონტროლს გაამკაცრებს

პაპუაშვილი აბასთუმნის ცის დაკეტვაზე - რადიკალური ოპოზიცია ცდილობს, არ დაუშვან სამეცნიერო პოტენციალის ათვისება