მიხეილ ჯანელიძემ და იანოშ ჰერმანმა „აღმოსავლეთ პარტნიორობის“ სამიტის მოლოდინებზე იმსჯელეს

2017-06-21 15:22:04, 1983 ნახვა

პოლიტიკა

საქართველოს საგარეო საქმეთა მინისტრი მიხეილ ჯანელიძე საქართველოში ევროკავშირის წარმომადგენლობის ხელმძღვანელს იანოშ ჰერმანს შეხვდა.

საგარეო უწყების ინფორმაციით, შეხვედრაზე მხარეებმა გაცვალეს მოსაზრებები მიმდინარე წლის 19 ივნისს, ლუქსემბურგში გამართული ,,აღმოსავლეთ პარტნიორობის'' მინისტერიალის თაობაზე; მიმოიხილეს ევროკავშირსა და საქართველოს შორის თანამშრომლობის აქტუალური საკითხები და 24 ნოემბერს, ბრიუსელში დაგეგმილი „აღმოსავლეთ პარტნიორობის" სამიტის მოლოდინებზე იმსჯელეს.

სამინისტროს ცნობით, ორივე მხარე მიესალმა ასოცირების ხელშეკრულების განხორციელების პროცესში საქართველოს მიერ მიღწეულ პროგრესს, განსაკუთრებით აღინიშნა ის ფაქტი, რომ ევროკავშირმა საქართველო დაამატა იმ მესამე ქვეყნების ჩამონათვალს, საიდანაც შესაძლებელია ევროპის ბაზარზე შავი ზღვის თევზისა და თევზის პროდუქტების შეტანა.

ამასთანავე, შეხვედრაზე ელჩმა, საგარეო საქმეთა მინისტრს გადმოსცა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელის, ევროკავშირის ვიცე-პრეზიდენტის ფედერიკა მოგერინის და გარემოს, საზღვაო და თევზჭერის საკითხებში, ევროკომისრის კარმენუ ველას, ა.წ. 5-6 ოქტომბერს, მალტის დედაქალაქ ვალეტაში დაგეგმილი რიგით მეოთხე კონფერენციის „ჩვენი ოკეანის" ერთობლივი მოსაწვევი წერილი.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან