"საქართველოს პატრიოტთა ალიანსის" წევრებმა ნატო-ს სამეკავშირეო ოფისთან აქცია გამართეს.
მათ "სააკაშვილის რეჟიმის მხილების მიმართულებით, ნატო-ს არაეფექტური, უუნარო "მოღვაწეობა" გააპროტესტეს".
გარდა ამისა, ალიანსის წევრებმა სენატორ ჯონ მაკკეინის, კონგრესმენ მაიკლ ტერნერისა და ევროპარლამენტის საგარეო კომიტეტის თავმჯდომარე ელმარ ბროკის მიერ, სააკაშვილთან დაკავშირებით, ინტერპოლისადმი გაგზავნილ განცხადებებზე რეაგირების მოხდენა და წინა ხელისუფლების საქმიანობის თაობაზე, აშშ-ს სენატის, კონგრესისა და ევროპარლამენტის სწორი და ობიექტური ინფორმირება მოითხოვეს.
"კონგრესმენ, ნატოს საპარლამენტო ასამბლეის თავმჯდომარე მაიკლ ტერნერისა და სენატორ ჯონ მაკკეინის წერილები გავრცელდა, რომლითაც ტერნერმა და მაკკეინმა ინტერპოლს,ანუ კრიმინალური პოლიციის საერთაშორისო ორგანიზაციას მიმართეს და სთხოვეს, ინტერპოლმა არ გამოაცხადოს მიხეილ სააკაშვილის საერთაშორისო ძებნა, რადგან საქართველოში კანონის უზენაესობის პრინციპი სისტემურად ირღვევა და ამ პროცესში პოლიტიკური ანგარიშსწორების საფუძველს ედავებიან. ინტერპოლს მსგავსი შინაარსის წერილი ევროპარლამენტის საგარეო კომიტეტის თავმჯდომარე ელმარ ბროკმაც გაუგზავნა.მიგვაჩნია, რომ ეს განცხადებები ქართველი ხალხის პირდაპირი და ღია შეურაცხყოფაა. ამ განცხადებების ლოგიკას თუ მივყვებით, გამოდის, რომ გასული 10 წლის მანძილზე, ჩვენს ქვეყანაში ადგილი არ ჰქონია ადამიანების სიცოცხლის ხელყოფას, ადგილი არ ჰქონია პატიმრების წამებას, ადგილი არ ჰქონია მესაკუთრეებისთვის ქონების წართმევას, მშვიდობიანი მიტინგებისა და მანიფესტაციების სასტიკ დარბევას. ადგილი არ ჰქონია ბიზნესის დატერორებასა და უამრავ სხვა დანაშაულს. გამოდის, რომ ქართველი ხალხი ცილისმწამებელია, როცა სააკაშვილის მმართველობას რეჟიმს უწოდებს და დამნაშავეების დასჯას მოითხოვს. ქართველი ხალხი თავს შეურაცხოფილად გრძნობს. საგარეო საქმეთა სამინისტრო კი, სამარცხვინოდ დუმს. კონგრესმენ ტერნერის, სენატორ მაკკეინისა და ევროპარლამენტარ ბროკის განცხადებები, ამავდროულად, ნიშნავს, რომ საქართველოს სახელმწიფოს შიდა საქმეებსა და ჩვენი სამართალდამცავი სტრუქტურების საქმიანობაში ჩვენი პარტნიორები უხეშად ერევიან. კონგრესმენი ტერნერი, სენატორი მაკკეინი და ევროპარლამენტარი ბროკი ინფორმირებული არიან, რომ გირგვლიანის საქმესთან დაკავშირებით, ევროსასამართლომ გადაწყვეტილება მიიღო. საქართველოს პროკურატურამ სააკაშვილს 4 საქმეზე წაუყენა ბრალი. მათ შორის, ერთი გირგვლიანის საქმეა, რაც სტრასბურგის სასამართლოს გადაწყვეტილებას ეყრდნობა. შესაბამისად, ეს განცხადებები ასევე ნიშნავს საქართველოს მთავარი პროკურატურის, როგორც დამოუკიდებელი უწყების საქმიანობაში უხეშ ჩარევასა და მისი გამოძიების შედეგების უგულებელყოფას. ჩვენ, "საქართველოს პატრიოტები", კიდევ ერთხელ ვაცხადებთ: სააკაშვილის მმართველობის პერიოდში ქვეყანაში ტერორი და ძალადობა მძვინვარებდა, ხოლო ციხეებში პატიმართა წამებას ორგანიზებული ხასიათი ჰქონდა; თვითონ სააკაშვილმა ამას სისტემის კრახი უწოდა. ქართველი ხალხი 2 წლის მანძილზე დამნაშავეთა დასჯას და სამართლიანობის დამკვიდრებას მოითხოვდა და მოითხოვს. ტერნერის, მაკკეინისა და ბროკის განცხადებები ეჭვქვეშ აყენებს ქართველი ხალხის უმთავრეს მოთხოვნას. სამწუხაროა, რომ ინტერპოლისადმი მაკკეინისა და ტერნერის, ასევე ბროკის ამ მიმართვებს, არავითარი რეაქცია არ მოჰყოლია საქართველოს ხელისუფლების, კონკრეტულად, საგარეო საქმეთა სამინისტროს მხრიდან, რომელიც უპირველესად უფლებამოსილი და პასუხისმგებელია, დაიცვას საქართველოს სახელმწიფოებრივი ინტერესები. მივმართავთ საქართველოს საგარეო საქმეთა სამინისტროს, გამოიყენეთ თქვენს ხელთ არსებული ყველა კანონიერი ბერკეტი, უზრუნველყავით აშშ-ს სენატის, კონგრესის, ასევე ევროპარლამენტის სწორი და ობიექტური ინფორმირება, რა ხდებოდა საქართველოში ბოლო 10 წლის მანძილზე. მიაწვდინეთ ჩვენს პარტნიორებს ქართველი ხალხის პროტესტის ხმა. ვსვამთ კითხვას-რატომ არ გაქვთ აქამდე რეაქცია ტერნერისა და მაკკეინის განცხადებებზე?! რატომ არ რეაგირებთ, რატომ არ ასრულებთ თქვენს ვალდებულებას?!",-განაცხადა ირმა ინაშვილმა.
შეგახსენებთ, რომ გუშინ მსგავსი შინაარსის აქცია „საქართველოს პატრიოტთა ალიანსის“ წევრებმა საგარეო საქმეთა სამინისტროსთანაც გამართეს.
ინაშვილი აცხადებს, რომ აქციები არ შეწყდება და პროტესტი გაგრძელდება.
ავტორი: ირაკლი მანაგაძე , ექსპრესნიუსის რეპორტიორი 2009 წლიდან
epn.ge (@expressnews.ge)
