ქართველი დეპუტატები თურქ კოლეგებს მხარდამჭერი განცხადებისთვის მადლობას უხდიან

2016-05-11 21:39:01, 596 ნახვა

პოლიტიკა

საქართველოს პარლამენტის საგარეო ურთიერთობათა კომიტეტის თავმჯდომარე თედო ჯაფარიძე და ევროპასთან ინტეგრაციის კომიტეტის თავმჯდომარე ლევან ბერძენიშვილი, კომიტეტების სახელით ერთობლივ განცხადებას ავრცელებენ.

როგორც განცხადებაშია აღნიშნული, საქართველოს პარლამენტის საგარეო ურთიერთობათა და ევროპასთან ინტეგრაციის კომიტეტები მადლობას უხდიან თურქეთის ეროვნული ასამბლეის საგარეო საქმეთა კომიტეტს, მათ მიერ გაკეთებული მხარდამჭერი განცხადებისთვის, რომლის მიხედვითაც თურქეთის საკანონმდებლო ორგანოს დეპუტატებმა, ნატოს წევრ ქვეყნებს საქართველოს ნატოში ინტეგრაციის მხარდაჭერისკენ მოუწოდეს.

"ექსპრესნიუსი" განცხადებას უცვლელად გთავაზობთ:

”საქართველოს პარლამენტის საგარეო ურთიერთობათა და ევროპასთან ინტეგრაციის კომიტეტების სახელით, მადლობას ვუხდით თურქეთის ეროვნული ასამბლეის საგარეო საქმეთა კომიტეტს და მის წევრებს განცხადებისთვის, რომლითაც მოუწოდეს მოკავშირეებს ვარშავის სამიტზე მხარი დაუჭირონ საქართველოს ნატოში ინტეგრაციას.

ჩვენი ქვეყნის მიერ საგარეო ორიენტირების განმტკიცების ამ მნიშვნელოვან ეტაპზე, უდიდესი როლი ენიჭება თურქეთის, როგორც საქართველოს უახლოესი პარტნიორისა და ნატოს წევრი ქვეყნის მხრიდან გამოხატულ მხარდაჭერას. ეს არის ჩვენს ქვეყნებს შორის არსებული მეგობრობისა და თანამშრომლობის კიდევ ერთი დადასტურება.

საქართველო თავისი დამოუკიდებლობის პირველივე წლებიდანვე გრძნობს თურქეთის მხრიდან მხარდაჭერას, მათ შორის, სამხედრო აღმშენებლობის სფეროში, რაც ხელს უწყობს საქართველოს სამხედრო ძალების ნატოს სტანდარტებთან დაახლოებას. საქართველო-თურქეთის ურთიერთობები სტაბილურობის მაჩვენებელია ჩვენს რეგიონში და არ წარმოადგენს საფრთხეს რომელიმე მესამე მხარისთვის. ჩვენ ასევე, მადლობას ვუხდით ჩვენს კოლეგებს საქართველოს დამოუკიდებლობის, სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის მხარდაჭერისთვის.

განსაკუთრებით გვინდა აღვნიშნოთ, რომ თურქეთის ეროვნული ასამბლეის საგარეო საქმეთა კომიტეტის განცხადება თურქეთის პრეზიდენტის რეჯეფ თაიფ ერდოღანის განცხადებას დაემთხვა, რომლითაც მან ჩრდილო-ატლანტიკური ალიანსის წევრ ქვეყნებს შავ ზღვის რეგიონში კოორდინაციისა და თანამშრომლობის განმტკიცებისკენ მოუწოდა და იმედი გამოთქვა, რომ ამ საკითხში ნატოს მომავალ სამიტზე, კონკრეტული შედეგები იქნება მიღწეული. სწორედ, ასეთი თანამშრომლობა წარმოადგენს საქართველოს სასიცოცხლო ინტერესს.

თურქეთის წვლილი საქართველოს მიერ ნატოსთან დაახლოვების გზაზე ყოველთვის იქნება უდიდესი კონტრიბუცია, როგორც საქართველოს, ასევე თავად ნატოს განმტკიცებისა და გაფართოვების პროცესში”,- ნათქვამია განცხადებაში.