2024-09-25 14:38:07, 393 ნახვა
პოლიტიკა
საქართველოს საგარეო უწყება დავით ზალკალიანის გადადგომის შესახებ ინფორმაციას არ ადასტურებს
საგარეო საქმეთა სამინისტრო ამერიკის შეერთებულ შტატებში საქართველოს ელჩის, დავით ზალკალიანის გადადგომის შესახებ გავრცელებულ ინფორმაციას არ ადასტურებს.
როგორც "ექსპრესნიუსს" დიპლომატიურ უწყებაში განუცხადეს, ინფორმაცია სიმართლეს არ შეესაბამება.
"ინფორმაცია დავით ზალკალიანის გადადგომის შესახებ არ შეესაბამება სიმართლეს",- ამბობენ საგარეო უწყებაში.
ცნობისთვის, დღეს, 25 სექტემბერს "მთავარმა არხმა" გაავრცელა ინფორმაცია, რომლის მიხედვითაც, ამერიკის შეერთებულ შტატებში პრემიერ-მინისტრ ირაკლი კობახიძესა და საქართველოს ელჩ დავით ზალკალიანს შორის კონფლიქტი მოხდა, რის შემდეგაც ელჩმა თანამდებობიდან გადადგომის გადაწყვეტილება მიიღო. ტელეკომპანიის ცნობითვე, კონფლიქტი კობახიძისთვის აშშ-ის ადმინისტრაციასთან შეხვედრების გაუქმებას მოჰყვა.
ავტორი: ექსპრესნიუსი,
epn.ge (@expressnews.ge)
