2021-11-23 10:20:51, 573 ნახვა

---

იუსტიციის მინისტრი - ვიმყოფებოდი გორის ჰოსპიტალში გადაყვანის ღამეს და გავეცანი მდგომარეობას, სადაც იმყოფება პატიმარი

იუსტიციის მინისტრმა მსჯავრდებულ სააკაშვილის ჯანმრთელობის მდგომარეობასა და გორის ჰოსპიტალში არსებულ პირობებზე „იმედის" პირდაპირ ეთერში ისაუბრა. რატი ბრეგაძის თქმით, ის იმყოფებოდა გორის სამხედრო ჰოსპიტალში და  პირადად გაეცნო იქ არსებულ ვითარებას.

„როგორც საზოგადოებისთვის ცნობილია, მიხეილ სააკაშვილი გადაყვანილია საქართველოს თავდაცვის სამინისტროს გიორგი აბრამიშვილის სახელობის სამხედრო ჰოსპიტალში. მე პირადად ვიმყოფებოდი გადაყვანის ღამეს და გავეცანი იმ მდგომარეობას, სადაც იმყოფება პატიმარი. გავესაუბრე ექიმებსაც", – აღნიშნა რატი ბრეგაძემ.

მინისტრმა მადლობა გადაუხადა ყველა იმ უწყებას, რომლებიც მონაწილეობდნენ მსჯავრდებულ სააკაშვილის გორის ჰოსპიტალში გადაყვანის პროცესში:

„მინდა, ვისარგებლო შემთხვევით და მადლობა გადავუხადო, პირველ რიგში, ექიმებს, ასევე, სახელმწიფო უსაფრთხოების სამსახურს, შინაგან საქმეთა სამინისტროს და ჩვენს ყველა ღირსეულ თანამშრომელს, იმისათვის, რომ მთელი ეს გადაყვანის პროცესი წარიმართა წარმატებით და მშვიდობიანად".

იუსტიციის მინისტრის თქმით, მას მუდმივი კომუნიკაცია აქვს სამედიცინო პერსონალთან, რომელიც მსჯავრდებულს მკურნალობს.

„მიმდინარეობს ორი პარალელური პროცესი – შიმშილობის შემდგომი კვების განახლება და სიმპტომატური მკურნალობა. ბოლო ინფორმაციის თანახმად, მისი ჯანმრთელობის მდგომარეობა არის სტაბილური და დამაკმაყოფილებელი", – განაცხადა მინისტრმა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი