2020-09-23 14:02:24, 570 ნახვა

---

პროკურორი - მიხეილ რამიშვილის ტელეფონში აღმოჩნდა მნიშვნელოვანი მტკიცებულებები, მათ შორის, ფურცხვანიძესთან კომუნიკაციის ამსახველი საუბრები

ბაჩალიაშვილის საქმის პროკურორის, დავით გუმბერიძის განცხადებით, საქალაქო სასამართლოში დღეს ბაჩალიაშვილის ოჯახის ადვოკატი ეკა ქობესაშვილი და მიხეილ რამიშვილი დავით ფურცხვანიძესთან მიმართებაში წარმოდგენილ ფოტოსურათებთან დაკავშირებით დაიკითხებიან.

როგორც მან ჟურნალისტებთან საუბრისას აღნიშნა, რამიშვილის ტელეფონში აღმოჩნდა მნიშვნელოვანი მტკიცებულებები. მათ შორის, დავით ფურცხვანიძესთან კომუნიკაციის ამსახველი საუბრები.

„დღევანდელი დაკითხვა დავით ფურცხვანიძესთან მიმართებაში წარმოდგენილ ფოტოსურათებს შეეხება. მიხეილ რამიშვილთან კითხვები გვექნება იმ მნიშვნელოვან ინფორმაციასთან დაკავშირებით, რაც მის მობილურ ტელეფონში აღმოჩნდა.

ბატონმა მიხეილ რამიშვილმა ფოტოსურათები წარმოგვიდგინა და მისი საქმეზე, როგორც მტკიცებულების დართვა მოითხოვა. ის არ გახლავთ ჟურნალისტი, მედიის წარმომადგენელი, მან როგორც ადვოკატმა მოიტანა ფოტოსურათები და ჩვენგან მოითხოვა მოცემულობად მიგვეღო და გარემოება შეგვესწავლა, რადგან ამ ორი ფოტოსურათით დასტურდებოდა, რომ თამარ ბაჩალიაშვილის ავტომანქანა 2020 წლის 19 ივლისს, მაწევანის ტერიტორიაზე არ იმყოფებოდა.

არ მინდა შევაფასო, რომ გარკვეულწილად ცდილობენ პასუხისმგებლობას გაექცნენ, რადგან ამ საქმეში ჯერჯერობით პასუხისმგებლობის საკითხს, თუნდაც მიხეილ რამიშვილის მიმართ, მიმდინარე გამოძიების მიხედვით არ განვიხილავთ. საქმესთან მიმართებაში ყველა საგამოძიებო მოქმედებას ვატარებთ. იმ შემთხვევაში, თუ რომელიმე პირის პასუხისმგებლობის საკითხი დადგინდა, ნებისმიერი პირის მიმართ მივიღებთ სამართლებრივ გადაწყვეტილებას.

რამიშვილის ტელეფონში აღმოჩნდა მნიშვნელოვანი მტკიცებულებები, დავით ფურცხვანიძესთან კომუნიკაციის ამსახველი საუბრები, ასევე ის ფოტოსურათები, რომელიც გამოძიებაში წარმოგვიდგინა, რაზეც ექსპერტიზამ დაადგინა, რომ მონტაჟის შედეგად არის მიღებული, შეიცავს ცრუ ინფორმაციას და ყალბია. ასევე აღმოჩნდა სხვა ფოტოსურათები, რომელიც სატელიტის ფოტოებს უკავშირდებოდა. ჩვენ ამ გარემოებებთან გვექნება კითხვები. ასევე დავაზუსტებთ იმ ინფორმაციას, თუ ვინ იყო მის კონტაქტებში ჩაწერილი „ყარაბახად“, რადგან საჯაროდ ბატონი მიხეილ რამიშვილის სხვა განმარტებებს ვისმენთ, თუმცა, ტელეფონის დათვალიერებით დგინდება, რომ გადმომგზავნი პირი, ვინც ჩაწერილი ჰყავდა 2020 წლის 9 სექტემბერს, ამ მოცემულობით კომუნიკაცია ამ პირსა და მიხეილ რამიშვილს შორის არის დავით ფურცხვანიძე.

შემდეგ ვინ შეცვალა, ვინ ჩაწერა კონტაქტად და მიხეილ რამიშვილმა მის ტელეფონში გარკვეულ პირებს რა სახელი დაარქვა, ჩვენი განსახილველი არ არის. დღეის მოცემულობით, ფურცხვანიძე ჩაწერილი ჰყავს, როგორც „დავითი სატელიტები“, მაგრამ მიმოწერით სულ სხვა ფაქტი დგინდება“, - განაცხადა პროკურორმა.

შეგახსნებთ, რომ ამ წუთებში თბილისის საქალაქო სასამართლოში მტკიცებულებათა ფალსიფიკაციის საქმეზე კითხვებს თამარ ბაჩალიაშვილის ოჯახის ადვოკატი, ადამიანის უფლებათა ცენტრის იურისტი ეკა ქობესაშვილი პასუხობს. დღესვე დაგეგმილია მიხეილ რამიშვილის დაკითხვაც.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი