გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი იმერეთში სახელმწიფო რწმუნებულს ზვიად შალამბერიძეს, იმერეთის მუნიციპალიტეტების მერებს და ადგილობრივი თვითმმართველობების ზედამხედველობის სამსახურების წარმომადგენლებს შეხვდა.

ქ. ქუთაისში გამართულ შეხვედრაზე პლასტიკისა და ბიოდეგრადირებადი პარკების რეგულირების წესის აღსრულებაზე კონტროლის პროცესში თვითმმართველობის ორგანოების შესაძლებლობების გაძლიერებაზე იმსჯელეს.

„ბოლო წლებში, მსოფლიოში და, მათ შორის, საქართველოში, ძალიან გაიზარდა პლასტიკის პარკების მოხმარება, რამაც მნიშვნელოვანი პრობლემა შეუქმნა გარემოს, რომელიც ყველაზე მეტად პლასტიკისგან დამზადებული პროდუქციის მოხმარების შედეგად წარმოქმნილი ნარჩენებით ბინძურდება. განსაკუთრებით აღსანიშნავია დაბინძურება ყოველდღიურ ცხოვრებაში ფართოდ მოხმარებადი ერთჯერადი პლასტიკის პარკებით, რომელთა უდიდესი ნაწილი არ ექვემდებარება ხელმეორედ  გამოყენებას. ამ ფონზე, გარემოს დაცვის მიმართულებით, უდიდესი მნიშვნელობა აქვს პლასტის პარკების ჩანაცვლებას ბიოდეგრადირებადი პარკებით. აღნიშნული პროცესის მონიტორინგს სავაჭრო ობიექტებში თვითმმართველობების ორგანოები ახორციელებენ. შესაბამისად, მათთან შეხვედრა და კონტროლის მექანიზმებზე დეტალური საუბარი უმნიშვნელოვანესია. გარდა ამისა, თითოეული ჩვენგანის სოციალური პასუხისმგებლობაა, უარი ვთქვათ პლასტიკის პარკებზე და დავიცვათ გარემო დაბინძურებისგან“, - განაცხადა გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა. 

შეხვედრის მნიშვნელობაზე ისაუბრა მხარის გუბერნატორმა, ზვიად შალამბერიძემ.

„საქართველომ თქვა უარი პლასტიკურ პარკებზე, რაც ცალსახად მისასალმებელი ფაქტია. მნიშვნელოვანია, რომ თვითმმართველობების შესაბამისი სამსახურების წარმომადგენლებს გამოცდილება გაუზიარეს სამინისტროს გარემოსდაცვითი ზედამხედველობის დეპარტამენტის წარმომადგენლებმა, რომლებიც პარკების მწარმოებლებს უკვე აქტიურად აკონტროლებენ“, - განაცხადა გუბერნატორმა. 

ტექნიკური რეგლამენტი, რომლის თანახმადაც საქართველოს მთელ ტერიტორიაზე აიკრძალა პლასტიკისა და ოქსოდეგრადირებადი/ოქსიობიოდეგრადირებადი პლასტიკის პარკების იმპორტი, წარმოება და რეალიზაცია, ძალაში 2018 წელს შევიდა, 2019 წლიდან კი სრულად ამოქმედდა (საქართველოს მთავრობის 2018 წლის 14 სექტემბრის  N472 დადგენილება). ტექნიკური რეგლამენტის თანახმად, რეგლამენტის მოთხოვნების დარღვევებზე კონტროლს, კომპეტენციის ფარგლებში ახორციელებენ: გარემოს დაცვისა და სოფლის მეურნეობის სამინისტრო, გარემოსდაცვითი ზედამხედველობის დეპარტამენტი (პარკების მწარმოებლების კონტროლი), ფინანსთა სამინისტრო (კონტროლი პარკების იმპორტისას) და ადგილობრივი თვითმმართველობის ორგანო (კონტროლი პარკების რეალიზაციისას). 

ავტორი: NS (სტატია დაფინანსებულია),

სოციალური ქსელები

ისწავლე საქართველოს ბანკის ნიკა გუჯეჯიანის სახელობის სტიპენდიით ახლა უკვე მადრიდში

ComCom ტერმინების გამო ფორმულას კანონის დარღვევას კვლავ ედავება

ლევან ხაბეიშვილს 2 წლითა და 6 თვით, მურთაზ ზოდელავას კი 9 თვით პატიმრობა მიესაჯა

კასტროზე ბრალდების წაყენების შემდეგ, ტრამპმა კუბის სანაპიროზე საჰაერო ხომალდების გადამზიდავი ჯგუფი გაგზავნა