„ჩვენი არსებობა, ევროპისკენ მიმავალი საქართველო, მათთვის უკვე პროვოკაციაა, მაგრამ ეს არჩეული გზიდან ვერ გადაგვახვევინებს“,-ასე გამოეხმაურა საქართველოს თავდაცვის მინისტრი თინა ხიდაშელი ე.წ. სამხრეთ ოსეთის დე ფაქტო პრეზიდენტ ლეონიდ თიბილოვის განცხადებას, რომლის თანახმადაც, დონალდ ტუსკის ე.წ. საზღვარზე წაყვანა პროვოკაციაა.

ხიდაშელის თქმით, თიბილოვმა რა განცხადებაც არ უნდა გააკეთოს, საქართველო დასახული მიზნის მისაღწევად არ გაჩერდება.

„რაც შეეხება საოკუპაციო რეჟიმის განცხადებას, რომ ტუსკის ვიზიტი პროვოკაციაა, არა მხოლოდ თიბილოვი თვლის, რომ ტუსკის ვიზიტი პროვოკაციაა. ანალოგიური განცხადება რუსი პოლიტიკოსებისგანაც მოვისმინეთ. ეს გასაგებია. ჩვენი არსებობა მათთვის უკვე პროვოკაციაა. ევროპისკენ მიმავალი საქართველო უკვე პროვოკაციაა. ამაში ახალი არაფერია. ბევრჯერ გვინახავს. ეს რა თქმა უნდა, ჩვენთვის არაფერს არ ნიშნავს და არც ერთი წამით არ გადაგვახვევინებს იმ გზიდან, რომელიც ავირჩიეთ. საქართველოს ამოცანაა, აღადგინოს საკუთარი ქვეყნის ტერიტორიული მთლიანობა, დაიბრუნოს მოსახლეობა, რომელიც პირობითი საზღვრის მიღმა დარჩა და განამტკიცოს სახელმწიფოებრიობა. ამ გზაზე მზად ვართ, მოვითმინოთ აბსოლუტურად ყველანაირი პროვოკაცია იმისათვის, რომ საბოლოო მიზანს მივაღწიოთ. ეს არის გეგმაზომიერი პოლიტიკა, რომელსაც საქართველოს ხელისუფლება ახორციელებს. ბევრი ნიშანია იმის დასტური, რომ ამ გზაზე პროგრესი სახეზეა. ამიტომ თიბილოვმა რა განცხადებაც არ უნდა გააკეთოს, რა თქმა უნდა ეს ჩვენ ვერ გაგვაჩერებს“,-აღნიშნა ტინა ხიდაშელმა.

ცნობისთვის, ევროპული საბჭოს პრეზიდენტი დონალდ ტუსკი კონფლიქტის ზონაში ჩავიდა და საზღვრის გადმოწევის ადგილი დაათვალიერა. ტუსკი ხურვალეთსა და წითელუბნის მიმდებარე ტერიტორიაზე არსებულ ვითარებას გაეცნო.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ავტობანზე ავარიისას 2 ადამიანი დაშავდა

პენიტენციური სამსახური -სინამდვილეს არ შეესაბამება თითქოს გიორგი ფეიქრიშვილი დეესკალაციის ოთახში იმყოფება და ჭრილობებიდან სისხლდენა აღენიშნება

ჟურნალისტური ეთიკის ქარტია პროკურატურას მიმართავს გასაჯაროვდეს ასავალ-დასავალის ჟურნალისტის საქმის მტკიცებულებები

პლენუმმა კონსულტაციისთვის პარტიებზე სარჩელის სტრასბურგში გაგზავნაზე უარი თქვა