2018-09-04 12:18:47, 989 ნახვა

---

„მინისტრის მოადგილეს, რომელიც ტენდერს ხელმძღვანელობს, კომპანიასთან ნათესაური კავშირი არ აქვს“ - საგარეო უწყება IDFI-ის პასუხობს

საგარეო საქმეთა სამინისტროს პრესისა და ინფორმაციის დეპარტამენტი, ინფორმაციის თავისუფლების განვითარების ინსტიტუტის მიერ მომზადებულ მასალას ეხმაურება, რომელიც შპს „ლენდ მარკ პროჯექტთან“ გაფორმებულ შესყიდვას უკავშირდება.

სამინისტროში აცხადებენ, რომ შესყიდვით, რაზეც IDFI საუბრობს, კანონი არ დარღვეულა. რაც შეეხება მინისტრის მოადგილის ნათესაურ კავშირს კომპანიის მფლობელთან, პრესსამსახურის განმარტებით, მინისტრის მოადგილეს, რომელიც სატენდერო კომისიას ხელმძღვანელობდა, კომპანიასთან ნათესაური კავშირი არ აქვს.

"ჩვენ ყურადღებით გავეცანით ორგანიზაცია “ინფორმაციის თავსიუფლების განვითარების ინტიტუტის“ კვლევას, რომელიც მთავრობის სარეზერვო ფონდის ხარჯების განკარგვას ეხება და მათ შორის მოიცავს საგარეო საქმეთა სამინისტროს მიერ 2017 წლის 4 აგვისტოს შპს „ლენდ მარკ პროჯექტთან“ დადებულ ხელშეკრულებას თბილისში, ლეონიძის ქ N3-ში მდებარე შენობა-ნაგებობებზე საინჟინრო და არქიტექტურული პროექტის განხორციელებისათვის. საგარეო საქმეთა სამინისტროს ზემოაღნიშნული მომსახურების შესყიდვისთვის თანხა (737 000 ლარი) გამოეყო საქართველოს მთავრობის სარეზერვო ფონდიდან საქართველოს მთავრობის 2017 წლის 3 აგვისტოს №1616 განკარგულების თანხმად. როგორც ორგანიზაცია “ინფორმაციის თავსიუფლების განვითარების ინტიტუტი“ მოცემულ კვლევაში თავადაც აღნიშნავს საგარეო საქმეთა სამინისტროს აღნიშნული მომსახურების შესყიდვის დროს არ დაურღვევია შესყიდვების შესახებ კანონი, რადგან “სახელმწიფო შესყიდვების შესახებ” კანონის პირველი მუხლის 3¹ პუნქტის „ე“ ქვეპუნქტის თანახმად, სარეზერვო ფონდიდან გამოყოფილი თანხით განხორციელებულ შესყიდვაზე არ ხორციელდება ელექტრონული ტენდერი ან კონკურსი და შესაბამისად ეს პროცესი არ განხორციელებულა სახელწმიფო შესყიდვების ელექტრონულ სისტემაში. აღსანიშნავია, რომ საგარეო საქმეთა სამინისტრომ შპს “ლენდ მარკ პროჯეკტთან” ხელშეკრულების გაფორმებამდე ჩაატარა ბაზრის კვლევა აღნიშნული მომსახურების გაწევის ეფექტური სერვისის მოძიებისთვის. საპროექტო სამუშაოების მომსახურების შესყიდვისას, სამინისტროსთვის მნიშვნელოვანი იყო მიმწოდებლის მაღალი კვალიფიკაცია. შესაბამისად კომპანიის შერჩევის უმთავრესი კრიტერიუმი გახლდათ არა თავად კომპანია, როგორც იურიდიული სუბიეტი, არამედ მასში დასაქმებული კვალიფიციური სპეციალისტები, რომელთაც უნდა ჰქონდათ ანალოგიური ხასიათის, სირთულის და შინაარსის პროექტების განხორციელების მდიდარი გამოცდილება. სახელმწიფო შესყიდვების სააგენტოს რეკომენდაციაც „კვალიფიკაციის დამადასტურებელ მოთხოვნებთან დაკავშირებით“ მიუთითებს ცოდნის/გამოცდილების მატარებელს წარმოადგენს არა კომპანია/საწარმო, არამედ კომპანიაში/საწარმოში დასაქმებული შესაბამის გამოცდილების/კვალიფიკაციის მქონე პერსონალი. მოცემულ შემთხვევაში შპს „ლენდ მარკ პროჯექტის“ ძირითადი სპეციალისტების სამუშაო გამოცდილება და სტაჟი სრულად აკმაყოფილებდა შემსყიდველის მოთხოვნებს. საგარეო საქმეთა მინისტრის შესაბამისი ბრძანების თანახმად სამინისტროს სატენდერო კომისიას ხელმძღვანელობს მინისტრის მოადგილე, რომელსაც არანაირი ნათესაური კავშირი არ აქვს მოცემულ კომპანიასთან. ზემოაღნიშნულიდან გამოდინარე, აღნიშნულ შესყიდვაში მონაწილე არცერთ პირს მათი საქმიანობისას არ წარმოქმნია „სახელმწიფო შესყიდვების შესახებ“ საქართველოს კანონის მე-8 მუხლის პირველი პუნქტით განსაზღვრული ინტერესთა კონფლიქტი", - ნათქვამია განცხადებაში.

შეგახსენებთ, IDFI-მ დღეს მასალა გამოაქვეყნა, რომელშიც მათი თქმით, საგარეო საქმეთა სამინისტროს მიერ განხორციელებულ საეჭვო შესყიდვაზეა საუბარი. 

---

ავტორი: ,

---

დღის თემა

მთავარი თემა

ინტერვიუ - ექსკლუზივი