გიორგი ჭირაქაძე: ინვესტორთა საბჭო ბიზნესში არსებული პრობლემების უშუალოდ პრემიერ-მინისტრთან განხილვას ხელს შეუწყობს

2015-05-12 18:24:36, 366 ნახვა

პოლიტიკა

ბიზნეს ასოციაციის პრეზიდენტი გიორგი ჭირაქაძე ინვესტორთა საბჭოს დაარსებას მიესალმება.
როგორც ჭირაქაძემ ჟურნალისტებს განუცხადა, ამგვარი საბჭოს დაარსება მნიშვნელოვანია, რათა ბიზნესში არსებულ პრობლემებთან დაკავშირებით, ბიზნესისა და ხელისუფლების აქტიური კომუნიკაცია მოხდეს.
მისივე შეფასებით, საბჭო სწორედ, ხელს შეუწყობს იმას, რომ ბიზნესში არსებული პრობლემები უშულოდ პრემიერ-მინისტრთან განიხილონ.
"ძალიან მნიშვნელოვანია, რაც დღეს ხდება. ჩვენ უკვე 1 წელია საინვესტიციო საბჭოსთან დაკავშირებით EBRD-სთან ერთად ვმუშაობთ. მე მახსოვს 1 წლის წინ, როცა გამოვიდა EBRD-ის ხელმძღვანელობა ამ საბჭოსთან დაკავშირებით ინიციატივით, ჩვენი მაქსიმალური მხარდაჭერა ჰქონდათ. რისთვის არის მნიშვნელოვანი? ბიზნესისა და ხელისუფლების აქტიური კომუნიკაცია პრობლემებთან დაკავშირებით არის ძალიან მნიშვნელოვანი, რომ მოხდეს იმ ფორმატით, რა ფორმატითაც EBRD-ის პრეზიდენტმა და საქართველოს პრემიერ-მინისტრმა დღეს შესთავაზა საზოგადოებას. ეს არის საბჭო, რომელსაც უშუალოდ პრემიერ-მინისტრი ხელმძღვანელობს, რომელზეც წარმოდგენილები არიან უმსხვილესი ქართული და საერთაშორისო ბიზნესასოციაიცები, სადაც არიან საერთაშორისო საზოგადოება და ჩვენ საშუალება მოგვეცემა, დავაფიქსიროთ ის პრობლემები, საკითხები, ის შესაძლებლობები, რომლებიც საქართველოში არსებობს.ყველაზე მნიშვნელოვანი იქნება, რომ ჩვენ საშუალება მოგვეცემა ისეთი საკითხები, რომელიც უშუალოდ თითოეულ სამინისტროსთან, თითოეულ სამინისტროს ხელმძღვანელთან არ წყდება, ან არის ძალიან რთული, კომპლექსური თემები, რომლებიც ეხება ბევრ სამინისტროს, ჩვენ დავსვათ პრემიერ-მინისტრთან პირდაპირ, სხვა კოლეგებთან, ასოციაციებთან.ბევრი არის ასეთი საკითხი. უახლოეს პერიოდში წარმოგიდგენთ ამ საკითხებს.ძალიან მნიშვნელოვანია ის, რაც დღეს ხდება, ეს საბჭო, ჩემი აზრით, ნამდვილად შეუწყობს ხელს იმას, რომ ქვეყანაში ბიზნესში არსებული ბევრი რეალური პრობლემის უშუალოდ პრემიერ-მინისტრთან აქტიურად განხილვა ხდებოდეს.მოხარული ვარ, რომ უშუალოდ EBRD-ის პრეზიდენტის თხოვნით ასეთი საბჭო შეიქმნა, თანხმობა არის ხელისუფლების და ყველა ის მსხვილი ბზინესგაერთიანება, რომელიც საქართველოშია, არის მად წარმოდგენილი",-განაცხადა გიორგი ჭირაქაძემ.
ცნობისთვის, საქართველო და ევროპის რეკონსტრუქციისა და განვითარების ბანკი ინვესტორთა საბჭოს აარსებენ. შესაბამის მემორანდუმს ხელი დღეს ევრობანკის პრეზიდენტმა სერ სუმა ჩაკრაბატიმ და საქართველოს პრემიერ-მინისტრმა ირაკლი ღარიბაშვილმა მოაწერეს.
ახალ დაწესებულებაში თავს მოიყრიან მთავრობის, სახელმწიფო უწყებების, ბიზნეს ასოციაციების, ბიზნეს ომბუდსმენისა და საერთაშორისო ინვესტორების წარმომადგენლები. ინვესტორთა საბჭო წარმართავს დიალოგს უმაღლეს დონეზე ბიზნეს კლიმატის შემდგომი გაუმჯობესების, ეკონომიკური განვითარების ხელშეწყობისა და საქართველოში დამატებითი ინვესტიციების მოზიდვის მიზნით.ურთიერთგაგებისა და ნდობის გამყარებით საბჭო გააძლიერებს საფუძველს ბიზნეს აქტივობების გასაფართოებლად ქვეყნის ეკონომიკის სასარგებლოდ. საბჭო გადადგამს პრაქტიკულ ნაბიჯებს ინვესტორთა მოთხოვნებისა და საჭიროებების შესაბამისად.