პრეზიდენტის ადმინისტრაციის უფროსის გიორგი აბაშიშვილის განცხადებით, იუსტიციის მინისტრმა თეა წულუკიანმა  მოქალაქეობის საკითხთა კომისია  იუსტიციის სამინისტროდან გამოასახლა.

როგორც აბაშიშვილმა დღევანდელ ბრიფინგზე განაცხადა, კომისიის წევრები დღეს მოკლებული არიან შესაძლებლობას, საკუთარი საქმიანობა განახორციელონ.

მისივე თქმით, კომისია პრეზიდენტის დაქვემდებარებაში აქამდეც იყო, უბრალოდ მას წევრები დაემატა:

„სამწუხაროდ, კომისიის გაძლიერებამ და გამჭვირვალობის ზრდამ ქალბატონი ისუტიციის მინისტრის გაუგებარი გაღიზიანება გამოიწვია.შესაბამისად, სრულიად მოულოდნელად, განაწყენებულმა მინისტრმა კომისიის წევრები გამოასახლა იუსტიციის სამინისტორდან. შესაბამისად დღეს კომისიის წევრები მოკლებული არიან შესაძლებლობას, განახორციელონ საკუთარი საქმიანობა. ჩვენთვის სრულიად გაუგებარია ქალბატონი მინისტრის ასეთი პიროვნული ანგარიშსწორება კომისიის მიმართ“,-აღნიშნა გიორგი აბაშიშვილმა.

შეგახსენებთ, თეა წულუკიანმა სპეციალურ ბრიფინგზე მოქალაქეობის საკითხთა კომისიის დაკომპლექტების წესში პრეზიდენტის მიერ განხორციელებულ ცვლილებებზე ისაუბრა.

„პრეზიდენტის მიერ განხორციელებული ცვლილებების თანახმად, მოქალაქეობის საკითხთა კომისია, რომლის მიერ მიღებული გადაწყვეტილება საქართველოს მოქალაქეობის მინიჭების საფუძველია, ოთხის ნაცვლად ექვსი წევრით დაკომპლექტდება და მას საქართველოს პრეზიდენტის ადმინისტრაციის წარმომადგენელი უხელმძღვანელებს. საქართველოს პრეზიდენტს, გარდა კომისიის თავმჯდომარისა, კომისიაში კიდევ 2 წარმომადგენელი ეყოლება - ერთი პრეზიდენტის ადმინისტრაციიდან და ერთიც - ეროვნული უშიშროების საბჭოს აპარატიდან. ასევე იზრდება საქართველოს სახელმწიფო უსაფრთხოების სამსახურის წარმომადგენელთა რიცხვი, რომელსაც კომისიაში ერთის ნაცვლად ორი წევრი ეყოლება. რაც შეეხება საქართველოს იუსტიციის სამინისტროს სსიპ „სახელმწიფო სერვისების განვითარების სააგენტოს“, ის კომისიის თავმჯდომარე აღარ იქნება და, ამასთან, ორის ნაცვლად მას მხოლოდ ერთი წარმომადგენელი ეყოლება“,-განმარტა წულუკიანმა.

პრეზიდენტის ბრძანებულებაში შეტანილი ზემოხსენებული ცვლილებების ფონზე, როგორც წულუკიანმა აღინიშნა, იუსტიციის მინისტრი ვალდებულია, საკუთარ ბრძანებაშიც განახორციელოს ცვლილებები.

იუსტიციის მინისტრმა  დასძინა, რომ პრეზიდენტის მიერ ბრძანებულებაში შეტანილი ცვლილებები პრეზიდენტის იმავე ბრძანებულების სხვა ნორმებს ეწინააღმდეგება და ასევე შეუსაბამო უნდა იყოს საქართველოს ორგანულ კანონთან „საქართველოს მოქალაქეობის შესახებ“, რომლის 24-ე მუხლის თანახმად, საქართველოს მოქალაქეობის საკითხებზე განცხადებებს „განიხილავს“ სერვისების განვითარების სააგენტო.

წულუკიანის თქმით, პრეზიდენტის მიერ განხორციელებული ცვლილებების შედეგად, სერვისების განვითარების სააგენტო მოცემული განცხადებების განხილვას ვეღარ გააგრძელებს.

მოცემული ცვლილებები მიმდინარე წლის 15 იანვრიდან შედის ძალაში.

ავტორი: ,

სოციალური ქსელები

არეულობები ბარსელონაში - 128 ადამიანი დააკავეს, ათობით მაღაზია დაზიანდა

ფეიქრიშვილების დედა ამბობს, რომ მისი შვილის საკანში ვატო ყიფიანი შევიდა - პენიტენციური ფაქტს უარყოფს - ვიდეო

ფიგურული ციგურაობაში მეტელკინა-ბერულავას წყვილმა საფრანგეთის გრანპრიზე ოქროს მედალი მოიპოვა

სერბეთში საპარლამენტო არჩევნები მიმდინარეობს - რიგები კილომეტრებით გაიჭიმა