სახელმწიფო პროგრამის განმახორციელებელი სააგენტო ახალი სტრუქტურით გააგრძელებს საქმიანობას-ხდება სააგენტოს ტრანსფორმირება და ის იმუშავებს სახელწოდებით „აწარმოე საქართველოში“.

სააგენტო „აწარმოე საქართველოში“ პრეზენტაციას  საბანკო სექტორის წარმომადგენლებიც ესწრებოდნენ.

„თიბისი ბანკის“ გენერალური დირექტორის ვახტანგ ბუცხრიკიძის განცხადებით, მისასალმებელია, რომ სახელმწიფო პროგრამის  განმახორციელებელი სააგენტო  გაფართოვდება  და რამდენიმე მნიშვნელოვან კომპონენტს გააერთიანებს:

„აწარმოე საქართველოში არის ძალიან მნიშვნელოვანი პროექტი. დღეს პრემიერ-მინისტრმა და ეკონომიკის მინისტრმა გააკეთეს პრეზენტაცია, სადაც საუბარი იყო, რომ კიდევ უფრო გაფართოვდება. ძალიან მნიშვნელოვანია საექსპორტო მიმართულების განვითარება. განსაკუთრებით მნიშვნელოვანია, რომ  კომერციული ატაშეები ეყოლება მომავალში საქართველოს, თვითონ ბანკების აქტიურობაც კიდევ უფრო გაიზრდება ამ მიმართულებით. მიმაჩნია, რომ ერთ-ერთი წარმატებული პროექტია. „თიბისი ბანკი“ არის ერთ-ერთი აქტიური მონაწილე და ვფიქრობთ, სიახლეებით, რაზეც დღეს იყო საუბარი,  კიდევ უფრო გავაფართოვებთ ჩვენს მონაწილეობას“,-აღნიშნა ვახტანგ ბუცხრიკიძემ.

სააგენტო „აწარმოე საქართველოში“  სამ კომპონენტს გააერთიანებს: ბიზნესს (ადგილობრივ წარმოებას), ექსპორტსა და ინვესტიციებს.  შესაბამისად,  განვითარდება ერთი ქოლგის ქვეშ სამი  დამოუკიდებელი ბრენდის სახით „აწარმოე საქართველოში-ბიზნესი“, „აწარმოე საქართველოში-ექსპორტი“ და „აწარმოე საქართველოში-ინვესტიცია“.

„აწარმოე საქართველოში-ბიზნესი“-ეს კომპონენტი მუშაობას გააგრძელებს მიკრო, მცირე და საშუალო კომპანიების მხარდასაჭერად ფინანსური რესურსების ხელმისაწვდომობის კუთხით, ახალი ბიზნესის დაწყებისა და  არსებულის გაფართოება/დივერსიფიცირებისთვის. ეს კომპონენტი იქნება მაქსიმალურად დინამიური და განვითარდება ბიზნესის საჭიროებიდან გამომდინარე.

ეკონომიკის სამინისტროს ინფორმაციით, ამასთან, „აწარმოე საქართველოში“ ქმნის ფრონტ-ოფისს, რომელიც მაქსიმალურად კომფორტულ გარემოს შეუქმნის მეწარმეებს, უფრო გაამარტივებს წვდომას ბიზნესის ხელშემწყობ პროგრამებზე. ფრონტ-ოფისი იმუშავებს „ერთი ფანჯრის“ პრინციპით-ეს იქნება  ბიზნესჰაბი, რომელიც  მეწარმეს  ბიზნესის დასაწყებად საჭირო სრულ სერვისს შესთავაზებს და საშუალებას მისცემს მას, დაზოგოს დრო და რესურსები. მოგვიანებით ფრონტ-იფისი შეუერთდება ბიზნესსახლს და მის ბაზაზე გააგრძელებს ფუნქციონირებას.

„აწარმოე საქართველოში-ექსპორტი“-გაფორმებული, ან მოლაპარაკების პროცესში მყოფი თავისუფალი ვაჭრობის შეთანხმებები ქართული ექსპორტისითვის მნიშვნელოვან შესაძლებლობებს ქმნიან. შესაბამისად,  უმნიშვნელოვანესია ქართველ ექსპორტიორთა მხარდაჭერა, რათა მათ შეძლონ ახალ ბაზრებზე გასვლა და იქ თავის დამკვიდრება.

ექსპორტის მხარდაჭერის მიმართულება აქამდეც სააგენტოს ნაწილი იყო, თუმცა დღეს მისი მნიშვნელობიდან გამომდინარე, ის დამოუკიდებელ კომპონენტად გამოიყოფა და მოხდება მისი თვისობრივად გაძლიერება. ეს კომპონენტი იქნება ერთგვარი  მედიატორი  ქართველ მეწარმეებსა და უცხოელ შემსყიდველებს შორის. გარდა ამისა, მისი მნიშვნელოვანი ფუნქცია  იქნება ქართველი  მეწარმეების  ტექნიკური მხარდაჭერა, რათა მათ შეძლონ  უცხოურ  ბაზრებზე შესვლა და თავის დამკვიდრება, ასევე საერთაშორისო გამოფენებში მონაწილეობა და ცალკეულ შემთხვევებში, სხვა მეწარმეებთან ძალების გაერთიანება საერთაშორისო ასპარეზზე გასავლელად.

„აწარმოე საქართველოში-ინვესტიცია“-განახლებულ სააგენტოში ერთიანდება “Invest in Georgia“. აღნიშნული კომპონენტი გულისხმობს მჭიდრო ურთიერთობას უკვე არსებულ ინვესტორებთან და კონკრეტული პროექტების შეთავაზებას ახალი ინვესტორებისთვის. მისი ფუნქცია იქნება საქართველოს პოპულარიზაცია. ინვესტორებთან ურთიერთობა  გადავა ხარისხობრივად ახალ, გაუმჯობესებულ საფეხურზე, განვითარდება ინვესტორებისთვის საქმიანობის  დაწყების შემდგომი საკონსულტაციო მომსახურება.

ამასთან, მთავრობის გადაწყვეტილებით, მუშაობას დაიწყებს კომერციული ატაშეების ინსტიტუტი. ისინი იქნებიან  საქართველოს ერთგვარი ეკონომიკური ელჩები, რომლებიც იმუშავებენ საქართველოს  საელჩოებში სხვადასხვა ქვეყნებში. კომერციული ატაშეების საშუალებით შესაძლებელი გახდება  საქართველოს  შესაძლებლობების გაცნობა უფრო მეტი პოტენციური  ინვესტორებისთვის, მეტი შემსყიდველის დაინტერესება ქართული საექსპორტო პროდუქტით და მეტი საერთაშორისო ბიზნესის შემოსვლა საქართველოში.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ირანი საქართველოს სანქციებისგან თავის დასაღწევად იყენებს -Fox news გამოძიება

ისლამაბადში ირანთან მოლაპარაკებები ოფიციალურად დაიწყო

არა მხოლოდ აღდგომისთვის: უკრაინამ რუსეთს შესთავაზა ცეცხლის შეწყვეტის შეთანხმების გახანგრძლივება

იერუსალიმში, მაცხოვრის საფლავზე წმინდა ცეცხლი გადმოვიდა