ეკა ბესელია: ამ კონსტიტუციას ძალიან მაღალი ლეგიტიმაცია ექნება

2017-04-18 16:03:40, 2042 ნახვა

პოლიტიკა კომენტარი

საკონსტიტუციო კომისიის წევრის, საპარლამენტო უმრავლესობის წარმომადგენელის, ეკა ბესელიას განცხადებით, მთავარია არა ის, თუ ვინ დატოვებს კომისიის რიგებს, არამედ სამუშაო პროცესი, რომელიც მიმდინარეობს.

როგორც ბესელიამ ჟურნალისტებს განუცხადა, ვისაც აინტერესებს, კონსტიტუცია იყოს ძალიან საამაყო და ღირებული დოკუმენტი, ის ამ პროცესში ბოლომდე იქნება ჩართული:

„ისე ჩანს, თითქოს მთავარი ამბავია, ვინ დარჩება საკონსტიტუციო კომისიაში და ვინ წავა, ეს არ არის მთავარი ამბავი, მთავარი ამბავია, რაც ხდება სამუშაო პროცესში, სადაც თითოეული მუხლი ყალიბდება უფრო უკეთესი ფორმულირებით, ხდება მნიშვნელოვანი ცვლილებები და ალბათ ჩვენი მთელი ყურადღება მიპყრობილი უნდა იყოს იქითკენ, საბოლოოდ როგორი კონსტიტუცია გვექნება. ვისაც სურს, რომ წავიდეს და ეს წინასწარაც იყო გაცხადებული, ვერავინ ვერავის დაიჭერს, მაგრამ ვისაც აინტერესებს, კონსტიტუცია იყოს ძალიან საამაყო და ღირებული დოკუმენტი, ის დარწმუნებული ვარ ბოლომდე იქნება ამ პროცესში ჩართული",-აღნიშნა ბესელიამ და დასძინა, რომ კონსტიტუციას ძალიან მაღალი ლეგიტიმაცია ექნება:

"კონსტიტუციას ლეგიტიმაციას აძლევს ხალხი და ლეგიტიმაცია ამ კონსტიტუციას ექნება ძალიან მაღალი, რადგან საერთო სახალხო განხილვის შედეგად იქნება საბოლოო რედაქცია მხარდაჭერილი", - განმარტა ეკა ბესელიამ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან