კალაძე: ერთადერთი ძალა, რომელსაც არ აწყობს არჩევნების მშვიდ გარემოში ჩატარება, არის ახალი და ძველი "ნაციონალური მოძრაობა"

2016-09-10 18:15:57, 1046 ნახვა

პოლიტიკა

პარტია "ქართული ოცნების" საარჩევნო შტაბის უფროსი კახი კალაძე შესაბამის სამსახურებს მიმართავს, მაქსიმუმი გააკეთონ, რათა "ნაციონალური მოძრაობის" მხრიდან პროვოკაციები ფიზიკურ დაპირისპირებაში არ გადაიზარდოს.

ენერგეტიკის ყოფილი მინისტრის თქმით, ქვეყნისთვის მნიშვნელოვანია არჩევნების მშვიდ გარემოში ჩატარება.

"არაერთხელ მოვუწოდეთ ჩვენს ოპონენტებს, რომ თავი შეიკავონ პროვოკაციული ქმედებებისგან. მინდა, მოვუწოდო შესაბამის სამსახურებს, რომ ყურადღბა მიაქციონ მაქსიმალურად, მაქსიმალურად იყვნენ ჩართულები, რომ ფიზიკური დაპირისპირება არ მოხდეს. ზოგადად, როდესაც იმართება ამა თუ იმ პარტიის შეხვედრამ არ არის მიზანშეწონილი, იქ რომელიმე პარტიის წარმომადგენელი მივიდეს, ეს იწვევს უსიამოვნებას, შეხლა-შემოხლას, შეიძლება მოხდეს ფიზიკური დაპირისპირებაც, რაც, რა თქმა უნდა, ცუდია. ჩვენთვის მთავარი და მნიშნველოვანი არის არჩევნების მშვიდ, თავისუფალ გარემოში ჩატარება და ამას ვუზრუნველყობთ", - აღნიშნა კალაძემ აჭარის რეგიონში მომხდარი ინციდენტის კომენტირებისას.

როგორც კალაძემ აღნიშნა, ვერავინ დაასახელებს ვერც ერთ ფაქტს, როდესაც "ნაციონალური მოძრაობის" კანდიდატი მართავდეს შეხვედრას და პარტია "ქართული ოცნების" წარმომადგენელი მივიდეს, ჩაშალოს ის კონკრეტული შეხვედრა.

"ერთადერთი ძალა, რომელსაც აწყობს არჩევნების არამშვიდ გარემოში ჩატარება, შემდეგ გარედან საუბარი, რომ არჩევნები მიმდინარეობს არადემოკრატიულ გარემოში, არის ახალი და ძველი "ნაციონალური მოძრაობა",-განაცხადა კაი კალაძემ.

აჭარაში მომხდარ ინციდენტზე "ქართული ოცნების" აღმასრულებელმა მდივანმა ირაკლი კობახიძემ დღეს გამართულ პრესკონფერენციაზე ისაუბრა.

"პროვოკაცია საკმაოდ მძიმე ფორმას ატარებდა. ერთ-ერთი ფრაზა, რომელიც იქ გაისმა, არის ის, რომ იყვნენ ღირსნი ცოცხების და "დუბინკების". ასეთი მძიმე ფრაზა გაისმა ამ შეხვედრაზე, რასაც ბუნებრივია, მოყვა რეაქცია ჩვენი აქტივისტების მხრიდან. თუმცა. ეს რეაქცია იყო ღირსეული. მადლობა მინდა, გადაუხადო ჩვენ აქტივისტებს, რომ არ აყვნენ პროვოკაციებს და შემოიფარგლენ მხოლოდ ღირსეული პასუხით. აქვე მინდა ვთქვა, რომ ვიდრე სანდრა რულოსვის პირით „ნაციონალები“ ცდილობენ, დაგვარწმუნონ, რომ "დუბინკები" და ცოცხები აღარ იქნება, მათი აქტივისტები, მათი თანაპარტიელები რეალურად ამის საპირისპიროში გვარწმუნებენ. გუშინდელი ფრაზაც სწორედ ამის კიდევ ერთი დასტური იყო", - აღნიშნა კობახიძემ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან