ევროპარლამენტი სამოქალაქო თავისუფლებების, მართლმსაჯულებისა და საშინაო საქმეთა კომიტეტში საქართველოსა და კოსოვოს ვიზალიბერალიზაციის შესახებ გამართული კენჭისყრის შედეგებთან დაკავშირებით განცხადებას აქვეყნებს.

როგორც ევროპარლამენტის ვებგვერდზე გამოქვეყნებულ განცხადებაშია ნათქვამი, სამოქალაქო თავისუფლებების, მართლმსაჯულებისა და საშინაო საქმეთა კომიტეტმა საქართველოს და კოსოვოს მოქალაქეებისთვის შენგენის ზონაში უვიზოდ მოგზაურობის უფლების მინიჭების გეგმებს მხარი დაუჭირა. კომიტეტმა სავიზო რეჟიმის გაუქმებას კოსოვოსთვის 25 ხმით 24-ის წინააღმდეგ დაუჭირა მხარი, ორმა თავი შეიკავა, საქართველოსთვის კი  - 44 ხმით 5-ის წინააღმდეგ. 

განცხადების ტანახმად, ევროკავშირსა და საქართველოს შორის ვიზალიბერალიზაციის დიალოგი 2012 წელს დაიწყო, 2015 წლის ბოლოსთვის კი, ევროკომისიამ დაასკვნა, რომ ქვეყანამ ყველა კრიტერიუმი დააკმაყოფილა.

ამასთან, აღნიშნულ საკანონმდებლო ინიციატივაზე მომხსენებელს, მარია გაბრიელს სჯერა, რომ სავიზო რეჟიმი გაუქმება მნიშვნელოვანი ინსტრუმენტია ეკონომიკური და კულტურული ურთიერთობების გააქტიურებისა და პოლიტიკური დიალოგის გაძლიერებისთვის, მათ შორის ადამიანის უფლებებისა და ფუნდამენტური თავისუფლებების თემებზე.

გაბრიელი აღნიშნავს, რომ ამის მიუხედავად, საჭიროა მეტი ძალისხმევა ისეთ სფეროებში, როგორიცაა მედიის თავისუფლება, სასამართლო სისტემის დამოუკიდებლობა, არჩევნების სამართლიანობა, ასევე ქალებისა და ეროვნული უმცირესობების წარმომადგენელთა მონაწილეობის გაზრდა.

ევროპარლამენტის კომიტეტმა მხარი დაუჭირა მოლაპარაკებების დაწყებას ევროკავშირის საბჭოსთან საქართველოს ვიზალიბერალიზაციის საკანონმდებლო ინიციატივაზე, შეთანხმების პირველივე მოსმენით მიღწევის მიზნით, ასევე მოლაპარაკებებში მონაწილე ჯგუფის შემადგენლობა დაამტკიცა.

მას შემდეგ, რაც ევროპარლამენტი და ევროკავშირის საბჭო საკანონმდებლო ცვლილებებს დაამტკიცებს, ბიომეტრული პასპორტების მქონე ქართველები ევროკავშირში ვიზის გარეშე, 180-დღიანი პერიოდის განმავლობაში, 90 დღით ყოფნას შეძლებენ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

იტალიის პრემიერ-მინისტრი პუტინის G20-ის სამიტზე მიწვევას ეწინააღმდეგება

მედია: ტრამპმა პაკისტანში ირანთან მოსალაპარაკებლად აშშ-ს დელეგაცია არ გაგზავნა

სუს: დავაკავეთ სუს-ის ყოფილი და შსს-ს მოქმედი თანამშრომელი, ბრალი ედება სუს-დან საიდუმლო ინფორმაციის გატანაში

ირაკლი [დაჩი] ბერაია აუდიტის სამსახურის უფროსის პირველ მოადგილედ დაინიშნა