უსუფაშვილი: გადავამოწმებ, თუ ყოფილა შემთხვევა, რომ უმცირესობასთან ერთად, უმრავლესობაც ბოიკოტის რეჟიმში იყოს

2016-08-15 16:00:02, 827 ნახვა

პოლიტიკა

პარლამენტის ბიუროს სხდომა კვორუმის არ არსებობის გამო ვერ ჩატარდა. სხდომას ბოიკოტის რეჟიმში მყოფი საპარლამენტო უმცირესობის წევრები არ ესწრებოდნენ. გარდა ამისა, ბიუროს სხდომაზე არ მივიდა საპარლამენტო უმრავლესობის თითქმის მთელი შემადგენლობა.

სხდომაზე, საქართველოს მოქალაქეების განაცხადი უნდა განეხილათ, რომელიც ქვეყნის კონსტიტუციაში უბლოკო სტატუსის ჩაწერას ითვალისწინებს.

პარლამენტის თავმჯდომარე დავით უსუფაშვილმა მომხდართან დაკავშირებით, უკმაყოფილება გამოთქვა:
"გადავამოწმებ ჩემს ყოფილ კოეგებთან, თუ ყოფილა მსგავსი შემთხვევა პარლამენტის ისტორიაში, რომ უმცირესობასთან ერთად, უმრავლესობაც გარკვეული ბოიკოტის რეჟიმში იყოს. როგორც გავარკვიე, რაიმე შეტყობინება იმის თაობაზე, ვინ რატომ არ გვესწრება, არ შემოსულა. წინა კვირას მქონდა შეხვედრა ბატონ გია ვოლსკისთან, რომელთან ერთადაც გავიარეთ ის საკითხი, რაზეც დღეს უნდა შევკრებილიყავით და შევჯერდით, რომ დღეს სამ საათზე ბიუროს სხდომა მოგვეწვია. სანამ შემოვიდოდი ვცადე ტელეფონით დაკავშირება, მაგრამ სამწუხაროდ ეს არ ხერხდება.აქიდან გამომდინარე, ცხადია, ბიუროს სხდომას დღეს ვერ ჩავატარებთ, რადგან კვორუმთან ახლოსაც კი არ ვართ",-განაცხადა დავით უსუფაშვილმა.

მისივე განმარტებით,უბლოკო სტატუსთან დაკავშირებული საკითხი, პარლამენტის ბიუროს მხრიდან რეაგირებას დადგენილ ვადაში ითხოვს. პარლამენტის თავმჯდომარემ მიიღო გადაწყვეტილება, ხსენებული საკითხის განხილვა ოთხშაბათის ბიუროს სხდომაზე სცადონ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან