2016-08-10 14:52:26, 989 ნახვა

---

კობახიძე: საკონსტიტუციო სასამართლოზე ზეწოლას არა ეკა ბესელია, არამედ „ნაციონალური მოძრაობა“ ახორციელებს

საპარლამენტო უმრავლესობის წევრის მანანა კობახიძის განცხადებით, ეკა ბესელია და გედევან ფოფხაძის მიმართვა საქართველოში აკრედიტებულ დიპლომატიური კორპუსისთვის პოლიტიკური განცხადებაა და პარლამენტარებს სწორედ მნიშვნელოვან საკითხზე სწორი პოლიტიკური შეფასების გაკეთება ევალებათ. 

როგორც კობახიძემ „ექსპრესნიუსს“ განუცხადა, საკონსტიტუციო სასამართლოს პირველი კოლეგია და თავმჯდომარე გიორგი პაპუაშვილი კვლავაც „ნაციონალების“ დაკვეთით მოქმედებენ და მოსამართლეები მათგან ნათესაურ-მეგობრული ურთიერთობის გავლენისგან ვერ გათავისუფლდნენ. 

„ეკა ბესელიასა და გედევან ფოფხაძის მიმართვა პოლიტიკური განცხადებაა და პარლამენტის წევრებს, ქვეყნისთვის მნიშვნელოვან საკითხზე სწორი პოლიტიკური შეფასების გაკეთება ევალებათ. სწორედ ამიტომ აქვს საკონსტიტუციო სასამართლოს პოლიტიკური დატვირთვა. საკონსტიტუციო სასამართლოს გადაწყვეტილებებს, შედეგის თვალსაზრისით, რა თქმა უნდა, აქვს როგორც სამართლებრივი, ასევე პოლიტიკური დატვირთვა.  საკონსტიტუციო სასამართლოს მიერ გაუქმებული კანონი, შედეგის თვალსაზრისით,  მოქმედებს არა მხოლოდ ერთ მოქალაქეზე, არამედ  მთელი ქვეყნის მასშტაბით ახდენს გავლენას.

2012 წლიდან მოყოლებული საკონსტიტუციო სასამართლოს საქმიანობის ძალიან კარგი ანალიზია ჩატარებული. კონკრეტული ფაქტებითა და არგუმენტებით არის გამყარებული, რომ ეს ორგანო „ერთიანი ნაციონალური“ მოძრაობის მმართველობის პერიოდში,  ამ პარტიის დაკვეთებს ასრულებდა. განსაკუთრებით პირველი კოლეგიის მოსამართლეები, რომლებიც პირადად იყვნენ „ნაციონალური მოძრაობის“ ლიდერებთან ნათესაური და მეგობრული ურთიერთობებით  დაკავშირებული და ახლაც ვერ გათავისუფლდნენ ამ გავლენებისგან. ისინი კვლავ ამ პარტიის დაკვეთით მოქმედებენ. ეს განსაკუთრებით გიორგი პაპუაშვილს ეხება.

„ნაციონალური მოძრაობის“ მიერ  სენსიტიურ თემებზე წარდგენილ სარჩელებს ხშირად პირველი კოლეგიის სამი მოსამართლე განიხილავდა. პოლიტიკურ საქმეების განხილვა დაჩქარებული წესით მიმდინარეობდა, მაშინ როდესაც მოქალაქეების მიერ წარდგენილი სარჩელები წლობით თაროებზეა შემოდებული. გარდა ამისა, საკონსტიტუციო სასამართლოს მიერ ხელისუფლების მიერ  დაწყებული მნიშვნელოვანი რეფორმების შეჩერება ხდებოდა. მაგალითად, ეს ეხებოდა მოსმენებს თემას, საზოგადოებრივი მაუწყებლის შესახებ მომზადებულ კანონსა და ა.შ. ეს მათი მხრიდან „ნაციონალური მოძრაობის“ მიერ პოლიტიკური დაკვეთის შესრულება იყო. ბესელიასა და ფოფხაძის მიმართვას მოსამართლეებზე ზეწოლად ვვერ შევაფასებ, ზეწოლას პირველი კოლეგიის მოსამართლეებზე „ნაციონალური მოძრაობა“ ახორციელებს. თუმცა, კარგია, რომ მოსამართლეთა უმრავლესობა მსგავსი წნეხისგან გათავისუფლდა. ეს სწორედ ჩვენს მიერ განხორციელებული რეფორმის დამსახურებაა, რითაც მოსამართლეებს მეტი გარანტიები მივეცით”- აცხადებს კობახიძე.

შეგახსენებთ, რომ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია და მისი მოადგილე გედევან ფოფხაძე ქართულ საზოგადოებას და საქართველოში აკრედიტებულ დიპლომატიურ კორპუსს მიმართავენ.

როგორც მიმართვაშია ნათქვამი, მათი განცხადების მიზანია ქართულ საზოგადოებასა და საერთაშორისო თანამეგობრობას კიდევ ერთხელ აჩვენონ ”ნაციონალური მოძრაობის” სახე, ამჯერად მის მიერ საკონსტიტუციო სასამართლოს პოლიტიკურ იარაღად გამოყენების მცდელობის მაგალითზე”.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი