ზურაბ პატარაძემ მწვანე კონცხზე მიმდინარე სამუშაოები დაათვალიერა

2016-07-20 20:11:08, 914 ნახვა

საზოგადოება

ზურაბ პატარაძემ ტურისტული სეზონისთვის მნიშვნელოვანი კიდევ ერთი ობიექტი დაათვალიერა და ადგილზე გაეცნო არსებულ მდგომარეობას.

როგორც "ექსპრესნიუს" აჭარის მთავრობის ადმინისტრაციის პრესსამსახურიდან აცნოებს, ბათუმის ბოტანკურ ბაღში და მის მიმდებარე ტერიტორიაზე უპრეცედენტო სარეაბილიტაციო სამუშაოები მიმდინარეობს. დასასრულს უახლოვდება ახალი სანიაღვრე სისტემების და ბორდიურების მოწყობა, დასრულდა სასეირნო პირსი, რომელზეც მოეწყო ლითონის მოაჯირები და გარე განათება. პირსის სავალ ნაწილზე, 131,5 გრძ.მ-ზე, დაიგო 664 კვ.მ ხის ფაქტურის ბეტონი არმირებული საფარით. მწვანე კონცხის ტერიტორიაზე ფართოვდება ქუჩები, რომელთა კეთილმოწყობისთვის ქალაქ ბათუმის მერიის ბიუჯეტიდან 2 მილიონ 387 ათას 21 ლარი დაიხარჯება.

მთავრობის თავმჯდომარემ ქალაქ ბათუმის მერისგან მოისმინა სრული ინფორმაცია მიმდინარე და დაგეგმილ სამუშაოებზე. ზურაბ პატარაძემ მერს თხოვნით მიმართა რაცშეიძლება მოკლე ვადებში დასრულდეს ბოტანიკური ბაღის მიმდებარე ტერიტორიის კეთილმოწყობა.

„დასრულების სტადიაშია ერთ-ერთი მნიშვნელოვანი ინფრასტრუქტურული პროექტი-მწვანე კონცხი, ბოტანიკური ბაღის მიმდებარე ტერიტორია. ეს ძალიან მნიშვნელოვანი ტურისტული ადგილია. როგორც ხედავთ, გამოიცვალა საფარი, იგება ახალი ასფალტი, მოეწყო ბორდიურები, მოწესრიგდა სანიაღვრე და საკანალიზაციო სისტემები, რაც ხელს შეუწყობს როგორც ტურიზმის, ისე რეგიონის ინფრასტრუქტურის განვითარებას" - აღნიშნა ზურაბ პატარაძემ.