იუსტიციის მინისტრი  თეა წულუკიანი ვენაში გამართულ გლობალურ კონფერენციაში − „ბავშვის მიმართ ფიზიკური დასჯისა და ძალადობის წინააღმდეგ“  - მონაწილეობს.

იუსტიციის სამინისტროს ინფორმაციით, თეა წულუკიანმა მეორე გლობალური კონფერენციის მონაწილეებს სიტყვით მიმართა და ბავშვთა უფლებების დასაცავად ქვეყანაში განხორციელებული და მიმდინარე რეფორმების შესახებ ისაუბრა. 

კერძოდ, მინისტრმა თავის გამოსვლაში ხაზი გაუსვა სტამბულის კონვენციის რატიფიკაციასა და თანმდევ ცვლილებათა პაკეტს, რომელიც ოჯახსა და მის გარეთ ბავშვზე ძალადობის ფაქტებს აღკვეთს.

გარდა ამისა, მინისტრმა ქუჩაში მცხოვრები და მომუშავე ბავშვების დასაცავად იუსტიციის სამინისტროს მიერ მომზადებულ საკანონმდებლო ცვლილებებზე ისაუბრა, რომელიც ქუჩაში მცხოვრები ბავშვების რეგისტრაციისა და სახელმწიფო სერვისების მიღების პრობლემას მოაგვარებს და, ასევე, ბავშვზე ძალადობის შემთხვევაში სწრაფი რეაგირების მექანიზმის შემოღებას ითვალისწინებს.

თეა წულუკიანმა თავის გამოსვლაში ყურადღება გაამახვილა სკოლაში რეფერირების მექანიზმსა და საქართველოში ცოტა ხნის წინ მიღებულ „არასრულწლოვანთა მართლმსაჯულების კოდექსზე“, რომელიც თვისობრივად ცვლის კანონთან კონფლიქტში მყოფ არასრულწლოვანთა მიმართ სახელმწიფოს მიდგომას და მას გაცილებით ლიბერალურს ხდის. 

„საქართველოს მთავრობამ ბავშვებისა და არასრულწლოვნების ძალადობის ნებისმიერი ფორმისგან დასაცავად მნიშვნელოვანი რეფორმები და ღონისძიებები გაატარა. ამ კონფერენციას ერთი და ძლიერი მიზანი აქვს −სახელმწიფომ არ დაუშვას ოჯახსა თუ სკოლაში ბავშვზე ფიზიკური ძალადობა, მათ შორის, ფიზიკური დასჯა როგორც აღზრდის მეთოდი. ორი დღის განმავლობაში მიმდინარეობს მსჯელობა იუსტიციის მინისტრებს, ექსპერტებსა თუ სხვა მაღალი რანგის საერთაშორისო ორგანიზაციების წარმომადგენლებს შორის, როგორ გავაუმჯობესოთ ყველა ტიპის კანონი იმისათვის, რომ დავიცვათ ბავშვი ძალადობისგან; იმისათვის, რომ არც ქუჩაში, არც ოჯახში, არც საგანმანათლებლო დაწესებულებაში ბავშვზე ფიზიკური ძალადობა არ განხორციელდეს“, − განაცხადა თეა წულუკიანმა.

მეორე გლობალური კონფერენცია „ბავშვის მიმართ ფიზიკური დასჯისა და ძალადობის წინააღმდეგ“ ვენაში 1 ივნისს გაიხსნა და ის, როგორც 2014 წელს შვედეთში, ბავშვთა დაცვის საერთაშორისო დღეს მიეძღვნა. კონფერენცია შვედეთის დედოფალმა გახსნა. ღონისძიებას 70 ქვეყნის 20-მდე იუსტიციის მინისტრი, ექსპერტები და იმ საერთაშორისო ორგანიზაციების ხელმძღვანელები ესწრებიან, რომლებიც მთელ მსოფლიოში ბავშვთა უფლებების გაუმჯობესებისთვის მუშაობენ.

ვენაში ვიზიტის ფარგლებში საქართველოს იუსტიციის მინისტრი ხვალ ავსტრიის რესპუბლიკის იუსტიციის ფედერალურ მინისტრს შეხვდება; დღეს კი თეა წულუკიანი საქართველოს საელჩოში დაგეგმილ ღონისძიებაში მიიღებს მონაწილეობას, რომელიც საქართველოს დამოუკიდებლობის აღდგენის 25 წლისთავს ეძღვნება.

იუსტიციის მინისტრის ვიზიტი ავსტრიაში 3 ივნისს დასრულდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რატომ ასამარებს ივანიშვილის რეჟიმი საქართველოს განათლების მყიფე რეპუტაციას, ბარიერები უცხოელი სტუდენტებისთვის

ივანიშვილის პარლამენტში თავისუფალი და კრიტიკული მედიის და ჟურნალისტების აკრედიტაცია შეუძლებელი ხდება

ცხინვალის დე ფაქტო პრემიერ-მინისტრმა თანამდებობა დატოვა.

ბოჭორიშვილი - საქართველოს ტერიტორიის ოკუპაცია მთელი რეგიონისთვის უსაფრთხოების გამოწვევას წარმოადგენს