საგადასახადო ადმინისტრირების რეფორმა, ქართველი და უცხოელი ბიზნესმენებისთვის მომსახურების ერთიანი ფრონტოფისის შექმნა, სასამართლო სისტემის რეფორმა, მეწარმეთა შესახებ კანონში ცვლილებები და გაკოტრების რეფორმა იყო მთავარი თემები, რომელზეც ინვესტორთა საბჭომ, პრემიერ-მინისტრ გიორგი კვირიკაშვილის ხელმძღვანელობით, დღეს გამართულ სხდომაზე იმსჯელა.

საბჭოს წევრებმა კიდევ ერთხელ გაუსვეს ხაზი საგადასახადო რეფორმის მნიშვნელობას და კმაყოფილება გამოთქვეს მთავრობის გადაწყვეტილებასთან დაკავშირებით, რომელიც საგადასახადო სისტემის ე.წ ესტონური მოდელის 2017 წლის პირველი იანვრიდან ამოქმედებას გულისხმობს.

სხდომაზე ასევე აღინიშნა, რომ მიმდინარეობს მუშაობა ერთიანი ფრონტოფისის კონცეფციაზე, სადაც ქართული და უცხოური ბიზნესის წარმომადგენლები ყველა სახელმწიფო სერვისის მიღებას შეძლებენ. ამ თემაზე ინვესტორთა საბჭოს სამუშაო ჯგუფსა და ეკონომიკის სამინისტროს წარმომადგენლებს შორის რამდენიმე შეხვედრა უკვე გაიმართა.

სხდომის დღის წესრიგით გათვალისწინებული ერთ-ერთი საკითხი იყო სასამართლო სისტემის რეფორმა. საბჭოს წევრებმა თავიანთი ხედვები წარადგინეს, რომელთა ნაწილს სასამართლოს სისტემის რეფორმის მესამე ტალღა ითვალისწინებს. სხდომაზე მოწვეულმა იუსტიციის მინისტრმა, თეა წულუკიანმა აღნიშნა, რომ კანონპროექტი, რომელსაც პარლამენტი მესამე მოსმენით კენჭს მომავალ კვირას უყრის, მოიცავს იმ კომპონენტებს, რომლებსაც ინვესტორთა საბჭოს წევრები მნიშვნელოვნად მიიჩნევენ. მათ შორის არის, საქმეთა ელექტრონულად განაწილების წესი. იუსტიციის მინისტრი ასევე იზიარებს ინვესტორთა საბჭოს წევრების მოსაზრებას, რომ მედიაცია სასამართლოში გასაძლიერებელია.

ინვესტორთა საბჭოს წევრებმა იმედი გამოთქვეს, რომ იუსტიციის სამინისტრო მათ მოსაზრებებს მეწარმეთა შესახებ კანონზე მუშაობის პროცესშიც გაითვალისწინებს.

სხდომაზე საუბარი გაკოტრების რეფორმასაც შეეხო. როგორც ეკონომიკისა და მდგრადი განვითარების მინისტრმა დიმიტრი ქუმსიშვილმა აღნიშნა, კანონპროექტის გადახდისუუნარობასთან დაკავშირებული ნაწილი პარლამენტში უკვე წარდგენილია. საბჭოს წევრებმა გამოთქვეს სურვილი, შეიქმნას სამუშაო ჯგუფი, რომლის ფარგლებში, ეკონომიკისა და იუსტიციის სამინისტროებთან თანამშრომლობით, კანონპროექტის კონცეფციის გაცნობას საშუალება მიეცემათ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

Euromoney Markets Awards - თიბისი საქართველოში ობლიგაციების ბაზრის საუკეთესო ბანკია

ევროპარლამენტის ვიცე-პრეზიდენტმა ოლეშკიში ჰუმანიტარული კატასტროფის გამო შიმშილობა გამოაცხადა

ტრამპის სპეციალური წარმომადგენელი მოლაპარაკებებისთვის რუსეთში გაემგზავრა

მთავრობის ადმინისტრაცია ილია მეორის დაკრძალვის ხარჯებზე - სარეზერვო ფონდიდან 3 მილიონი გამოიყო, შემდეგ კი ეს თანხა 722 645 ლარამდე დაკორექტირდა და 2 277 355 ლარი ბიუჯეტში დაბრუნდა