გიგი თევზაძის შეფასებით, ევრაზიულ კავშირში გაწევრიანების მომხრეთა შემცირება, რუსეთის ბოლოდროინდელ ქმედებებს უკავშირდება

2016-04-11 13:05:31, 356 ნახვა

პოლიტიკა

ილიას სახელმწიფო უნივერსიტეტის პროფესორის გიგა თევზაძის შეფასებით, არ აქვს საფუძველი, ეროვნულ-დემოკრატიული ინსტიტუტის (NDI) საზოგადოებრივი კვლევის შედეგებს არ ენდოს.

როგორც თევზაძემ "ქსპრესნიუსს" განუცხადა, NDI-ს კვლევები ყოველთვის სანდოა და მას ის პოლიტიკოსები არ ენდობიან, რომელთა საწინააღმდეგოდაც კვლევის შედეგები მეტყველებს.

"NDI ავტორიტეტული ორგანიზაციაა. არანაირი საფუძველი არ მაქვს, არ ვენდო NDI-ს მიერ შერჩეულ ორგანიზაციას, რომელმაც კვლევა ჩაატარა", - აღნიშნა თევზაძემ.

რაც შეეხება უშუალოდ კვლევის შედეგებს, თევზაძის შეფასებით, ის არც ერთი პოლიტიკური პარტიისთვის არაა სახარბიელო.

"ეს შედეგები მოსალოდნელიც იყო. ძალიან ბევრი რამ გადაწყდება თვითონ საარჩევნო კამპანიის პერიოდში და აქედანვე ჩანს, რომ ვერც ერთი პარტია ვერ დააგროვებს უმრავლესობას და არჩევნების შემდეგ უნდა ველოდოთ ცხადია, ძალების შიდაპარლამენტურ გადანაწილებას", - აღნიშნა გიგი თევზაძემ.

კვლევის მიხედვით, ევრაზიულ კავშირში გაწევრიანების მომხრეთა პროცენტული რაოდენობა დაკლებულია. თევზაძე არ გამორიცხავს, რომ ეს განპირობებული იყოს წინა კვლევის შემდეგ, ევროკავშირისა და ევრაზიული კავშირის შესახებ მოსახლეობისთვის განმარტებების გაკეთებით, თუმცა, უფრო მეტად მიიჩნევს, რომ ევრაზიულ კავშირში გაწევრიანების მომხრეთა რიცხვის დაკლება, ბოლო დროის პოლიტიკურ მოვლენებს უკავშირდება, საიდანაც ბევრისთვის რუსეთის ქმედებები უფრო ცხადი გახდა:

"შესაძლებელია ასეც არის, თუმცა, ამ ბოლო დროს რუსეთის მოქმედებები უფრო მეტი ადამიანისთვის არის ცხადი. განსაკუთრებით ეს გამოიკვეთა უკრაინასთან, სირიასთან მიმართებაში, სომხეთთან დამოკიდებულებაზეც იმოქმედა იმიტომ, რომ რუსეთი არის ცნობილი, როგორც სომხეთის მხარდამჭერი. ასე რომ, ვფიქრობ, იმოქმედა არა მარტო განმარტებებმა, არამედ ბოლო დროის პოლიტიკურმა მოვლენებმა", - აღნიშნა გიგი თევზაძემ.

ეროვნულ–დემოკრატიული ინსტიტუტისა (NDI) და მისი პარტნიორი ორგანიზაცია CRRC–საქართველოს მიერ წარმოდგენილი საზოგადოებრივი აზრის უახლესი კვლევის შედეგების თანახმად, მოსახლეობაში ქვეყნის განვითარების კურსთან დაკავშირებით მზარდი უკმაყოფილება შეინიშნება. მოსახლეობის უმრავლესობა მიიჩნევს, რომ ყველაფრის გათვალისწინებით, 2012 წლის შემდეგ მათი მდგომარეობა გაუარესდა (42 პროცენტი) ან არ შეცვლილა (47 პროცენტი); მხოლოდ 10 პროცენტს მიაჩნია, რომ მათი მდგომარეობა გაუმჯობესდა.

მოსახლეობის უმრავლესობის აზრით, საქართველო არასწორი მიმართულებით ვითარდება (39 პროცენტი) ან საერთოდ არ ვითარდება (36 პროცენტი). ამასთან, უმეტესობა მიიჩნევს, რომ ხელისუფლება არ ახორციელებს მათთვის მნიშვნელოვან ცვლილებებს.

მოქალაქეებს განსაკუთრებით აწუხებთ ქვეყნის ეკონომიკური მდგომარეობა. მოსახლეობის მხოლოდ 2 პროცენტი მიიჩნევს, რომ საქართველოს ეკონომიკა კარგ მდგომარეობაშია. მოსახლეობისთვის ყველაზე მნიშვნელოვანი ეროვნული საკითხები სამუშაო ადგილები (57 პროცენტი), ფასების ზრდა/ინფლაცია (35 პროცენტი) და სიღარიბეა (30 პროცენტი). მართალია, ქართული ოცნება-დემოკრატიული საქართველოს მხარდამჭერები შედარებით უფრო დადებითად აფასებენ ქვეყნის ეკონომიკურ მდგომარეობას, თუმცა მთლიანობაში მოსახლეობის უმეტესობა (81 პროცენტი) ამ პრობლემების გამო პასუხისმგებლობას ამჟამინდელ ხელისუფლებას აკისრებს, რასაც მოსდევს წინა ხელისუფლების პასუხისმგებლობა (59 პროცენტი) და გლობალური ეკონომიკური გამოწვევები (53 პროცენტი).

პარტია „ქართული ოცნება-დემოკრატიული საქართველოს“ მხარდაჭერების უმეტესობაც ეკონომიკური პრობლემების გამომწვევ ერთ-ერთ მთავარ მიზეზად მოქმედი ხელისუფლების შეცდომებს ასახელებს.

გამოკითხვის თანახმად, მოქალაქეები უკეთესობას ხედავენ ჯანდაცვის სფეროში. მოსახლეობის 51 პროცენტმა განაცხადა, რომ 2012 წლის შემდეგ ამ სფეროში მდგომარეობა გაუმჯობესდა. 38 პროცენტმა კი აღნიშნა, რომ სიტუაცია ასევე გაუმჯობესდა სიტყვის თავისუფლების კუთხით.

რაც შეეხება საგარეო პოლიტიკას, მოსახლეობა კვლავაც მყარად უჭერს მხარს საქართველოს გაწევრიანებას ევროკავშირსა და ნატოში. ალიანსში გაწევრიანების მომხრეთა მაჩვენებელი 68 პროცენტს შეადგენს, ევროკავშირის მომხრეთა რაოდენობა კი, გასული წლის აგვისტოს შემდეგ 61 პროცენტიდან 77 პროცენტამდე გაიზარდა. მოსახლეობის უმეტესობა (54 პროცენტი) მიიჩნევს, რომ საქართველო მეტ სარგებელს მიიღებს ევროპული და ევროატლანტიკური ინტეგრაციით, მაშინ როცა 27 პროცენტის აზრით, საქართველომ რუსეთთან უკეთესი ურთიერთობების დამყარების სანაცვლოდ უარი უნდა თქვას ევროპულ და ევროატლანტიკურ ინტეგრაციაზე.

ბოლო მაჩვენებელი განსაკუთრებით მაღალია ეთნიკური უმცირესობების დასახლებებში. მოსახლეობის უმრავლესობა (86 პროცენტი) კარგად არის ინფორმირებული დეკემბერში ევროკავშირის მიერ გამოცემულ პოზიტიურ შეფასებასთან დაკავშირებით, რაც საქართველოს მიერ ვიზა ლიბერალიზაციის სამოქმედო გეგმის შესრულებას უკავშირდებოდა. მოქალაქეების უმრავლესობა (84 პროცენტი) მხარს უჭერს ამ გადაწყვეტილებას და სჯერა, რომ ევროკავშირთან უვიზო მიმოსვლა მათთვის სასარგებლო იქნება (72 პროცენტი).

მთლიანობაში, მოსახლეობის აზრით, საქართველოს საგარეო კურსი პრო-დასავლური უნდა იყოს, თუმცა უმრავლესობას საგარეო პოლიტიკასთან დაკავშირებით საკმაოდ მრავალმხრივი დამოკიდებულება აქვს: მოსახლეობის 52 პროცენტის შეფასებით, ქვეყანას პრო-დასავლური კურსი უნდა ეჭიროს, თუმცა რუსეთთანაც კარგი ურთიერთობა უნდა ჰქონდეს. მოსახლეობის 14 პროცენტს მიაჩნია, რომ საქართველომ უბრალოდ პროდასავლური პოლიტიკა უნდა გაატაროს.

გამოკითხვა 2016 წლის 23 თებერვლიდან - 14 მარტის პერიოდში, საქართველოს მასშტაბით 3,900 პირისპირ ინტერვიუს წარმომადგენობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 1,6%.

NDI-ის კვლევებს აფინანსებს შვედეთის საერთაშორისო თანამშრომლობის განვითარების სააგენტო (Sida) და ატარებს CRRC-საქართველო.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან