გვარამია: თუ ეს კანონი დაკმაყოფილდა, საბჭოთა მემკვიდრეობა დაამარცხებს ეროვნულ მოძრაობას

2026-10-28 19:55:02, 248 ნახვა

პოლიტიკა

კოალიცია ცვლილებისთვის ერთ-ერთი ლიდერის, ნიკა გვარამიას თქმით, პარტიების აკრძალვის შესახებ სარჩელის დაკმაყოფილების შემთხვევაში ბადრი ჯაფარიძე, რომელიც საქართველოს დამოუკიდებლობის დეკლარაციის ხელმომწერია, პოლიტიკურად გაუქმდება, მაშინ როცა სარჩელს ხელს აწერენ ადამიანები, რომლებსაც ის კანონიერი ხელისუფლების იარაღით დამხობაში ადანაშაულებს. მისივე თქმით, ოპოზიციონერი პოლიტიკოსების აკრძალვის მოთხოვნის დაკმაყოფილება "კომუნისტური რევანში" იქნება და საბჭოთა მემკვიდრეობას ეროვნული მოძრაობის დამარცხების შესაძლებლობას მისცემს.

"არ შემიძლია ხაზი არ გავუსვა იმ კატასტროფას, რომლის წინაშეც დღეს საქართველო რამდენიმე ადამიანმა დააყენა, მათ შორის ამ დარბაზში მყოფმა ადამიანებმაც. დარბაზში დღეს ბატონი ბადრი არ არის, მაგრამ აუცილებლად მინდა ვთქვა, დღეს ამ გადაწყვეტილებით, რომელსაც ითხოვს საქართველოს პარლამენტის 80 დეპუტატი, მარტივად რომ ვთქვათ, გაუქმდება, როგორც პოლიტიკოსი, ბადრი ჯაფარიძე. ეს ის კაცია, რომელმაც დამოუკიდებლობის დეკლარაციას ხელი მოწერა. სამაგიეროდ, ისინი, ვინც კანონიერი ხელისუფლება გადააგდო იარაღით აი, ამ სარჩელს აწერს ხელს.

მე არ გადავალ სახელებზე და გვარებზე აბსოლუტურად შეგნებულად, არც ოჯახის წევრებს წევრებამდე ჩავყვები, მაგრამ ეს ასეა. აი, ასეთი შებრუნებული, გამრუდებული რეალობა გვაქვს.

...საბჭოთა მემკვიდრეობა დღეს, თუ ეს კანონი დაკმაყოფილდა, დაამარცხებს ეროვნულ მოძრაობას. 31 წლის შემდეგ შედგება კომუნისტური რევანში ამ ქვეყანაში, რისი იმედიც მაქვს, რომ არ იქნება დაშვებული სასამართლოს მიერ", — განაცხადა გვარამიამ.