ევროკავშირი რუსეთის წინააღმდეგ 2022 წელს რუსული არმიის უკრაინაში სრულმასშტაბიანი შეჭრის დაწყებიდან „ყველაზე მკაცრი“ სანქციების დაწესებას ემზადება, განაცხადა საფრანგეთის საგარეო საქმეთა მინისტრმა ჟან-ნოელ ბარომ.

მან გაიხსენა, რომ აშშ-ის პრეზიდენტის, დონალდ ტრამპის მიერ შემოთავაზებული 30-დღიანი ცეცხლის შეწყვეტის ნაცვლად, რუსეთმა უკრაინის ქალაქებზე დარტყმების რაოდენობა ხუთჯერ გაზარდა.

„ეს აღარ შეიძლება გაგრძელდეს, ეს უნდა შეწყდეს. ამის მისაღწევად, ევროპა, ამერიკელ სენატორებთან კოორდინაციით და საფრანგეთის წინადადებების საფუძველზე, ემზადება რუსეთის წინააღმდეგ ბოლო სამი წლის განმავლობაში ყველაზე მკაცრი სანქციების დაწესებისთვის. ისინი პირდაპირ გამოწურავენ იმ რესურსებს, რომლებიც [რუსეთის პრეზიდენტ] ვლადიმერ პუტინს საშუალებას აძლევს, გააგრძელოს ომი“, - განაცხადა ბარომ.

შეზღუდვების ახალი პაკეტი გავლენას მოახდენს არა მხოლოდ ენერგეტიკის სექტორზე, კერძოდ, ნავთობის ექსპორტიდან მიღებულ შემოსავლებზე, არამედ „რუსეთისა და სხვა ქვეყნების ფინანსური მოთამაშეების ინტერესებზეც“, ხაზგასმით აღნიშნა საფრანგეთის საგარეო საქმეთა სამინისტროს ხელმძღვანელმა. მისი თქმით, ფიზიკური და იურიდიული პირების წყალობით, რომლებიც კრემლს დასავლეთის სანქციების გვერდის ავლაში ეხმარებიან, მოსკოვი კვლავ ინარჩუნებს ომის წარმოების შესაძლებლობას. თუმცა, როგორც ბარომ აღნიშნა, „პუტინი ფრონტზე აღარ მიიწევს წინ“ და „საცხოვრებელი ტერიტორიების დრონებითა და რაკეტებით დაბომბვით შემოიფარგლება“. „ეს მშვიდობიან მოსახლეობაში მრავალრიცხოვან მსხვერპლს იწვევს. ეს უნდა შეწყდეს“, - დაასკვნა საფრანგეთის საგარეო საქმეთა მინისტრმა.

რუსული არმიის უკრაინაში სრულმასშტაბიანი შეჭრის დაწყებიდან ევროკავშირმა მოსკოვის წინააღმდეგ სანქციების 17 პაკეტი მიიღო. თუმცა, მე-18 პაკეტი, რომლის დამტკიცებაც ივნისის ბოლოს იყო დაგეგმილი, სლოვაკეთის წინააღმდეგობის გამო არ დამტკიცდა და გადაიდო. კერძოდ, ამ პაკეტის ფარგლებში შემოთავაზებული იყო რუსული ნავთობის „ფასების ჭერის“ შემცირება ბარელზე 60 დოლარიდან 45 დოლარამდე, აკრძალვის დაწესება Nord Stream-ისა და Nord Stream 2-ის გაზსადენებთან ტრანზაქციებზე, ასევე იმ ბანკებთან, რომლებიც შეზღუდვებს გვერდის ავლით დააღწევენ თავს.

ამასობაში, აშშ-ის სენატი ივლისის დასაწყისში რუსეთის წინააღმდეგ სანქციების „გამანადგურებელი“ კანონპროექტის განხილვას გეგმავდა. დოკუმენტი შეერთებულ შტატებთან ვაჭრობაზე 500%-იანი გადასახადის დაწესებას ითვალისწინებს ყველა იმ ქვეყნისთვის, რომელიც რუსული ნავთობის, გაზის, ურანის და სხვა რესურსების შეძენას შეძლებს. ინიციატივის ავტორმა, რესპუბლიკელმა სენატორმა ლინდსი გრეჰემმა ადრე განაცხადა, რომ პრეზიდენტმა დონალდ ტრამპმა მოუწოდა მას „წინ წასულიყო“ რუსეთის წინააღმდეგ სანქციების გამკაცრების საკითხთან დაკავშირებით.

ავტორი: ექსპრესნიუსი,

სოციალური ქსელები

World Justice Project- საქართველოს კანონის უზენაესობის საერთო მაჩვენებელი წლევანდელ ინდექსში 2%-ით შემცირდა, კანონის უზენაესობის ვარდნაში რეგიონში პირველია

Tasnim: უკრაინამ ირანის მიმდებარე ქვეყნებში მიკროდრონების ქსელი განალაგა

ვენსმა უარი თქვა ნეთანიაჰუს მხარდაჭერაზე არჩევნებში, ტრამპის მხარდაჭერის მიუხედავად

ოსლოში შეხვედრაზე ვიტკოფი ზელენსკის თხოვს დათმოს უკრაინის ტერიტორიები პუტინისთვის - The New York Times