„საქართველო არასწორი მიმართულებით მიდის - ეს არის დღევანდელი გზავნილი,“ - ამის შესახებ გერმანელმა დეპუტატმა, ევროპის საბჭოს საპარლამენტო ასამბლეაში გერმანიის დელეგაციის წევრმა, ფრანკ შვაბემ განაცხადა, ევროპის საბჭოს საპარლამენტო ასამბლეაში, სადაც საქართველოს დელეგაციის უფლებამოსილების აღიარება-არაღიარების საკითხი განიხილებოდა.

„ძვირფასო მოქმედო ხელისუფლების წარმომადგენლებო საქართველოში, ევროპის საბჭო ყოველთვის იყო მრავალმხრივი ორგანიზაცია ევროპაში და მას აქვს ერთი მთავარი ამოცანა - მხარი დაუჭიროს ქვეყნებს, რომლებიც მეტი დემოკრატიის, მეტი ადამიანის უფლებების, მეტი კანონის უზენაესობის გზას ადგანან, მაგრამ საქართველო სხვა გზას ადგას, ის მიდის არასწორი მიმართულებით - ეს არის დღევანდელი გზავნილი. ის ადგას ნაკლები დემოკრატიული სტანდარტების, ნაკლები ადამიანის უფლებების, ნაკლები კანონის უზენაესობის და დამოუკიდებელი სასამართლო სისტემის პატივისცემის, ნაკლები ევროპის გზას. ჩვენ არა მხოლოდ შეშფოთებული ვართ, როგორც ბევრ სხვა ანგარიშშია აღნიშნული, არამედ მზად ვართ ვიმოქმედოთ და უკვე დღეს ვმოქმედებთ. ასევე, როგორც ანგარიშშია აღნიშნული, ჩვენ აუცილებლად დავბრუნდებით აპრილში, 100 პროცენტით დანამდვილებით, თქვენ აქ აპრილში დაბრუნებულებს გვიხილავთ,“ - აღნიშნა ფრანკ შვაბემ.

მისი თქმით, მხარს უჭერს საქართველოს დელეგაციისთვის გარკვეული პირობების წაყენებას და მათი უფლებების შეზღუდვას. ამასთან, მან საქართველოს ხელისუფლებას მოუწოდა, გაათავისუფლოს პოლიტიკური მიზეზით დაპატიმრებული ყველა პირი.

„მოგიწოდებთ, გააკეთოთ რამე: გთხოვთ, შეწყვიტოთ ძალადობა, პასუხისმგებლობა დააკისროთ მათ, ვინც დანაშაულები ნამდვილად ჩაიდინა, მოგიწოდებთ, გაათავისუფლოთ ისინი, რომლებიც პოლიტიკური მიზეზებით არიან დაპატიმრებული და განსაკუთრებით მინდა აღვნიშნო მზია ამაღლობელი. მე ვნახე ვიდეო და ნამდვილად რაღაც ხუმრობაა, რა არის ბრალდება და რა იქნება სასჯელი,“ - განაცხადა ფრანკ შვაბემ.

გერმანელმა დეპუტატმა საქართველოში ოქტომბრის საპარლამენტო არჩევნების დროს დაფიქსირებულ დარღვევებზე ისაუბრა და ხაზი გაუსვა, რომ „ერთადერთი გამოსავალი ამ კრიზისიდან არჩევნების ჩატარებაა.“

„მიიღეთ სერიოზულად, ჩვენ დღეს არ გიხურავთ კარს, მაგრამ ძალიან მკაფიო და სერიოულ გაფრთხილებას გაძლევთ, დაუბრუნდით ჩვენს ევროპულ გზას, დემოკრატიის, ადამიანის უფლებებისა და კანონის უზენაესობის გზას,“ - განაცხადა ფრანკ შვაბემ.

ავტორი: ექსპრესნიუსი,

სოციალური ქსელები

ტრამპის თქმით, თუ ირანთან სამშვიდობო შეთანხმების მიღწევა არ მოხდება, მაშინ აშშ დაბომბვას განაახლებს

ტერიტორია დაატოვებინეს აქტივისტს, რომელიც კობახიძის ბრიფინგის პარალელურად, კანცელარიასთან, საპროტესტო წარწერით მივიდა

2026 წლის მასწავლებლის ეროვნულ ჯილდოზე განაცხადების მიღება დაიწყო - პროექტის მხარდამჭერი „საქართველოს ბანკია“

ბოლო 5 თვეში მდინარაძემ კობახიძისგან მე 5-ე, გენერალ-მაიორის წოდება მიიღო