2025-01-27 20:09:45, 622 ნახვა

---

PACE-ის დელეგაციის ხელმძღვანელი - საქართველოს არჩევნები ჩატარდა მაღალი პოლარიზაციის ფონზე, დარღვევებმა დააზიანა ნდობა შედეგების მიმართ

PACE-ის (ევროპის საბჭოს საპარლამენტო ასამბლეის) დელეგაციის ხელმძღვანელმა იულიან ბულაიმ სტრასბურგში, ევროპის საბჭოს ზამთრის სესიაზე, საქართველოს საპარლამენტო არჩევნებთან დაკავშირებით რამდენიმე კრიტიკული საკითხი გამოკვეთა. მისი თქმით, არჩევნები ჩატარდა მაღალი პოლარიზაციისა და ანტაგონიზმის ფონზე, რაც მმართველ ძალასა და ოპოზიციას შორის დაპირისპირებით იყო გამოხატული.

„ჩვენ დავაკვირდით არჩევნებს ნატოსა და ეუთოს საპარლამენტო ასამბლეის დელეგაციებთან ერთად. ეს იყო პირველი არჩევნები საქართველოში, რომელიც მთლიანად პროპორციული სისტემით ჩატარდა. მმართველმა პარტიამ, „ქართულმა ოცნებამ“, 53.93% მიიღო, ბარიერი კიდევ ოთხმა პარტიამ გადალახა. თუმცა, იყო რიგი პრობლემები, რომლებიც სერიოზულ კითხვებს აჩენს,“ – განაცხადა ბულაიმ.

მისი თქმით, ფიქსირდებოდა ხმების მოსყიდვის, რამდენჯერმე ხმის მიცემისა და ამომრჩეველთა დაშინების შემთხვევები, განსაკუთრებით რეგიონებში. საარჩევნო უბნებზე დამონტაჟებული კამერები და ამომრჩეველთა კონტროლის მექანიზმები საზოგადოებაში შიშისა და ზედამხედველობის განცდას აჩენდა.

„ეს დარღვევები ძირის გამოთხრას ახდენდა საარჩევნო პროცესის გამჭვირვალობასა და შედეგების მიმართ ნდობას. გაჩნდა კითხვები, გამოხატავდა თუ არა ეს არჩევნები ქართველი ხალხის ნამდვილ სურვილს. ასევე, შეშფოთებას იწვევს სიძულვილის ენის გამოყენება სამოქალაქო საზოგადოების მიმართ და ზოგიერთი სახელმწიფო ინსტიტუტის მიუკერძოებლობა,“ – აღნიშნა ბულაიმ.

PACE-ის დელეგაციის ხელმძღვანელმა დასძინა, რომ აუცილებელია მეტი მუშაობა საარჩევნო გარემოს გაძლიერებისთვის, რათა საქართველოს დემოკრატიული პროცესები უფრო გამჭვირვალე და სანდო იყოს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი