2024-09-28 12:32:26, 709 ნახვა
ომი უკრაინაში
რუსებმა სუმში, სამედიცინო დაწესებულებაზე იერიში მიიტანეს - არის მსხვერპლი [ვიდეო]
რუსეთმა უკრაინაში, სუმის ოლქში მდებარე სამედიცინო დაწესებულებაზე ორმაგი თავდასხმა განხორციელა, რასაც 6 ადამიანის სიცოცხლე ემსხვერპლა. ამის შესახებ ინფორმაციას უკრაინული მედია შინაგან საქმეთა მინისტრ იგორ კლიმენკოზე დაყრდნობით ავრცელებს.
მინისტრის განცხადებით, პირველი დარტყმის შედეგად ერთი ადამიანი დაიღუპა, საავადმყოფოს რამდენიმე სართული კი დაინგრა.
მისივე თქმით, მეორე იერიში მაშინ განხორციელდა, როდესაც პაციენტებისა და პერსონალის ევაკუაცია მიმდინარეობდა.
"სუმში რუსებმა ორჯერ დაარტყეს სამედიცინო დაწესებულებას. ამ დროისთვის 6 ადამიანი დაიღუპა",- დაწერა კლიმენკომ სოციალურ ქსელში.
გარდაცვლილთა შორის ერთი პოლიციელია. კიდევ ერთი სამართალდამცველი კი დაშავდა.
ავტორი: ექსპრესნიუსი,
epn.ge (@expressnews.ge)
