2023-12-31 10:56:48, 1690 ნახვა

---

ცნობილი ადამიანები, რომლებიც 2023 წელს გარდაიცვალნენ

2023 წელს საქართველოსა და მსოფლიოს ბევრი ცნობილი ადამიანი დააკლდა, მათ შორის ყველასთვის საყვარელი მწერლები, მსახიობები, მომღერლები, რეჟისორები, მუსიკოსები თუ სხვა სფეროში წარმატებული ადამიანები.

წლის ბოლოს კიდევ ერთხელ ვიხსენებთ ადამიანებს, რომლებიც 2023 წელს გარდაიცვალნენ.

• ზურაბ ქარუმიძე

2023 წლის 12 დეკემბერს, 66 წლის ასაკში მწერალი ზურაბ ქარუმიძე გარდაიცვალა.

ზურაბ ქარუმიძეს მიღებული აქვს ლიტერატურული პრემიები - 2018 წელს ლიტერატურული პრემია „ლიტერა“ რომანისთვის „მოგზაურობა ევროპაში“; 2010 წელს პრემია „საბა“ წიგნისთვის „ჯაზის ცხოვრება“. გარდა ამისა, ქარუმიძეს ეკუთვნის ინგლისურ ენაზე დაწერილი რომანი Dagny or a Love Feast-ი.

აღსანიშნავია ასევე, რომ ქარუმიძე საქართველოში გამოცემულ ინგლისურენოვან ჟურნალებსაც რედაქტორობდა.

• ოთარ იოსელიანი

2023 წლის 17 დეკემბერს, 89 წლის ასაკში ქართველი კინორეჟისორი, საქართველოს სახალხო არტისტი და ხელოვნების დამსახურებული მოღვაწე ოთარ იოსელიანი გარდაიცვალა.

ოთარ იოსელიანმა გადაიღო მოკლემეტრაჟიანი ფილმები: „აკვარელი“; „აპრილი“; „გიორგობისთვე“, რომლისთვისაც მან კანის კინოფესტივალის სპეციალური კინოპრესის ჯილდო და ჟორჟ სადულის პრიზი დაიმსახურა საუკეთესო სადებიუტო ნამუშევრისთვის.

გარდა ამისა იოსელიანი ისეთი ფილმების რეჟისორია, როგორებიცაა: „იყო შაშვი მგალობელი“; „პასტორალი“; „ბასკთა ქვეყანაში“ „მთვარის რჩეულნი“; „პეპლებზე ნადირობა“; „ყაჩაღები“; „მშვიდობით მწვანე მდელო“ ; „ძველი ქართული სიმღერა“; „თუჯი“ და „საპოვნელა“.

• ლიზა მერი პრესლი

2023 წლის 12 იანვარს, 54 წლის ასაკში ამერიკელი მომღერალი, კომპოზიტორი და როკ-ენ-როლის მეფედ მიჩნეული ელვის პრესლის ერთადერთი შვილი ლიზა მერი პრესლი გარდაიცვალა.

კარიერის განმავლობაში, ლიზა მერი პრესლიმ სამი სტუდიური ალბომი გამოუშვა და ძველი ჩანაწერების გამოყენებით მამასთან, ელვის პრესლისთან დუეტი ჩაწერა.

• ლიზა ლორინგი

2023 წლის 28 იანვარს, 64 წლის ასაკში ამერიკელი მსახიობი ლიზა ლორინგი გარდაიცვალა. მაყურებელი ლორინგს უენსდეი ადამსის როლით იცნობდა.

ლიზა ლორინგი 1964-1966 წლებში თამაშობდა სიტკომში ადამსების ოჯახი. მოგვიანებით, მსახიობმა მხოლოდ რამდენიმე სატელევიზიო პროექტში ითამაშა და კარიერა დაასრულა.

• ვახტანგ (ბუბა) კიკაბიძე

2023 წლის 15 იანვარს, 84 წლის ასაკში გარდაიცვალა ქართველი კინომსახიობი, საესტრადო მომღერალი, სცენარისტი, კინორეჟისორი, სიმღერების ავტორი ვახტანგ (ბუბა) კიკაბიძე.

კიკაბიძე ვოკალურ-ინსტრუმენტული ანსამბლის - „ორერას“, წევრი იყო. წარმატებული მუსიკალური კარიერის პარალელურად, მონაწილეობდა ქართულ კინოფილმებში, რომელთა შორისაა: „არ დაიდარდო“; „მიმინო“ და „ვერის უბნის მელოდიები“.

• ჯემალ ღაღანიძე

2023 წლის 3 თებერვალს. 98 წლის ასაკში კინოსა და თეატრის ქართველი მსახიობი ჯემალ ღაღანიძე გარდაიცვალა.

ჯემალ ღაღანიძე რუსთაველის თეატრში დადგმულ არაერთ წარმატებულ სპექტაკლში მონაწილეობდა, რომელთა შორისა: „ჰამლეტი“; „კავკასიურ ცარცის წრე“, „რიჩარდ III“ და „მაკბეთი“. გარდა ამისა, ჯემალ ღაღანიძემ ასევე ითამაშა ფილმებში - „ფეოლა“; „ნერგები“; „ნატვრის ხე“ და სხვ.

• ჯამლეტ ხუხაშვილი

2023 წლის 5 აპრილს, 78 წლის ასაკში სპორტული კომენტატორი, ჟურნალისტი და მწვრთნელი ჯამლეტ ხუხაშვილი გარდაიცვალა.

ჯამლეტ ხუხაშვილი 1963 წლიდან სპორტული კომენტატორი იყო. სხვადასხვა წლებში მუშაობდა მწვრთნელად. 1980-1992 წლებში მუშაობდა საქართველოს ტელევიზიასა და რადიოში.

1994 წლიდან იყო საქართველოს ეროვნული ნაკრების ხელმძღვანელობაში. 1990 წლიდან კლუბ „მაქაბის“ პრეზიდენტი. მოგვიანებით მუშაობდა ტელეკომპანია „იმედში“. იყო სპორტული რადიოს, „ჯაკოს“ გენერალური დირექტორი.

• Moonbin 

2023 წლის 19 აპრილს, 25 წლის ასაკში მუსიკოსი და ბოიბენდ ASTRO-ის წევრი Moonbin-ი გარდაიცვალა. Moonbin-ი, რომლის ნამდვილი სახელი მუნ ბინია, ბენდ ASTRO-ისა და მისი ქვეჯგუფის, Moonbin & Sanha-ის, ცნობილი სახე იყო.

ამასთან, სანამ 2016 წელს პოპულარული K-pop ჯგუფის წევრი გახდებოდა, იგი სამსახიობო და სამოდელო საქმიანობასაც ეწეოდა.

•  ჯერი სპრინგერი

2023 წლის 28 აპრილს, 79 წლის ასაკში ამერიკელი ტელეწამყვანი, რეალითი შოუს ავტორი და პოლიტიკოსი ჯერი სპრინგერი გარდაიცვალა.

ჯერი სპრინგერი 1968 წელს მონაწილეობდა რობერტ კენედის საარჩევნო კამპანიაში. 1970 წელს კონგრესის არჩევნებში მიიღო მონაწილეობა, მაგრამ 1974 წელს ცინცინატის საკრებულოს წევრი გახდა, ხოლო 1977-1978 წლებში იკავებდა ცინცინატის მერის თანამდებობას. გარდა ამისა, 1982 წელს დაიწყო მუშაობა ტელევიზიაში, NBC-ის ეთერში მიჰყავდა პოლიტიკური გადაცემა. 1991 წლის 30 სექტემბერს ეთერში გამოდის ჯერი სპრინგერის შოუს პირველი ეპიზოდი. თავდაპირველად გადაცემა სერიოზულ პოლიტიკურ შოუდ იგეგმებოდა, მოგვიანებით წამყვანის და ახალი პროდიუსერის გადაწყვეტილებით, თოქ-შოუს ფორმატი შეეცვალა და გადაცემამ უდიდესი რეიტინგით ისარგებლა. 20 წლის განმავლობაში ეთერში 4 000-ზე მეტი ეპიზოდი გამოვიდა.

სპრინგერს ასევე შესრულებული აქვს ეპიზოდური როლები ფილმებსა და სერიალებში: Austin Powers, Kissing A Fool, Domino, Sharknado 3, X-Files.

• ტინა ტერნერი

2023 წლის 24 მაისს, 83 წლის ასაკში ლეგენდარული ამერიკელი მომღერალი და „როკ-ენ-როლის დედოფლად“ მიჩნეული ტინა ტერნერი გარდაიცვალა.

100 მილიონზე მეტი გაყიდული ჩანაწერით მომღერალი ყველა დროის ერთ-ერთ ყველაზე პოპულარულ შემსრულებლად მიიჩნევა.

ტინა ტერნერს გრემის 12 ჯილდო აქვს მიღებული.

• ომარ მხეიძე

2023 წლის 17 ივლისს, 88 წლის ასაკში საქართველოს სახალხო არტისტი, ანსამბლ „სუხიშვილების“ ყოფილი მოცეკვავე ომარ მხეიძე გარდაიცვალა.

ომარ მხეიძე 1953 წლიდან საქართველოს ხალხური ცეკვის ანსამბლის წამყვანი სოლისტი იყო, 1954 წლიდან კი საქართველოს ხალხური ცეკვის ანსამბლის მოცეკვავე, სადაც 30 წლის განმავლობაში იდგა სცენაზე.

• ტონი ბენეტი

2023 წლის 21 ივლისს, 96 წლის ასაკში ამერიკული სცენის ლეგენდარული მომღერალი ტონი ბენეტი გარდაიცვალა.

80-წლიანი კარიერის განმავლობაში ბენეტმა ასობით კომპოზიცია შეასრულა, მეგობრობდა ბობ ჰოუპთან და ფრენკ სინატრასთან, გამოჩნდა სიმპსონების ეპიზოდში, კარიერის მიწურულს კი ლედი გაგასთან ერთად დუეტების ორი ალბომი გამოსცა.

20 გრემის გარდა, ბენეტი გინესის რეკორდსმენიც არის. ის ყველაზე ასაკოვანი მომღერალია, რომელმაც ახალი ალბომი გამოსცა, ჩაწერის მომენტში ბენეტი 95 წლის იყო.

• ჯოზეფინ ჩაპლინი

2023 წლის 24 ივლისს, 74 წლის ასაკში ჩარლი ჩაპლინის შვილი, მსახიობი ჯოზეფინ ჩაპლინი გარდაიცვალა.

ჯოზეფინ ჩაპლინმა პირველი როლი ჯერ კიდევ 3 წლის ასაკში, მამის ფილმში „რამპის ჩირაღდნები“ შეასრულა. ცხოვრების განმავლობაში ნათამაშები აქვს 20-დე ფილმსა და სერიალში. საყოველთაო ცნობადობა პიერ პაოლო პაზოლინის „კენტერბერიულ მოთხრობებში“ შესრულებულმა როლმა მოუტანა. გარდა ამისა, შესრულებული აქვს როლები ფილმებსა და სერიალებში: Escape to the Sun, Nuits Rouges, Docteur Francoise Gailland, Jack the Ripper, Hemingway, Le Masque.

•  ლევან დობორჯგინიძე

2023 წლის 25 ივლისს, 41 წლის ასაკში მსახიობი ლევან დობორჯგინიძე გარდაიცვალა.

ლევან დობორჯგინიძე მაყურებელმა “გასეირნება ყარაბაღში“ შესრულებული მთავარი როლით გაიცნო. მსახიობმა ტრილოგიის მეორე და მესამე ნაწილებშიც ითამაშა. გარდა ამისა, შესრულებული აქვს როლები ფილმებში „სუბორდინაცია“ და „მედიატორი“.

• გოგი ხარაბაძე

2023 წლის 17 აგვისტოს, 81 წლის ასაკში თეატრისა და კინოს მსახიობი, რეჟისორი და მწერალი გოგი ხარაბაძე გარდაიცვალა.

1963 წლიდან შოთა რუსთაველის სახელობის სახელმწიფო აკადემიურ თეატრში თამაშობდა. შესრულებული აქვს როლები სპექტაკლებში „ყვარყვარე თუთაბერი“; „ვეფხისტყაოსანი“; „ოიდიპოს მეფე“ და „რიჩარდ III“. გარდა ამისა შესრულებული აქვს როლები ფილმებში - „ჩემი მეგობარი ნოდარი“; „ფერისცვალება“; „დათა თუთაშხია“; „ცხოვრება დონ კიხოტისა და სანჩოსი“; „გასეირნება ყარაბაღში“; „შანტრაპა“.

სხვადასხვა წლებში მიღებული აქვს საქართველოს სახალხო არტისტის, ხელოვნების ქურუმის წოდებები. არის შოთა რუსთაველისა და დავით კლდიაშვილის სახელობის სახელმწიფო პრემიების მფლობელი.

• ტოტო კუტუნიო

2023 წლის 22 აგვისტოს, 80 წლის ასაკში ლეგენდარული იტალიელი პოპ-მუსიკოსი ტოტო კუტუნიო გარდაიცვალა.

ტოტო კუტუნიომ 1990 წელს ევროვიზიის სიმღერის კონკურსი მოიგო. მისი 1983 წელს გამოშვებული სიმღერა L'Italiano კი მსოფლიო ჰიტიც გახდა. კუტუნიო ყველა დროის ერთ-ერთ ყველაზე წარმატებულ იტალიელ მუსიკოსად ითვლება; მის სახელზე 100 მილიონზე მეტი გაყიდული ჩანაწერია.

• მაიკლ გემბონი 

2023 წლის 28 სექტემბერს, 82 წლის ასაკში ირლანდიელი თეატრისა და კინოს მსახიობი, ჰარი პოტერის ფილმებში ალბუს დამბლდორის როლის შემსრულებელი მაიკლ გემბონი გარდაიცვალა.

გემბონმა თეატრში თამაში 1960-იან წლებში, ლოურენს ოლივიეს ხელმძღვანელობით National Theatre-ში დაიწყო. პირველი ჯილდოები და აღიარება 1980-იან წლებში შესრულებულმა თეატრალურმა და სატელევიზიო როლებმა მოუტანა. ამ პერიოდში გემბონმა თავისი პირველი BAFTA და თეატრალური ჯილდო Olivier Awards მოიპოვა.

მსოფლიო ცნობადობა მსახიობს ჰარი პოტერის ფილმებში შესრულებულმა პროფესორ ალბუს დამბლდორის როლმა მოუტანა. ჯადოქრის როლი გემბონმა 8-დან 6 ფილმში შეასრულა. თავდაპირველად დამბლდორის როლს რიჩარდ ჰარისი ასრულებდა, რომელიც 2002 წელს გარდაიცვალა.

კარიერის განმავლობაში სერ მაიკლ გემბონს მიღებული აქვს 4 BAFTA-ს ჯილდო, ორი ემის ნომინაცია, ერთ ოქროს გლობუსის ნომინაცია, კინომსახიობთა გილდიის ორი ჯილდო. 1992 წელს გემბონი რაინდად აკურთხეს.

• თენგიზ არჩვაძე

2023 წლის 28 ოქტომბერს, 91 წლის ასაკში ქართველი მსახიობი თენგიზ არჩვაძე გარდაიცვალა.

თენგიზ არჩვაძემ ქართულ თეატრსა და კინოში 100-ზე მეტი როლი განასახიერა და არაერთი დასამახსოვრებელი სახე შექმნა.

თბილისის შოთა რუსთაველის სახელობის თეატრალური ინსტიტუტის დამთავრების შემდეგ, სიცოცხლის ბოლომდე, თენგიზ არჩვაძე კოტე მარჯანიშვილის სახელობის თეატრის მსახიობი იყო. 1967-1973 წლებში იგი მუშაობდა რუსთავის დრამატულ თეატრშიც.

მიღებული აქვს ჯილდოები, პრემიები და პრიზები: თბილისის საპატიო მოქალაქე, ბრწყინვალების საპრეზიდენტო ორდენი, პრემია „საგურამო“, ღირსების ორდენი, შოთა რუსთაველის სახელობის სახელმწიფო პრემია, საქართველოს სახალხო არტისტი, საქართველოს დამსახურებული არტისტი.

• მეთიუ პერი

2023 წლის 28 ოქტომბერს, 63 წლის ასაკში ცნობილი კანადელ-ამერიკელი მსახიობი მეთიუ პერი, რომელსაც მსოფლიო Friends-ში შესრულებული ჩენდლერ ბინგის როლით იცნობდა, გარდაიცვალა.

NBC-ის ამ პოპულარული სიტკომის გარდა, პერი მონაწილეობდა სხვა არაერთ სერიალში, ფილმსა და სპექტაკლში. მსახიობის გარდაცვალების მოულოდნელ ამბავს დიდი გამოხმაურება მოჰყვა, როგორც მისი ფანების, ასევე კოლეგების მხრიდან.

• ჰენრი კისინჯერი

2023 წლის 29 ნოემბერს, 100 წლის ასაკში ამერიკის შეერთებული შტატების ყოფილი სახელმწიფო მდივანი და თანამედროვე პოლიტოლოგიაში ერთ-ერთი ყველაზე გავლენიანი ფიგურა ჰენრი კისინჯერი გარდაიცვალა.

ჰენრი კისინჯერმა 1973 წელს ნობელის პრემია მიიღო მშვიდობის დარგში. აქტიური პოლიტიკური მოღვაწეობის პარალელურად, იგი ბევრს წერდა დიპლომატიასა და საერთაშორისო ურთიერთობების დარგზე.

• მედეა ამირანაშვილი

2023 წლის 2 დეკემბერს, 93 წლის ასაკში სახალხო არტისტი, სოპრანო მედეა ამირანაშვილი გარდაიცვალა.

მედეა ამირანაშვილის დებიუტი 1954 წელს ზ. ფალიაშვილის სახელობის თბილისის ოპერისა და ბალეტის თეატრის სცენაზე შედგა, რის შემდეგაც ამ თეატრის წამყვანი სოლისტი იყო. 1981 წლიდან იყო ვანო სარაჯიშვილის სახელობის თბილისის სახელმწიფო კონსერვატორიის პედაგოგი, პროფესორი; 1991 წლიდან ქ. ქუთაისის საოპერო თეატრის სამხატვრო ხელმძღვანელი.

1997 წელს ღირსების ორდენი, 1971 წელს კი, ზაქარია ფალიაშვილის სახელობის პრემია გადაეცა.

---

ავტორი: ელენე გვიმრაძე, ექსპრესნიუსის რეპორტიორი 2018 წლიდან

---

დღის თემა

მთავარი თემა

ინტერვიუ - ექსკლუზივი