2023-12-14 14:42:39, 623 ნახვა

---

საზღვაო ტრანსპორტის სააგენტო - რუმინეთში ქართველი მეზღვაური გემიდან გადავარდა და დინებამ გაიტაცა

რუმინეთში, კონსტანცას ნავსადგურის აკვატორიაში, ღუზაზე მდგომი გემიდან ქართველი მეზღვაური გადავარდა და დინებამ გაიტაცა. 

საქართველოს საზღვაო ტრანსპორტის სააგენტოს ინფორმაციით, შემთხვევა სანაპიროდან 60 საზღვაო მილის მოშორებით, გუშინ, 13 დეკემბერს მოხდა.

„როგორც ჩვენთვის ცნობილია, ეკიპაჟი მაშინვე შეეცადა, მას საკუთარი ძალებით დახმარებოდა, გადაუგდეს სამაშველო რგოლი, თუმცა მეზღვაური დინებამ გაიტაცა და ვერ შეძლეს გემზე ამოყვანა.

რუმინეთში საქართველოს კონსულისა და რუმინეთის ზღვაზე ძებნა-გადარჩენის სამსახურისგან მიღებული ინფორმაციით, გემის კაპიტანმა მომხდარის შესახებ მაშინვე შეატყობინა შესაბამის სამსახურებს, ახლომდებარე გემებს და დაუყოვნებლივ დაიწყო სამაშველო ოპერაცია, რომელიც 13 დეკემბერს მთელი დღის განმავლობაში გაგრძელდა.

მეზღვაურის ძებნის ოპერაცია ასევე დღეს, 14 დეკემბერს განახლდა და ამ დრომდე მიმდინარეობს“, - აღნიშნულია საქართველოს საზღვაო ტრანსპორტის სააგენტოს ინფორმაციაში, როგორც ამას საზოგადოებრივი მაუწყებელი იტყობინება.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი