2020-12-31 13:48:07, 1150 ნახვა

---

ცნობილი ადამიანები, რომლებიც 2020 წელს გარდაიცვალენ

2020 წელი გამორჩეული იყო თავისი დანაკარგებით. ამ ცხოვრებიდან წავიდნენ ადამიანები, რომლებმაც შეცვალეს ისტორია და კულტურაში თუ კინოში თავისი ღრმა კვალი დატოვეს. 2020 წელს დავემშვიდობეთ, შონ კონერს და მარადონას, გოგი ქავთარაძეს და ჯულიეტა ვაშაყმაძეს. 

ჰოს­ნი მუ­ბა­რა­კი

ეგ­ვიპ­ტის ყო­ფი­ლი პრე­ზი­დენ­ტი, ჰოს­ნი მუ­ბა­რა­კი 87 წლის ასაკ­ში გარ­და­იც­ვა­ლა, - ეგ­ვიპ­ტის ექ­სპრე­ზი­დენტს გუ­ლის შე­ტე­ვა და­ე­მარ­თა, რის შემ­დე­გაც ექი­მებ­მა მისი გა­დარ­ჩე­ნა ვერ შეძ­ლეს.
ჰოს­ნი მუ­ბა­რა­კი მა­ა­დის სამ­ხედ­რო ჰოს­პი­ტალ­ში მკურ­ნა­ლობ­და. იგი 1981-დან 2011 წლამ­დე ეგ­ვიპ­ტის პრე­ზი­დენ­ტის პოსტს იკა­ვებ­და. 2011 წლის იან­ვარ­ში კი ეგ­ვიპ­ტე­ში მა­სობ­რი­ვი დე­მონ­სტრა­ცი­ე­ბის შე­დე­გად გა­და­ა­ყე­ნეს. ის­ლა­მის­ტუ­რი პარ­ტია "ძმე­ბი მუს­ლი­მა­ნე­ბის" მთავ­რო­ბის სა­თა­ვე­ში მოს­ვლის შემ­დეგ, მუ­ბა­რაკს ოპო­ზი­ცი­ის აქ­ცი­ე­ბის დროს დარ­ბე­ვა­ში და დე­მონ­სტრან­ტე­ბის და­ხოც­ვა­ში დას­დეს ბრა­ლი და უვა­დო პა­ტიმ­რო­ბა მი­უ­სა­ჯეს. თუმ­ცა, გა­სუ­ლი წლის ნო­ემ­ბერ­ში ეგ­ვიპ­ტის სა­სა­მარ­თლომ მუ­ბა­რაკს აღ­ნიშ­ნუ­ლი ბრალ­დე­ბა მო­უხ­სნა. ექ­სპრე­ზი­დენ­ტის წი­ნა­აღ­მდეგ ასე­ვე აღ­ძრუ­ლია საქ­მე სა­ხელ­მწი­ფო თან­ხე­ბის გაფ­ლან­გვის მუხ­ლით.

რუთ ბეიდერ გინზბურგი.

ვაშინგტონში 18 სექტემბერს 87 წლის ასაკში გარდაიცვალა აშშ-ის უზენაესი სასამართლოს წევრი რუთ ბეიდერ გინზბურგი. რუთ ბეიდერ გინზბურგი, რომლის მამა აშშ-ში გადასახლდა რევოლუციამდელი რუსეთიდან, ქვეყნის უზენაესი სასამართლოს მეორე ქალი წევრი იყო.

მისი კანდიდატურა 1993 წელს დაასახელა აშშ-ის მაშინდელმა პრეზიდენტმა, ბილ კლინტონმა. რუთ ბეიდერ გინზბურგი მოგვიანებით უზენაესი სასამართლოს ლიბერალური ფრთის სიმბოლოდ იქცა.

მისი მონაწილეობით მიიღეს გადაწყვეტილებები, როცა დამტკიცდა ქალთა უფლება აბორტზე, ერთნაირსქესიან პირთა ქორწინების უფლების კონსტიტუციურობა, რასობრივ უმცირესობათა უფლებები. ის იყო იმ მოსამართლეთა შორის, ვინც მხარი დაუჭირა სამედიცინო დაზღვევის სისტემის რეფორმის კანონიერებას. მისი სიკვდილი კუჭქვეშა ჯირკვლის კიბოთი ნაწილობრივ მოულოდნელი იყო, რადგან ვრცელდებოდა ცნობები მკურნალობის კურსის წარმატებულობის შესახებ.

უზენაესი სასამართლოს წევრი მოსამართლის გარდაცვალებას მოჰყვება პოლიტიკური მღელვარება წინასაარჩევნო პერიოდში, რადგან რესპუბლიკურ პარტიას მიეცა შესაძლებლობა, უზენაეს სასამართლოში მოიპოვოს საიმედო კონსერვატიული უმრავლესობა.
სასამართლოს ბოლო შემადგენლობაში ხუთი მოსამართლე რესპუბლიკელი პრეზიდენტის დანიშნული იყო, ოთხი კი დემოკრატისა.

სასამართლოს ცხრა წევრს შორის მეექვსე კონსერვატორი იურისტის გამოჩენა მკვეთრად შეცვლის ძალთა ბალანსს ქვეყნის ხელისუფლების ერთობ მნიშვნელოვან, სასამართლო შტოში, რომელიც ხშირად აფასებს კონგრესისა და მთავრობის გადაწყვეტილებების კონსტიტუციურობას.

ვალერი ჟისკარ-დ’ესტენი

3 დეკემბერს საფრანგეთის ყოფილი პრეზიდენტი ვალერი ჟისკარ-დ’ესტენი კორონავირუსით გარდაიცვალა. საფრანგეთის 94 წლის ექსპრეზიდენტი საკუთარ სახლში გარდაიცვალა.
ჟისკარ-დ’ესტენი საავადმყოფოში ნოემბრის შუა რიცხვებში გადაიყვანეს. მას გულის უკმარისობა აღენიშნებოდა.
ის საფრანგეთის პრეზიდენტის პოსტს 1974-დან 1981 წლამდე იკავებდა. ვალერი ჟისკარ-დ’ესტენი საფრანგეთში ერთ-ერთი ყველაზე ავტორიტეტული პოლიტიკოსი იყო.

ენიო მორიკონე

4 ივლისს 91 წლის ასაკში გარდაიცვალა ცნობილი იტალიელი კომპოზიტორი ენიო მორიკონე.
მორიკონე გარდაიცვალა რომის ერთ-ერთ კლინიკაში, სადაც რამდენიმე დღის წინ მოათავსეს თეძოს ძვლის მოტეხილობით.
ენიო მორიკონემ მსოფლიოში სახელი გაითქვა კინომუსიკით. იყო 500-ზე მეტი ფილმისა და სერიალის მუსიკის ავტორი. მათ შორისაა საკულტო ფილმები: "ერთხელ ამერიკაში", „ერთი ბღუჯა დოლარები“, „კეთილი, ცუდი, ბოროტი“, „ლეგენდა პიანისტზე“, „პროფესიონალი“.
ენიო მორიკონე იყო არაერთი პრესტიჟული პრემიის, მათ შორის „ოსკარის“და „ოქროს გლობუსის“ მფლობელი.

შონ კონერი

31 ოქტომბერს ლეგენდარული შოტლანდიელი მსახიობი შონ კონერი 90 წლის ასაკში გარდაიცვალა. 
შონ კონერის კარიერა ხუთ ათწლეულს მოიცავს. მან 1988 წელს „ოსკარი“ მოიპოვა ფილმში – "ხელშეუხებელნი" შესრულებული როლისთვის.
შონ კონერის სხვა ცნობილ ფილმებს შოორისაა: „ნადირობა წითელ ოქტომბერზე“, „მთიელი“ და „ინდიანა ჯონსი“, თუმცა, მას განსაკუთრებული პოპულარობა "ჯეიმს ბონდნა" მოუტანა. პირველად ჯეიმს ბონდის როლი კონერმა 1962 წელს შეასრულა.

არმენ ჯიგარხანიანი

14 ნოემბერს ცნობილი მსახიობი და რეჟისორი არმენ ჯიგარხანიანი 85 წლის ასაკში გარდაიცვალა. 
მსახიობის ახლო მეგობრის თქმით, არმენი დილას დაახლოებით 06:00 საათზე, გულის გაჩერებით გარდაიცვალა, როგორც მან აღნიშნა დაკრძალვა 17 ნოემბერს ჩატარდება.არმენ ჯიგარხანიანს 200-ზე მეტ ფილმში აქვს მონაწილეობა მიღებული. აღსანიშნავია, რომ მისი ხელმძღვანელობით, 1996 წლის 12 მარტს მოსკოვის დრამატული თეატრი დაფუძნდა.

პიერ კარდენი

ლეგენდარული ფრანგი მოდის დიზაინერი პიერ კარდენი, 98 წლის ასაკში გარდაიცვალა. საზოგადოებისთვის ცნობილია, რომ პიერ კარდენმა 1960-70-იან წლებში თავისი ფუტურისტული დიზაინის წყალობით მოდაში რევოლუცია მოახდინა. ის ასევე იყო პიონერი ბიზნესის სფეროში. მან შეძლო და აიღო ლიცენზია, რათა შეექმნა საკუთარი ისეთი ბრენდული პროდუქცია, როგორიცაა სათვალე.

დიზაინერის ოჯახის ცნობით, პიერ კარდენი პარიზის მახლობლად, ნეილის საავადმყოფოში, გარდაიცვალა.

დიეგო არმანდო მარადონა 

25 ნოემბერს 60 წლის ასაკში ლეგენდარული არგენტინელი ფეხბურთელი დიეგო არმანდო მარადონა გარდაიცვალა. გარდაცვალების მიზეზი გულის შეტევა გახდა.

მარადონამ მონაწილეობა 4 მსოფლიო ჩემპიონატში მიიღო. 1986 წელს კი მისი კაპიტნობით არგენტინა მექსიკაში მსოფლიო ჩემპიონი გახდა, ხოლო მარადონა ტურნირის საუკეთესო ფეხბურთელად დაასახელეს. 1986 წელს მარადონას ჩემპიონატზე გამოსვლა, მსოფლიო ჩემპიონატების ისტორიაში, დღემდე საუკეთესო ინდივიდუალურ პერფორმანსად ითვლება. ამავე ჩემპიონატის მეოთხედფინალში მარადონამ ინგლისს მისი ყველაზე ცნობილი ორი გოლი გაუტანა - გოლი "ღმერთის ხელით" და სოლო რეიდი ცენტრიდან, რომელიც 2002 წელს ფიფა-მ საუკუნის გოლად აღიარა. 

1990 წელს მარადონამ არგენტინის ნაკრები მსოფლიო ჩემპიონატის ფინალამდე მიიყვანა, სადაც დასავლეთ გერმანიასთან დამარცხდა. მარადონა 1994 წლის მსოფლიო ჩემპიონატზე არგენტინის ნაკრებიდან ეფედრინის მიღების გამო მოკვეთეს.

საკლუბო კარიერის განმავლობაში მარადონა სხვადასხვა დროს ბოკა ხუნიორსის, ნაპოლისა და ბარსელონას ღირსებას იცავდა. ნაპოლიში მარადონამ ორი საჩემპიონო ტიტული მოიგო. 

საფეხბურთო კარიერა ლეგენდამ 1997 წელს, არგენტინაში, მშობლიურ ბოკა ხუნიორსში დაასრულა.

ბევრის აზრით, მარადონა მსოფლიოს ყველა დროის საუკეთესო ფეხბურთელია. ფეხბურთის მეფე - სწორედ ამ სახელით მოიხსენიებს მარადონას სპეციალისტების უმრავლესობა. არგენტინის ნაკრებში მარადონამ 91 თამაშში 34 გოლი გაიტანა. პროფესიულ საკლუბო კარიერაში კი მარადონამ 491 მატჩი ჩაატარა და 259 გოლი გაიტანა. მარადონა 2008-2010 წლებში არგენტინის ეროვნულ ნაკრებსაც წვრთნიდა. მან გუნდი სამხრეთ აფრიკაში გამართული მსოფლიო ჩემპიონატის შემდეგ დატოვა, სადავ არგენტინა გერმანიამ მეოთხედფინალში 4-0 დაამარცხა.

კობი ბრაიანტი

ყველა დროის ერთ-ერთი უდიდესი კალათბურთელი კობი ბრაიანტი კალიფორნიის შტატში, შვეულმფრენის ჩამოვარდნის შედეგად გარდაიცვალა. როგორც ირკვევა, კობის შვეულფრენში 5 ადამიანი იმყოფებოდა და ხუთივე  გარდაცვლილია - მათ შორის, კობის 13 წლის ქალიშვილიც. ბრაიანტის მეუღლე ვანესა შვეულფრენში არ იყო.ტრაგედია კალიფორნიის დროით დილის 10 საათზე მოხდა. პოლიციის განმარტებით, კობის შვეულმფრენი ნისლიან ამინდში, კალაბასასის (კალიფორნია) მთებში ჩამოვარდა და მაშინვე ცეცხლი გაუჩნდა. 'ლოს ანჯელეს თაიმსის' ინფორმაციით, შვეულმფრენის ჩამოვარდნამ ხანძარი გააჩინა, რის გამოც სასწრაფო დახმარებას ადგილზე მისვლა გაუჭირდა.

კობი და ვანესა 2001 წლიდან იყვნენ დაოჯახებულები. 13 წლის ჯანას გარდა, მათ კიდევ სამი ქალიშვილი ჰყავთ - ნატალია (17), ბიანკა (3) და კაპრი (7 თვის).

საქართველომაც დაკარგეს ცნობილი ადამიანები მათ შორის ლეგენდარული ჯულიეტა ვაშაყმაძე იყო.

გოგი ქავთარაძე

20 დეკემბერს 80 წლის ასაკში რეჟისორი და მსახიობი გოგი ქავთარაძე გარდაიცვალა.
გოგი ქავთარაძე 1963–1969 და 1972–1976 წლებში იყო რუსთაველის თეატრის მსახიობი, რეჟისორი; 1969–1972 წლებში ბათუმის თეატრის მთავარი რეჟისორი, ხოლო 1974–1976 წლებში თეატრალური ინსტიტუტის პედაგოგი. 1976–1982 წლებში ქუთაისის თეატრის დირექტორი, სამეცნიერო ხელმძღვანელი. 1982-1992 — სოხუმის თეატრის დირექტორი, სამხატვრო ხელმძღვანელი, ხოლო 1992-1999 წლებში ალექსანდრე გრიბოედოვის სახელობის რუსული დრამატული თეატრის სამხატვრო ხელმძღვანელი; 1999–2004 წლებში რუსთავის თეატრის სამხატვრო ხელმძღვანელი, 1990-1991 წლებში იყო საქართველოს რესპუბლიკის პირველი მოწვევის უზენაესი საბჭოს წევრი, ხელი აქვს მოწერილი საქართველოს სახელმწიფოებრივი დამოუკიდებლობის აღდგენის აქტზე. 2012-2016 წლებში იყო საქართველოს მე-8 მოწვევის პარლამენტის წევრი.

დადგმული აქვს 90-მდე სპექტაკლი, გადაღებულია 25 ფილმში, იყო საქართველოს კინემატოგრაფისტთა შემოქმედებითი კავშირის წევრი, საქართველოს სახელმწიფო პრემიის ლაურეატი, კოტე მარჯანიშვილის პრემიის ლაურეატი და ღირსების ორდენის კავალერი.

ლალი ბადურაშვილი

მსახიობი ლალი ბადურაშვილი 81 წლის ასაკში გარდაიცვალა.
ლალი ბადურაშვილმა დაამთავრა თბილისის ილია ჭავჭავაძის სახელობის უცხო ენათა ინსტიტუტი ფრანგული ენის სპეციალობით. მუშაობდა თბილისის სახელმწიფო უნივერსიტეტის კათედრაზე. 1970 წელს გადაიღეს ფილმში „დიდოსტატის მარჯვენა“, რომელშიც შეასრულა შორენას როლი. ასევე, მონაწილეობდა რამდენიმე ფილმში. იყო „ქართული ფილმის“ რედაქტორი. 2016 წელს მიენიჭა თბილისის საპატიო მოქალაქის წოდება.

ჯულიეტა ვაშაყმაძე

27 დეკემბერს 87 წლის ასაკში გარდაიცვალა ცნობილი ტელეწამყვანი ჯულიეტა ვაშაყმაძე. ინფორმაციას ამის შესახებ აქვეყნებს "მთავარი არხის" გენერალური დირექტორი, ნიკა გვარამია.

ჯულიეტა ვაშაყმაძე 1961-1962 წლებში იყო კოტე მარჯანიშვილის სახელობის სახელმწიფო თეატრის მსახიობი, სადაც რამდენიმე როლი განასახიერა. გადაღებულია კინოფილმებში: "ყვავილი თოვლზე", "თოჯინები იცინიან", "პაპა გიგია", "არაჩვეულებრივი გამოფენა" და ტელეფილმში "მზე ჭიქაში".

1958 წლიდან ჯულიეტა ვაშაყმაძე ტელევიზიის დიქტორი გახდა. მოგვიანებით ის იყო კომენტატორი, პროგრამების ხელმძღვანელი, სამეცნიერო-პოლიტიკური, ლიტერატურული, სამეცნიერო, საბავშვო, თეატრალური თუ ხელოვნების ამა თუ იმ დარგისადმი მიძღვნილ გადაცემათა წამყვანი, ტელეგადაცემების ავტორი. მიღებული აქვს არაერთი ჯილდო, სიგელი და მედალი.

1996 წელს მიღებული აქვს ღირსების ორდენი. 1967 - საქართველოს დამსახურებული არტისტის წოდება.

2013 წლის 30 დეკემბერს, ტელევიზიის დაარსების 57 წლისთავთან დაკავშირებით, საქართველოს პირველმა არხმა, მთაწმინდის პარკში, თბილისის ანძის სიახლოვეს საპატიო ვარსკვლავი გაუხსნა ტელევიზიის პირველ წამყვანებს, მათ შორის, ჯულიეტა ვაშაყმაძეს.

ჯაბა ბოჯგუა 

12-წლიანი კომის შემდეგ მომღერალი ჯაბა ბოჯგუა გარდაიცვალა, ჯაბა ბოჯგუა 12 წლის წინ, 2008 წელს დააპატიმრეს. მას გულის შეტ​ევა ციხეში მოუვიდა, შემდეგ კი კომაში ჩავარდა. მას შემდეგ მისი მდგომარეობიდან გამოყვანა ვეღარ მოხერხდა.

კობა დავითაშვილი

საქართველოს პარლამენტის ყოფილი წევრი კობა დავითაშვილი 49 წლის ასაკში გარდაიცვალა. დავითაშვილი კლინიკაში გადაიყვანეს. ექიმის თქმით, მას აღენიშნებოდა სეფსისი, სეპტიკური შოკი, პოლიორგანული უკმარისობა და თირკმლის მწვავე უკმარისობა და მართვით სუნთქვაზე იმყოფებოდა.

კობა დავითაშვილს 2017 წელს დაუდგინეს ბეხტერევის დაავადება, რომელიც რთულად მიმდინარეობის შემთხვევაში, ხერხემლის სრული უძრაობით ხასიათდება.

კობა დავითაშვილი 4 მოწვევის პარლამენტის დეპუტატი იყო.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი