2020-04-18 15:02:17, 1533 ნახვა

---

UN - მოვუწოდებთ თითოეულ ოჯახს საქართველოში, წელს აღდგომის დღესასწაულის აღნიშვნისას, პირველ ადგილზე დააყენონ საზოგადოების ჯანმრთელობა

 “მოვუწოდებთ თითოეულ ოჯახს საქართველოში, წელს  აღდგომის დღესასწაულის აღნიშვნისას,  პირველ ადგილზე დააყენონ საზოგადოების ჯანმრთელობა”, - ამის შესახებ გაერთიანებული ერების ორგანიზაციამ განაცხადა.

გთავაზობთ განცხადებას უცვლელად.

„აღდგომა საქართველოსთვის ერთ-ერთი უმთავრესი  დღესასწაულია, რომელსაც  მრავალი ოჯახი ერთად აღნიშნავს. დღეს საზოგადოების სააღდგომო განწყობა ასევე გულისხმობს  პასუხისმგებლობის აღებას კორონავირუსისგან საკუთარი თავისა და სხვათა დასაცავად.

განსაკუთრებით აღსანიშნავია, რომ საქართველოს მოსახლეობა გაგებით ეკიდება და იცავს მთავრობის რეკომენდაციებს, რომლებიც ჯანმრთელობის მსოფლიო ორგანიზაციის რჩევით შემუშავებულ პროფილაქტიკურ ზომებს ეფუძნება.  შედეგად, კოვიდ-19-ით დაავადებულთა  რაოდენობა  კონტროლს ექვემდებარება და  ბევრის სიცოცხლეც გადარჩა. ეს ტემდენცია უნდა გაგრძელდეს.

მოვუწოდებთ თითოეულ ოჯახს საქართველოში, წელს  აღდგომის დღესასწაულის აღნიშვნისას,  პირველ ადგილზე დააყენონ საზოგადოების ჯანმრთელობა და კეთილდღეობა. გთხოვთ, დარჩეთ სახლში, ნუ შეიკრიბებით, რომ თქვენ და თქვენი ახლობლები ჯანმრთელად იყოთ ამ უჩვეულო ვითარებაში.

უფრო მეტად, ვიდრე ოდესმე, შორს თუ ახლოს მყოფ ახლობლებთან დასაკავშირებლად გამოვიყენოთ თანამედროვე ტექნოლოგიები, რადგან ფიზიკური დისტანცია არ არის სოციალური იზოლაცია. მოდით, ასეთი დისტანციური კავშირებით აღვნიშნოთ ყველამ ერთად ეს დღესასწაული.

ფიზიკური დისტანციის წესების დაცვით ჩვენ ვიცავთ საკუთარ თავს, ჩვენს საყვარელ ადამიანებს და მთელ საზოგადოებას, განსაკუთრებით კი ყველაზე დაუცველებს:  ხანდაზმულებს, სუსტი იმუნური სისტემისა და  ქრონიკული დაავადებების მქონე პირებს.

რეკომენდაციების შესრულებით ასევე დავიცავთ ჯანდაცვის მუშაკებსა და ამ სფეროში დასაქმებულებს, რომლებიც  24 საათის განმავლობაში თავდაუზოგავად შრომობენ კორონავირუსის დასამარცხებლად პანდემიის დაწყების  პირველივე დღიდან. ჩვენ უნდა დავრჩეთ  სახლში, რომ ისინი იყვნენ ჯანმრთელად და  დაავადებულთა მკურნალობა შეძლონ.

საქართველოში გაერთიანებული ერების ორგანიზაცია მოუწოდებს ქვეყნის ყველა მცხოვრებს, სახლში დარჩენით განაგრძონ თავიანთი მნიშვნელოვანი წვლილის შეტანა კორონავირუსთან ბრძოლაში.

გაერთიანებული ერების ორგანიზაცია ბედნიერ აღდგომას უსურვებს საქართველოს ყველა მცხოვრებს, რომლებიც  აღდგომის დღესასწაულს ზეიმობენ“, - განაცხადეს გაერთიანებული ერების ორგანიზაციაში.

---

ავტორი: ცოტნე ტალახაძე, ექსპრესნიუსის რეპორტიორი 2019 წლიდან

---

დღის თემა

მთავარი თემა

ინტერვიუ - ექსკლუზივი