„საერთაშორისო გამჭვირვალობა - საქართველო“-ს აღმასრულებელი დირექტორი ეკა გიგაური არ იზიარებს პრემიერ-მინისტრის პოზიციას, რომ „ეროვნული ბანკის შესახებ“  კანონპროექტთან დაკავშირებით აჟიოტაჟია  შექმნილი.

როგორც გიგაურმა ჟურნალისტებს განუცხადა, იმის თაობაზე, რომ კანონპროექტი ეროვნული ბანკისთვის  და ქვეყნის ეკონომიკისთვის დამაზიანებელია, არამხოლოდ თავად,  არამედ მთელი რიგი საერთაშორისო ორგანიზაციები საუბრობენ.

„ჩვენ ამ შემთხვევაში ვხელმძღვანელობთ საერთაშორისო გამოცდილებით. ასევე მხოლოდ ერთადერთი  მხარე არ ვართ, ვინც საუბრობს იმაზე, რომ ეს დამაზიანებელი კანონპროექტია. ამაზე საუბრობს ევროპის რეკონსტრუქციისა და განვითარების ბანკი, მსოფლიო ბანკი და სხვა საერთაშორისო ორგანიზაციები.  შესაბამისად, თუკი პრემიერი ჩვენ და ამ ორგანიზაციებს ადანაშაულებს  აჟიოტაჟში და პროვოკაციაში ეს უკვე  მისი პოზციციაა. მე ამას არ ვეთანხმები“,-აღნიშნა გიგაურმა.

ამასთან,  ”ეკონომიკური პოლიტიკის კვლევის ცენტრის” აღმასრულებელი დირექტორის, ნინო ევგენიძის თქმით, ეროვნული ბანკის დამოუკიდებლობის უზრუნველყოფა თითოეული ადამიანის ვალია და თუკი ამ დამოუკიდებლობას რაიმე ხელს შეუშლის, მას შეეწინაღმდეგებიან.

„ხელოვნური აჟიოტაჟი თუა ის მთელი საერთაშორისო-საფინანსო ინსტიტუტების განცხადება,  ბოლო 15 წლის განმავლობაში არ მახსენდება ერთობლივი განცხადება გაეკეთებინათ ამგვარი ინიციატივის წინააღმდეგ,  მაშინ შეგიძლიათ დაარქვათ ხელოვნური, მაგრამ მე ვფიქრობ, რომ ეროვნული ბანკის დამოუკიდებლობის უზრუნველყოფა,  თითოეული  ჩვენგანის ვალია“,-განაცხადა ნინო ევგენიძემ.

ცნობისთვის, პრემიერ-მინისტრმა ირაკლი ღარიბაშვილმა განაცხადა, რომ მისთვის „კატეგორიულად მიუღებელია ის აჟიოტაჟი, რომელიც ე.წ ოპონენტებმა ხელოვნურად ატეხეს და სამწუხაროა, რომ მათ ამ ჟრიამულს პრეზიდენტიც შეუერთდა“.

მისივე თქმით, კანონში სრულად გათვალისწინებულია როგორც ევროკავშირის, ისე - საერთაშორისო საფინანსო ინსტიტუტების ყველა რეკომენდაცია.

„მართლაც ვერ ვხედავ ამ აჟიოტაჟის ვერავითარ საფუძველს. ეს არის აბსოლუტურად ხელოვნურად ინსპირირებული, აგორებული კამპანია, რომელიც აზიანებს ბიზნესგარემოს, საინვესტიციო კლიმატს და ძალიან სერიოზული პასუხისმგებლობის საკითხია. ამ ადამიანებს აბსოლუტურად არ ესმით, რა არის სახელმწიფო და მისი ინტერესები და არ აქვთ გაცნობიერებული პასუხისმგებლობა, რომელიც ეკისრებათ საკუთარი ქვეყნისა და ხალხის წინაშე. ეს არის სრულიად უპასუხისმგებლო დამოკიდებულება, ვგულისხმობ ყველა იმ ადამიანს, ვინც ასე ხელოვნურად ქმნის აჟიოტაჟს“, - განაცხადა ირაკლი ღარიბაშვილმა.

პრემიერ-მინისტრმა მაგალითად დაასახელა პოლონეთის საბანკო სისტემა, რომელიც მსოფლიოში საუკეთესოდ აღიარეს და აღნიშნა, რომ პოლონეთში, საბანკო ზედამხედველობის სააგენტო ცალკეა.

„მაქვს კითხვა ამ ადამიანების მიმართ, თუ პოლონეთის საბანკო სისტემა საუკეთესოა და ჩვენ ვაკეთებთ იმას, რაც საუკეთესოა, მაშინ სად არის შეკითხვები?! ეს არის აბსოლუტურად ხელოვნური სპეკულაციები, რომ კიდევ ერთხელ დააზიანონ ბიზნესგარემო და დააფრთხონ ინვესტორები. ყველას მოვუწოდებ, დამშვიდდნენ და დაასრულონ აჟიოტაჟი. ეს არის დამაზიანებელი ჩვენი ქვეყნისთვის და არა ის, რა კანონს მივიღებთ. ჩვენ კანონებს ვიღებთ ქვეყნისთვის და არაფერს გავაკეთებთ სახელმწიფოს ინტერესების საწინააღმდეგოდ. პაულსენების გადმოსვლა საქართველოში და მათი ინვესტიცია არის პასუხი ყველა იმ სკეპტიკოსზე, კრიტიკოსსა და უპასუხისმგებლო ადამიანზე, რომელიც ასე უცერემონიოდ საუბრობს იმაზე, რომ ჩვენ ვაზიანებთ ბიზნესგარემოს“, - აღნიშნა პრემიერმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საფრანგეთში არეულობის დროს დაახლოებით 1800 ადამიანი დააკავეს, ხოლო სასწრაფო დახმარების 500-ზე მეტი თანამშრომელი დაშავდა

ალბანეთში პრემიერ-მინისტრის გადადგომის მოთხოვნით საპროტესტო აქციები გრძელდება, პოლიცია კი რეზინის ტყვიებს იყენებს

პაპუაშვილი - რასაც საფრანგეთში ვუყურებთ, გვახსენებს, რომ სხვის ქვეყანაში ქარის დამთესი, საკუთარში ქარიშხალს მოიმკის

პოლონეთმა სამხედრო თვითმფრინავები დასავლეთ უკრაინაზე რუსეთის თავდასხმების ფონზე აფრინდა