2019-10-30 15:34:57, 1197 ნახვა

---

იუსტიციის მინისტრი სახელმწიფო ინსპექტორის სამსახურის საგამოძიებო მიმართულების პრეზენტაციაზე სიტყვით გამოვიდა

ვიცე-პრემიერი, იუსტიციის მინისტრი თეა წულუკიანი, სახელმწიფო ინსპექტორის სამსახურის საგამოძიებო მიმართულების პრეზენტაციას დაესწრო. ღონისძიება, რომელიც სახელმწიფო ინსპექტორის აპარატის ორგანიზებით გაიმართა, პრემიერ-მინისტრმა გიორგი გახარიამ გახსნა. 

იუსტიციის მინისტრმა სახელმწიფო ინსპექტორის რეფორმის მნიშვნელობაზე ისაუბრა და აღნიშნა, რომ იუსტიციის სამინისტრო, როგორც რეფორმის ავტორი უწყება, მიესალმება კანონის პრაქტიკაში განხორციელებას:

„იუსტიციის სამინისტრო 2013 წლიდან მუშაობს ამ რეფორმაზე. ჩვენ ვიყავით უწყება, რომელსაც მართლა სჯეროდა, რომ დამოუკიდებელი საგამოძიებო მექანიზმი  ქვეყანაში უნდა ამოქმედებულიყო. 2019 წლის 1-ლი ნოემბრიდან, 7-წლიანი პროცედურის შემდეგ, ჩვენ  დავინახავთ ჩვენივე რეფორმის პრაქტიკაში განხორციელების დასაწყისს“, − აღნიშნა თეა წულუკიანმა და მადლობა გადაუხადა ევროკავშირს, რომელიც რეფორმაზე მუშაობის პროცესში თავიდანვე იყო ჩართული.

იუსტიციის მინისტრის თქმით,  დამოუკიდებელი საგამოძიებო მექანიზმის ამოქმედება  მოწმობს იმას, რომ საქართველოში ძალოვანი უწყებები ღია და გამჭვირვალეა. 

„საპატიმროებში,  პოლიციაში თუ სხვაგან შეიძლება იყოს ცალკეული შემთხვევა, როდესაც რომელიმე საჯარო მოხელეს უმტყუნებს ნერვები, იმიტომ, რომ ისინი რთულ პირობებში მუშაობენ, მაგრამ ჩვენ ვართ ის სახელმწიფო, სადაც  ასეთ ცალკეულ შემთხვევას ობიექტურად და სამართლიანად გამოიძიებს არა ჩვენივე უწყება, არამედ დამოუკიდებელი სახელმწიფო ინსპექტორი“, − თქვა მან.

იუსტიციის მინისტრმა ხაზგასმით აღნიშნა, რომ პენიტენციური სისტემა სახელმწიფო ინსპექტორის აპარატთან მჭიდროდ ითანამშრომლებს.

„იმედი მაქვს, რომ ეს თანამშრომლობა საზოგადოებას კიდევ ერთხელ დაანახებს იმას, რაც ისედაც იცის − რომ საპატიმროებში ადამიანის უფლებები, უკვე მე-8 წელია, არის მთავარი“, − დასძინა თეა წულუკიანმა და  სახელმწიფო ინსპექტორის აპარატს წარმატებები უსურვა. 

ღონისძიებას საქართველოს მთავრობის წევრები, პარლამენტარები, სხვა სახელმწიფო სტრუქტურების, დიპლომატიური კორპუსის, საერთაშორისო ორგანიზაციებისა და არასამთავრობო სექტორის წარმომადგენლები ესწრებოდნენ.

 

(NS)

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი