ბერუჩაშვილი: გამოვიყენებთ ყველა ფორმატს, რათა საქართველოში მიმდინარე პროცესები პარტნიორებმა კარგად შეაფასონ

2015-07-15 10:03:48, 344 ნახვა

პოლიტიკა

საგარეო საქმეთა მინისტრის თამარ ბერუჩაშვილის განცხადებით, გამოყენებული იქნება ყველა ფორმატი, რათა საქართველოში მიმდინარე პროცესები პარტნიორების მხრიდან კარგად იყოს შეფასებული და გაზიარებული.

ბერუჩაშვილის თქმით, ე.წ. საოკუპაციო ხაზთან შექმნილ ვითარებასთან დაკავშირებით შეხვედრები გაიმართა ევროკავშირის მონიტორინგის მისიის ხელმძღვანელთან, საქართველოში აკრედიტებულ დიპლომატიურ კორპუსთან. ასევე ინფორმაცია მიეწოდა საქართველოს დიპლომატიურ წარმომადგენლობებს საზღვარგარეთ.

16 ივლისს კი ეუთო-ში გაიმართება პოლიტიკური კომიტეტის სესია, რომელზეც საქართველოს მისიის ხელმძღვანელი სიტყვით გამოვა. ბერუჩაშვილმა ასევე აღნიშნა, რომ საბერძნეთთან დაკავშირებული მოლაპარაკებების გამო საჭირო იყო დონალდ ტუსკის ყოფნა ბრიუსელში, თუმცა ასევე მნიშვნელოვანია მისი ვიზიტი საქართველოში.

„ძალიან სამწუხაროა, რომ რუსეთი აგრძელებს თავის აგრესიულ პოლიტიკას და საქართველოს ოკუპირებულ ტერიტორიებზე გრძელდება მცოცავი ანექსია. ჩვენ ხელთ არსებული ინსტრუმენტები ეს არის საერთაშორისო სამართალი, ეს არის ჩვენი პარტნიორების, საერთაშორისო საზოგადოების თანადგომა, მათი კონსოლიდაცია და მაქსიმალური მხარდაჭერის დროული მობილიზაცია. ყველა ეს რესურსი მობილიზებულია დროულად. ეს არის ჩვენი სამუშაო რეჟიმი. გამოყენებული იქნება ყველა ფორმატი და ყველა ტრიბუნა, რომ საქართველოში მიმდინარე პროცესები, როგორც საფრთხე არამარტო საქართველოსთვის, არამედ ზოგადად საფრთხე რეგიონისთვის და ევროპული უსაფრთხოებისთვის, კარგად იყოს გაზიარებული და შეფასებული ჩვენი პარტნიორების მხრიდან", - განაცხადა თამარ ბერუჩაშვილმა.

ამასთან საგარეო საქმეთა მინისტრის თქმით, ოკუპაციის ხაზის გასწვრივ არსებულ სოფლებში დაზარალებული მოსახლეობის შესახებ ინფორმაცია უკვე გადაეცა საელჩოებს და ადგილზე მაღალი დონის ვიზიტების ორგანიზება მუდმივად მიმდინარეობს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან