გოცირიძე ბახტაძეზე: თქვენ კი არ გადადექით, თქვენ გადაგაყენეს - ასე თოჯინებივით დაატარებენ ადამიანებს აქეთ-იქით

2019-09-02 18:07:03, 1243 ნახვა

კომენტარი

საპარლამენტო ფრაქცია "ნაციონალური მოძრაობის" თავმჯდომარე რომან გოცირიძე მიიჩნევს, რომ მამუკა ბახტაძეს პრემიერ-მინისტრის თანამდებობის დატოვების შესახებ გადაწყვეტილება სინამდვილეში მმართველი პარტიის თავმჯდომარე ბიძინა ივანიშვილს ეკუთვნის.

როგორც გოცირიძე აცხადებს, "ქართული ოცნება" ყველა გზებით ძალაუფლების შენარჩუნებას ცდილობს.

"ყველაფერი ემსახურება ერთ მიზანს - ძალაუფლების შენარჩუნებას. ამ მიზანს ემსახურება რა თქმა უნდა ფორმალური პრემიერ-მინისტრის მამუკა ბახტაძის გადაყენებაც. ძალიან სასაცილოა მისი სიტყვები როდესაც დაიწყო, რომ მე გადავდექი. თქვენ კი არ გადადექით, თქვენ გადაგაყენეს. როგორც არავინ გეკითხებოდათ დანიშვნას, ისე არავინ გეკითხებათ გადაყენებას. ასე თოჯინებივით დაატარებენ ადამიანებს აქეთ-იქით", - განაცხადა მან.

დეპუტატი აგრეთვე იმ გავრცელებულ ინფორმაციას გამოეხმაურა, რომლის თანახმადაც პრემიერ-მინისტრის თანამდებობა შესაძლოა მოქმედმა შს მინისტრმა გიორგი გახარიამ დაიკავოს. გოცირიძის მტკიცებით, თუ გიორგი გახარია პრემიერის თანამდებობას დაიკავებს, ეს იქნება იმის მაჩვენებელი, რომ საქართველოს ხელისუფლება რუსეთის დაკვეთას ასრულებს.

"თუ გამართლდა ის ჭორი და მართლაც გიორგი გახარია დაინიშნა პრემიერად, ეს იქნება პირდაპირი სიგნალი, რომ საქართელოს მართავს არა ადგილობრივი ხელისუფლება, არამედ რუსეთი. გავრილოვი დაგვასვეს პრემიერ-მინისტრად", - განაცხადა რომან გოცირიძემ.

Patreon P მხარი დაუჭირე "ექსპრესნიუსს" →

ავტორი: ლუკა ცარციძე, ექსპრესნიუსის რეპორტიორი 2019 წლიდან