პრემიერმა „დინამოსა“ და „გაბალას“ მატჩის შემდეგ მომხდარ ინცინდენტთან დაკავშირებით შსს-ს მიმართა

2015-07-04 12:34:01, 847 ნახვა

სამართალი

საქართველოს პრემიერ-მინისტრი ირაკლი ღარიბაშვილი, თბილისის „დინამოსა“ და აზერბაიჯანის „გაბალას“ მატჩის შემდეგ მომხდარ ინცინდენტთან დაკავშირებით გავრცელებული ინფორმაციით შეშფოთებულია.

როგორც „ექსპრესნიუსს“ მთავრობის ადმინისტრაციიდან აცნობეს, ირაკლი ხაზს უსვამს საქართველო-აზერბაიჯანის სტრატეგიული პარტნიორობის მნიშვნელობას და აღნიშნავს, რომ სახელმწიფო არავის მისცემს პროვოკაციული ქმედებების უფლებას, რომლებიც ამ ურთიერთობის წინააღმდეგ არის მიმართული.

„ჩვენთვის ძალიან ძვირფასია მეგობრული ურთიერთობა აზერბაიჯანის სახელმწიფოსა და აზერბაიჯანელ ხალხთან. აზერბაიჯანი საქართველოს მნიშვნელოვანი სტრატეგიული პარტნიორია. მე, როგორც საქართველოს მთავრობის მეთაური, კატეგორიულად ვაცხადებ, რომ სახელმწიფო არავის მისცემს უფლებას, მსგავსი სახის პროვოკაციული ქმედებებით ჩრდილი მიადგეს ჩვენს ურთიერთობებს სტრატეგიულ პარტნიორ და მეგობარ აზერბაიჯანთან. მე უკვე მივმართე შინაგან საქმეთა სამინისტროს, შეისწავლოს, ჰქონდა თუ არა ადგილი გავრცელებული ინფორმაციაში მოყვანილ ფაქტებს და, დანაშაულის ნიშნების გამოკვეთის შემთხვევაში, მოახდიონოს შესაბამისი რეაგირება კანონის სრული დაცვით“,- ნათქვამია პრემიერ-მინისტრის განცხადებაში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან