რულოვსი: თუ მეორე ტური გამოცხადდება, მზად ვარ ამოღებული ხმალით გავაგრძელო ბრძოლა ზუგდიდს სახელით

2019-05-20 01:16:29, 1186 ნახვა

კომენტარი

„ფოიერვერკების და სიგნალების მიუხედავად, ჩვენ არ ვაღიარებთ მათ გამარჯვებას“, - ამის შესახებ გაერთიანებული ოპოზიციის ზუგდიდის მერობის კანდიდატმა, სანდრა რულოვსმა მხარდამჭერების წინაშე სიტყვით გამოსვლისას განაცხადა.

როგორც მან აღნიშნა, ზუგდიდში არა არჩევნები, არამედ „სუს-ისა და კრიმინალების ერთობლივი სპეცოპერაცია ჩატარდა“.

"ეს იყო არნახული უპრეცედენტო სადიზმი, შეშინება და ზეწოლა. ისინი ზეიმობენ, რომ ხალხი დამარცხდა და ისევ გააგრძელებენ თავიანთ ტერორს, ჯიბეების გასქელებას და ყველაფერს, რაც მიუღებელია ჩემთვის და მთელი ჩემი გუნდისთვის. პირველ რიგში, ყველა ზუგდიდელს დიდი მადლობა ნდობისთვის. ზუსტი ციფრები სამწუხაროდ ჯერ არ ვიცით, თუმცა არ ვაღიარებ ამ ციფრებს. როგორც ჩანს, ნახევარმა მათი ციფრებით დაგვიჭირა მხარი, რაც დიდი ჯარია და ამას გამოვიყენებთ შემდეგი ბრძოლის დროს. ზუსტად ზუგდიდიდან იწყება საქართველოს გამარჯვება, ეს იქნება ლოზუნგი, რომლითაც შეგვიძლია მთელ ქვეყანაში ვიაროთ და ხალხს გავაგებინოთ, რომ ივანიშვილის მმართველობა არის მიუღებელი, კრიმინალური, კორუფციული, ეს არის ქვეყნის ნგრევა. ჩვენი ბრძოლა გრძელდება“, - აღნიშნა რულოვსმა.

მისივე თქმით, მას შემდეგ, რაც ცესკო ოფიციალურ შედეგებს გამოქვეყნებს, სამომავლო გეგმებზე ისაუბრებენ.

„ჩვენ ველოდებით ოფიციალურ შედეგებს, ამბობს მმართველი პარტია რომ მოგებულია, მაგრამ ოფიციალური შედეგები ჯერ არ დადებულა. თუ მეორე ტური გამოცხადდება მზად ვარ ამოღებული ხმალით გავაგრძელო ბრძოლა ზუგდიდს სახელით, ხოლო თუ ამბობენ საარჩევნო კომისიაში, რომ გეგა შენგელიამ მოიგო არჩევნები, მაშინ ჩვენი ბრძოლა უფრო გაფართოვდება. ეს ნიშნავს, რომ იქნება ზუგდიდის გარეშეც ბრძოლა გაგრძელებული. მე აქ ვცხოვრობ, ამ ხალხთან ერთად მოვიპოვე ბრძოლისუნარიანობა რაც ადრე არ მქონდა, მშვიდი ვიყავი ყოველთვის და შემიძლია სიმშვიდე შვინარჩუნო, მაგრამ ჩემს პრინციპებს ეხებიან, როდესაც ადამიანების დაცინვა მიმდინარეობს, მათი გაჭირვების არ გათვალისწინება, როცა მიმდინარეობს ზეწოლები, კორუფცია, ეს არის ჩემთვის ყველანაირად მიუღებელი. წეღანაც რომ ვიდექი განმუხურში და იქ იყო არჩილ თალაკვაძე, ხდებოდა ის, რაც არ უნდა ხდებოდეს. მე არჩილს კარგად ვიცნობ და ის უნდა იყოს ჩემი მადლობელი, კითხეთ რა გამიკეთებია მისთვის 2012 წლის ჩათვლით. არჩილი აკეთებს იმას, რაც დღეს გააკეთა პრემიების, ოვაციების მისაღებად ივანიშვილისაგან და შეიძლება უკეთესი თანამდებობისთვის.
ამომრჩევლის მდგომარეობაში შევდივარ, ოღონდ უნდა დაველოდო ბოლო შედეგს და მერე შემდეგი გეგმა იქნება ცნობილი. ჩვენ აქ 12 პარტია ვართ, როცა გვეცოდინება ოფიციალური შედეგები, ამაზე ჩამოვყალიბდებით მთავარია რომ არ ვაღიარებთ ამ არჩევნებს. ეს არ იყო არჩევნები, ეს იყო ტერორისა და ზეწოლის ქვეშ ჩატარებული სპეცოპერაცია და ამ მთავრობის კიდევ ერთი სირცხვილი.
ივანიშვილმა დაკარგა არა მარტო ბევრი ფული ამ არჩევნებში, არამედ კიდევ უფრო დაბლა წავიდა მისი რეპუტაცია. მთელმა ქვეყანამ მიიღო დარტყმა ამ არჩევნების, ძალიან დიდი სირცხვილია. ხვალ დილით BBC-სთან მექნება ინტერვიუ და მრცხვენია რომ უნდა ვთქვა, რაც ხდებოდა ზუგდიდში ბოლო კვირების განმავლობაში“, - განაცხადა სანდრა რულოვსმა.