კობახიძე: ფადი ასლის აქვს პოლიტიკური მიკერძოება - შეიყვარა ერთი პოლიტიკური პარტია და ვეღარ გადაიყვარა

2019-03-22 17:07:07, 1372 ნახვა

პოლიტიკა

„ფადი ასლის სიაში ჩამოთვლილი იყო, მათ შორის ისეთი კომპანიები, რომლებიც სწორედ „ქართული ოცნების" პირობებში გაიფურჩქნა. ეს ყველაფერი მეტყველებს იმაზე, რომ ფადი ასლიმ გააკეთა მიკერძოებული პოლიტიკური განცხადებები", - ასე გამოეხმაურა ირაკლი კობახიძე საერთაშორისო სავაჭრო პალატის თავმჯდომარის, ფადი ასლის განცხადებას ხელისუფლების მიერ ბიზნესზე ზეწოლისა და მის მიერ გამოქვეყნებულ კომპანიების სიის შესახებ.

საქართველოს პარლამენტის თავმჯდომარის შეფასებით, ფადი ასლი მიკერძოებულია კონკრეტული პოლიტიკური პარტიის მიმართ.

„ვიცით, რომ ფადი ასლის აქვს პოლიტიკური მიკერძოება. მან შეიყვარა ერთი კონკრეტული პოლიტიკური პარტია და ვეღარ გადაიყვარა დღემდე. აქედან გამომდინარე, მისი განცხადებები არის, ბუნებრივია, მიკერძოებული. მის სიაში იყო ჩამოთვლილი, მათ შორის ისეთი კომპანიები, რომლებიც სწორედ „ქართული ოცნების" პირობებში გაიფურჩქნა. ეს ყველაფერი მეტყველებს იმაზე, რომ ფადი ასლიმ გააკეთა მიკერძოებული პოლიტიკური განცხადებები",- აღნიშნა ირაკლი კობახიძემ.

მისი თქმით, ბიზნესის თავისუფლება სახელმწიფოს უმთავრესი მიღწევაა 2012 წლის შემდეგ. თუმცა, პარლამენტის თავმჯდომარის განცხადებით, თუ ვინმე ბიზნესზე ზეწოლის კონკრეტულ ფაქტებს წარმოადგენს, მმართველი გუნდი მზადაა ამაზე რეაგირება მოახდინოს.

„2012 წლის შემდეგ ბიზნესის თავისუფლება არის ჩვენი სახელმწიფოს უმთავრესი მიღწევა. იყო ტოტალური რეკეტი. 10 ათასზე მეტ ადამიანს წაართვეს ქონება სხვადასხვა ფორმით. მათ შორის, პირველ რიგში ბიზნესმენებს 2012 წლამდე. 10 ათასზე მეტ ადამიანს. არცერთი ფაქტი აღარ არსებობს 2012 წლის შემდეგ. ეს არის ჩვენი მიღწევა. თუ ვინმე კონკრეტულ ფაქტებს მოიტანს, ჩვენ მზად ვართ, რომ ამ საკითხს ჩავხედოთ და რეაგირება მოვახდინოთ. მაგრამ, რაც შეეხება ვითარებას, აი ეს არის -10 ათასიდან ჩამოსულია ნულამდე. აქედან გამომდინარე, ფადი ასლი რას იტყვის, რომელიც არაფერს არ ამბობდა მაშინ, როდესაც ათი ათას კაცს აყაჩაღებდა „ნაციონალური მოძრაობა", დღეს არ არის რელევანტური და საინტერესო",- განუცხადა ირაკლი კობახიძემ ჟურნალისტებს.