ხაზარაძე პროკურატურის მიერ ჩვენების ნაწილის გასაჯაროებაზე - პერიოდულად ვრცელდება ასეთი ამოგლეჯილი პასაჟები

2019-02-18 19:10:12, 1187 ნახვა

კომენტარი

„ასეთი ამოგლეჯილი პასაჟები, სამწუხაროდ პერიოდულად ვრცელდება“, - ამის შესახებ „თიბისი ბანკის“ დამფუძნებელმა მამუკა ხაზარაძემ პროკურატურის მიერ გასაჯაროებული ჩვენების ნაწილთან დაკავშირებით განაცხადა.

როგორც მან აღნიშნა, საკითხის შესასწავლად აუცილებელია სპეციალისტებმა იმუშაონ, რათა საზოგადოება შეცდომაში არ შევიდეს.

„საქმე ეხება 2007-2008 წლის ტრანზაქციებს, ამას სჭირდება სპეციალისტები. ნებისმიერ ასეთ ამოგლეჯილ პასაჟებს, რომელიც სამწუხაროდ ვრცელდება პერიოდულად, აქ ჩვენ ვერ გავცემთ პასუხს“, - განაცხადა მამუკა ხაზარაძემ.

შეგახსნენებთ, გენერალურ პროკურატურაში „თიბისი ბანკთან“ დაკავშირებით გამოძიება უკანონო შემოსავლის ლეგალიზაციის (ფულის გათეთრების) და სხვა კანონსაწინააღმდეგო ქმედებების ფაქტზე მიმდინარეობს.

როგორც უწყების მიერ 9 იანვარს გავრცელებულ განცხადებაშია აღნიშნული, გამოძიებით დადგენილია, რომ 2008 წლის აპრილში და მაისში, შპს „სამგორი თრეიდმა“ და შპს „სამგორი M”-მა, ,,თიბისი ბანკი“-სგან, სათანადო უზრუნველყოფის გარეშე, დაჩქარებული წესით მიიღეს საერთო ჯამში 17 მილიონ აშშ დოლარამდე სესხი.

„კომპანიების ანგარიშებზე სესხის თანხის განთავსებისთანავე, მამუკა ხაზარაძემ და ბადრი ჯაფარიძემ, ამავე კომპანიებიდან, როგორც ფიზიკურმა პირებმა, ისესხეს ზუსტად იმ ოდენობის თანხა, რაც ,,თიბისი ბანკმა“ საბრუნავი საშუალებების შევსების მიზნობრიობით ასესხა დასახელებულ კომპანიებს. 2008 წლის ბოლოს, თიბისი ბანკმა, აღნიშნული სესხები, საბანკო რეგულაციებით დადგენილ ვადაზე ადრე, დაუსაბუთებლად ჩამოწერა და გარე საბალანსო ანგარიშზე გადაიტანა, ხოლო 2012 წელს საერთოდ გაათავისუფლა ეს კომპანიები ბანკის წინაშე არსებული სასესხო ვალდებულებისგან, როდესაც დათანხმდა ამ ვალდებულებების ოფშორულ კომპანიაზე გადატანას. საგულისხმოა, რომ „სამგორი თრეიდს“ და შპს „სამგორი M”-ს სესხები ისე ჩამოიწერა, რომ ამ კომპანიებს სესხის მომსახურებისთვის თანხა საერთოდ არ გაუღიათ და აღნიშნული სესხები ბანკს დღემდე არ დაბრუნებია. გარდა ამისა, დადგენილია, რომ მამუკა ხაზარაძეს და ბადრი ჯაფარიძეს ასევე არ გაუსტუმრებიათ შპს „სამგორი თრეიდისა“ და შპს „სამგორი M” - ს, ვალი“, - განაცხადეს პროკურატურაში.

14 თებერვალს, საქართველოს ეროვნულმა ბანკმა მამუკა ხაზარაძესა და ბადრი ჯაფარიძეს „თიბისი ბანკის“ დოკუმენტაციაზე ხელმოწერის უფლება შეუჩერა. გარდა ამისა, „თიბისი ბანკის“ აქციონერთა კრებას მათი სამეთვალყურეო საბჭოდან გაწვევისათვის 2-თვიანი ვადა მიეცა.

„თიბისი ბანკში“ განაცხადეს, რომ ბანკისა და აქციონერების ინტერესების დასაცავად მათ ხელთ არსებულ ყველა სამართლებრივ საშუალებას გამოიყენებენ და სასამართლო დავას გააგრძელებენ.