მსვლელობის მონაწილეებმა 51 საჯარო სკოლასთან და ხორავას ქუჩაზე დათუნა სარალიძის და ლევან დადუნაშვილის ხსოვნას პატივი მიაგეს

2018-12-01 15:11:32, 4211 ნახვა

სხვადასხვა

ხორავას ქუჩაზე მომხდარი ტრაგედიიდან ერთი წლისთავთან დაკავშირებით დაგეგმილი მსვლელობის მონაწილეები პარლამენტთან შეიკრიბნენ. მსვლელობა ხორავას ქუჩაზე დასრულდა.
აქციაში მონაწილეობდნენ მოკლული დათუნა სარალიძის მამა ზაზა სარალიძე და პანკისის სპეცოპერაციისას მოკლული თემირლან მაჩალიკაშვილის მამა, მალხაზ მაჩალიკაშვილი.
აქციის მონაწილეებმა, გარდაცვლილ მოზარდებს 51 საჯარო სკოლასთან წუთიერი დუმილით პატივი მიაგეს და სკოლის წინ სანთლები დაანთეს.
ამის შემდეგ, მსვლელობის მონაწილეები რუსთაველის გამზირის გავლით ხორავას ქუჩაზე მივიდნენ სადაც არასრულწლოვნები დავით სარალიძე და ლევან დადუნაშვილი მოკლეს.
"ახლა ლაპარაკიც მიჭირს ამ თემაზე იქიდან გამომდინარე, რომ დღევანდელი დღის სწორს ბოლოჯერ ველაპარაკე ჩემს შვილს დილის საათებში და მას შემდეგ მისი ხმა არ გამიგონია. ამ ერთი წლის განმავლობაში არც მკვლელები არიან დასჯილი და იმის მაგიერ, რომ საქმე სრულყოფილად გამოიძიონ, პირიქით, საზოგადოების ნაწილი, ხელისუფლება და ძალოვანი უწყება მაქსიმალურად ცდილობს ტალახი ესროლოს ჩემს გარდაცვლილ შვილს და პირადად ჩემს ოჯახს.
არ მეგონა თუ ერთი წლის თავზე პასუხისგებაში არ იქნებოდნენ მიცემული ის სადისტი მკვლელები, რომლებიც დღეს საქართველოს ქუჩებში ამაყად დადიან. დარწმუნებული ვარ, ეს პირები კიდევ შეიწირავენ ვინმეს", - აცხადებს სარალიძე.
შეგახსენებთ ტრაგედია ზუსტად ერთი წლის წინ მოხდა.