რაჭაში ხე-ტყის უკანონო მოჭრის ფაქტზე გარემოს დაცვის სამინისტრომ მოკვლევა დაიწყო

2015-06-09 18:09:52, 592 ნახვა

საზოგადოება

რაჭაში, ცხრაჯვარებთან ხეების გაჩეხვის ფაქტი დაფიქსირდა. მოგზაურთა და მთამსვლელთა კლუბმა „თეთნულდი“-მ სოციალური ქსელით გაავრცელა ინფორმაცია, რაჭაში, აღნიშნულ ტერიტორიაზე ხეების გაჩეხვის ფაქტთან დაკავშირებით.

აღნიშნულზე დეტალური ინფორმაციის მიღების უზრუნველსაყოფად სატყეო სააგენტოს ხელმძღვანელი ესაუბრა კლუბის წარმომადგენლებს, მიღებული ინფორმაციის საფუძველზე ფაქტის ადგილზე შესწავლისას სსიპ ეროვნული სატყეო სააგენტოსა და გარემოსდაცვითი ზედამხედველობის დეპარტამენტის თანამშრომლების მიერ აღრიცხული იქნა უკანონოდ მოჭრილი 60 ძირი სოჭისა და ნაძვის სახეობის ხე-ტყე, რომელთაგან მხოლოდ 5 ცალი სოჭისა და ნაძვის სახეობის ხე არის ადგილზე, დანარჩენი უკანონოდ მოჭრილი ხე-ტყე წაღებულია ჭრის ადგილიდან.

ამ ეტაპზე დაუდგენელია ხის მჭრელის ვინაობა და მოჭრილი ხე-ტყის ადგილმდებარეობა. მიმდინარეობს საკითხის მოკვლევა და შესწავლა.

გამოანგარიშებული იქნება ხე-ტყის უკანონოდ მოჭრით გარემოსათვის მიყენებული ზიანის ოდენობა, რის შედეგადაც გატარებული იქნება შესაბამისი რეაგირება.